Inuit Ataqatigiinnit kommunit akornanni naligiissaarineq akerlerinngilarput. Akerliatigut ersoqatigiinneq tunngavigalugu pissaqarnerit pissakinnernik ikiorsiinissaat siunertaraarput.

Tamanna tunngavigalugu kommunit akornanni naligiissaarineq tapersersoreerparput, soorlu Kommuneqarfik Sermersuup kommunet allanut tapiisareerneratigut. Ukioq mannali Naalakkersuisunit paasinanngittumik periuseqarneq partiillu akornanni pineqartoq pillugu akersuunnerit iluameersumik isumaqatiginnissinnaanermut mattussipput.

Naalakkersuisut tamanna aaqqissagaat innersuussutigaarput. Ataatsimoorluta naalakkersuilluarneq ingerlatsigu!

IA isumaqatiginninniuteqarnissamut piareersimavoq
Kommunit akornanni naligiissarineq pillugu isumaqatiginninniuteqarnerit ajunngitsut tunngavilersorluarneqartullu kissaatigaavut. Maannamut periuserisimasaq, siullermik uagut naalakkersuisuutitaqarallatatta kommuninut akisussaaffimmik tamakkiisumik tunniussiinnarneq kingornalu maannakkut naalakkersuisut kommuninik naligiimmik isumaqatiginninniunnermut peqataatitsinatik peqqusiinnarnerat, tamarmik naammanngillat.

Inuiaqatigiinni naligiinnerulernissaq pillugu aaqqiissutissamik atasinnaasumik nassaarnissaq anguniarlugu oqimaaqatigiissakkamik, paasissutissat tunngavigalugit tamallu oqartussaaqataanerannik ataqqinnittumik periuuseqarnissaq pisariaqarpoq.

Naligiinnginnerup akiuvinnissaa ujartorparput
Kommunet akornanni naligiissaariinnarnikkut naligiinninnerup akiornissaa naammassorinngilarput. Annertunerusumik siammasinnerusumillu iliuuseqartoqartariaqarpoq. Naalakkersuisuutitaqarnitta nalaani aaqqissuusseqqinnissamut tikkuakkavut maanna Naalakkersuisuusunit qaqugu iliuuseqarfigineqassappat? Sunniuteqarluartumik iliuuseqartoqassappat atugarissaarneq pillugu aaqqissuusseqqinnissat pinngitsoorneqarsinnaanngitsut isumaqarpugut.

Inuit Ataqatigiinnit akileraartarnikkut aaqqissuusseqqikkusuttunik suleqatissanik ujartuivugut, assigiimmik akileraartarnikkut inuit ataasiakkaat ilaqutariillu akornanni naligiinnginnermik annertuumik kinguneqartoq iliuuseqarfigiumal-lugu.

Kommunit kattunnerat ataatsimut naliliiffigilluarneqartariaqarput
Kommunit kattunnerisa kingorna ataatsimoortumik naliliineq ingerlavoq. Inuit Ataqatigiinnit kommunit kattunnerat innuttaasut akornanni naligiinnerunermik kinguneqarsimanersoq paasissallugu qilanaarpugut. Kommuninik aaqqissuusseqqinneq naligiinnerulernissamik qanoq kinguneqartitsisimava? Uatsinnut kommunit ataasiakkaat aveqqinnissaat pineqarani ataatsimut naliliinissaq pingaarneruvoq. Kommunitta akornanni naligiinnginneq pillugu siammasissumik politikkikkut oqallinnissaq naliliinissarlu kissaatigaarput, nuna tamakkerlugu ataatsimut isigalugu iliuusissanik periusissamik peqalerniassagatta.

Tunngavilersorluakkamik aalajangiineq
BDO-p nalunaarusiaa, hvidbogimik aamma taagorneqartoq, tamakkiisuunngilaq. Taassuminnga allattut tunngavilersuutit amigartut namminneq oqaatigaat. Taamaammat periuuserisaq isornartorsiunngitsoorsinnaanngikkipput isumaqarpunga.

Inuit Ataqatigiinnit tunngavilersorluakkanik aalajangiisarneq atugaraarput, pineqartumilu taamaattoqanngilaq. Taamaammat Naalakkersuisut kommunet partiillu akornanni oqaloqatigiinneq isumaqatiginninniuteqarnerlu ajunngitsoq pilersikkumallugu tunngavilersorluakkanik paasissutissanik misissueqqissaarnerlu tunngavigalugit saqqummiussinissaannik inassuteqarfigaavut.

Peqataanissamut piareersimavugut, periuuserisalli paasinartuunissaa ajunngitsuunissaalu piumasaqaatigaarput.

Sara Olsvig, siulittaasoq, Inuit Ataqatigiit