Inuit Ataqatigiit nunatsinni inuit nammaqatigiinnerat annertusarusupparput. Inuit sumiiffinni tamani naligiinnerusumik atugaqarnissaat anguniarlugu aaqqissuussamik suleqataaffigissavagut timitalersueqataassallutalu.

Kommunit sisamaasut aningaasarsiornikkut inuillu atugaasigut naligiisitsinerusut pilersikkusuppagut partiit ataatsimut suleqatigiisillugit kivitseqatigiinnerisigut – kommunit Naalakkersuisullu peqatigiilluinnarlutik pilersaarusiukkamik suliassarissagaat Inuit Ataqatigiit kissaatigaarput. Massakkullu Naalakkersuisut suleriaaserisaat inuiaqatigiinni avissaartuunnermik pilersitsivoq.

Suliassaq annertooq piffissami sivikitsuinnarmi isummerfissaq, inuillu atugaannut sunniuteqarluinnartoq tunngavilersuutillu suut atorneqassanersut pillugit aalajangiinissamut piffissaqarluartumik suleqatigiiffiunissaa Inuit Ataqatigiit kissaatigaarput.

Inassutigaarput naligiissaarineq aningaasat kisiisa aallaaviginagit, aamma isumaginninnikkut atukkat inuussutissarsiuteqarnikkullu inerisaanerit, minnerunngitsumillu inuit inuuniarnikkut periarfissaat tamakkiisumik isiginiarlugit inuiattut atugarissaarnitta siuarsarnissaa. Aningaasarsiorneq siuarsarneqassaaq kiisalu inuiaqatigiinni agguaaqatigiinneq sukumiinerusumik oqaluuserineqarluni tamanillu peqataaffigineqarluni ineriartortitaq kajumissaarutigaarput. Tunngavissat siammasinnerusut tunngavigisariaqarsimagaluartut Inuit Ataqatigiinnit erseqqissumik oqaatigissavarput.

Tassani qitiulluinnarpoq Nunatta ataatsimut isigalugu aningaasaqarnikkut ingerlalluarnissaa. Nunarput aningaasatigut ajornartorsiorpoq, taamaammat aningaasaqarnikkut allannguinerit annertuut, soorlu naligiissaarinerup allanngortiterneqarneratut ittut nunamut tamarmut aammalu nunap immikkoortuinut aningaasatigut qanoq kinguneqarnissaannik paasisimannilluarluni aalajangerneqartassapput, tamannalu Inuit Ataqatigiinniit piumassuseqarluta peqataaffigissavarput.

Naalakkersuisut aningaasaqarnermut inatsisissamik siunnersuummik saqqummiusseqammerput. Tamatumani erserpoq nuna tamakkerlugu aningaasaqarnikkut sipaarniuteqartoqartussaasoq aammalu aningaasarsiornikkut ingerlallualersitsisussanik saqqummiussaqanngittoq. Tamanna tunngavigalugu Inuit Ataqatigiinnit pingaartipparput naligiissaarinerup inernilernera aningaasaqarnermut inatsisissamut sanilliullugu nunatta ataatsimut aningaasaqarnera isigalugu qisuariartoqassasoq. Tamatta akisussaaqatigiippugut, Inuit Ataqatigiiniillu nunarput ataatsimut isigalugu akisussaassusilimmik naligiisitsinerusumillu kinguneqartussamik suleqataanissamut piareersimavugut.

Uteqqillugu erseqqissassavarput, kommunit akornanni aningaasanik agguaaqatigiinnikkut naligiissaarineq akerlerinngikkipput. Naalakkersuisulli naligiissaarinissamik siunertaqartut suliassap qanoq siunertaqarluni qanorlu ilutsimik anguniagaqarluni sammineqarnissaanut saqqummiussaqannginnerat amigaatigaarput. Matumanimi aningaasarpassuit pineqarput. Allannguinerit annertuut sukumiisumik oqaluuserineqartarnissaat ileqquliuttariaqarparput, soorlu partiit tamarmik qineqqusaarnerminni oqaatigisaraat.

Kommunit akornanni naligiissaarinissaq qanoq siunnerfilimmik ingerlanneqassava? Apeqqut akiuminaatsuuvoq, oqallinnerlu kommunit akornanni naligiissaarinermut tunngasuinnaanngitsunik aammali innuttaasut aningaasatigut, sullinneqarnikkut angallannikkut allatigullu periarfissatigut naligiinnerusumik atugaqalernissaannik sukumiinerusumik imaqarluni ingerlaqqittariaqarpoq. Tamannalu ilaatigut kommuninik aaqqissuusseqqinnerup naliliivigineqarneranut atatillugu ingerlattariaqarpoq. Taamaammat Inuit Ataqatigiit ukiamut Inatsisartut ataatsimiinnissaanni oqallisissiamik saqqummiussissaagut naligiissaarinerup qanoq tunngavilersorneqarnissaa pillugu Inatsisartut naalakkersuisullu isummersoqatigiinnissaat timitalerneqaqqullugu.

 

Inuit Ataqatigiit sinnerlugit:

Siulittaasoq:                                             Sara Olsvig

Siulittaasup tullia:                                  Aqqaluaq B. Egede

Qaasuitsup Kommuniani IA:               Ane Hansen

Qeqqata Kommuniani IA:                    Agathe Fontain

Kommuni Kujalleq IA:                          Kelly Berthelsen

Kommuneqarfik Sermersooq IA:        Mille S. Pedersen