Narsamit Nalunaarut  Inuit Ataqatigiit aasaanerani ataatsimiinnerat  Juunip 11-at 12-allu, 2016

Inuit Ataqatigiit qinigaatitai Narsami ulluni juunip 11-ni 12-nilu katerisimaarput aasaanerani ataatsimiinnerput ingerlallugu.

Aasaanerani ataatsimiinnermi sammisavut pingaarnerit tassaapput urani aningaasaqarnikkullu politikki aqqutigalugu inuiaqatigiinni naligiinnerulernissamik anguniagaqarnerput.

Ataatsimiinnitsinnit oqariartuutit pingaarnerpaat tassaapput:

  • Aningaasaqarnermut politikki aqqutigalugu naligiinneruneq aamma anguniarneqassaaq. Aaqqissuusseqqinnissani aggersuni Inuit Ataqatigiit tamanna tunngavigissavarput. Nammaqatigiinneq tunngavigalugu pissakinnernik illersuinissaq suliarissavarput.
  • Aningaasat allaffissornikkut nunatta avataanit siunnersorteqarnermut atorneqartartut qulaajaaffigissavagut, nunatsinni inuussutissarsiutinik nutaanik, uranisiornermut taarsiullugu ineriartortitassanik inuussutissarsiornikkullu siammaanissamut atugassanngortinnissaat siunertaralugu.
  • Uranisiornermut pilersaarutit unitsinneqassapput uranimik piiaanermit eqqakkat mingutsitsinissaat annertooq kinguaassatsinnut aningaasartuutinik avatangiisinillu mingutsitsinermik nammakkiisussaammat. Uranisiornata qaqugorsuarmut pisuussutitsinnik, aatsitassanik allanik, nunalerinermillu, aalisarnermik, piniarnermik, inuussutissalerinermik, takornariaqarnermillu siuarsaanissaq nutaaliornerlu aallutissavarput.

Ersoqatigiinneq tunngaviuli

Inuit Ataqatigiit Nunatta ineriartornerani suliassat pingaarnersaattut taavarput pissaaleqinermik nalaanneqartartut pissaqarnerulernissaat anguniarneqassasoq. Inuiaqatigiinni innuttaasut atukkatigut naligiinnginnermik annertuumik annertusiartortumillu eqqugaapput. Nunatta ineriartortilluarnissaanut inuiaqatigiittullu ataatsimoornissatsinnut naligiinnerulernissaq aqqutissaavoq. Ineriartornermi inuit atugarliornermikkut pissakilliornertik peqqutigalugu katataanissaat akuerinngilarput.

Naligiinnginnerup akiornissaa suliassatta pingaarnersaasa ilaattut inissisimassaaq.

Inatsisartuni, kommuneni, nunaqarfinni aqutsisuni Folketingimilu qinikkatut sulinitsinni tamanna tunngaviussaaq.

Aaqqissuusseqqinnissani aggersuni, pingaarnertut akileraartarnikkut, ineqarnermut pisortaniillu ikiorsiissuteqarnermut aaqqissuusseqqinnerni pissakinnernik illersuinissaq qitiutissavarput.

Akileraartanermut aningaasaqarnermullu politikki naligiinnginnerup akiorniarnerani pissakinnernillu illersuinermi sakkussat pingaarnerit ilaattut inissisimasut naqissusissavarput partiitullu saamerliusutut akileraartarnikkut aaqqissuusseqqinnikkut naligiinnerusumik atugaqalernissamik piaartumik iliuuseqarnissaq piumasaraarput.

 

Suliffissanik pilersitsisa

Inuiaqatigiittut isumaqatigiiffigisavut salliutillugit inuussutissarsiornikkut ineriartortitsissaagut. Uranisiorfik ammassanersoq kialluunniit qulakkeereerlugu neriorsuutigisinnaanngilaa. Akisussaassusilimmik ingerlatsilluta inuussutissarsiutit allat pimoorullugit siuarsalertariaqarpavut toqqissisimanartumik ineriartortitsinissaq suliffissanillu qulakkeerinninnissaq siunertaralugu.

Nuna tamakkerlugu suliffissaaleqisoqarmat nuna tamakkerlugu suliffissaaleqineq akiorneqartariaqarpoq. Inuit Ataqatigiit inuussutissarsiornikkut siammaanissaq tamatsinnit anguniarneqartariaqartutut tikkuarparput. Nunap immikkoortuini ataasiinnaavallaartumik isumalluuteqarneq qimattariaqarparput.

Suliffissanik pilersitsiniarnermi erngup nukinganik nukissiorfiit pioreersut nukissamik sinneqartarnerat inuussutissarsiutinik nutaanik piusunillu ineriartitsinermi atorluartariaqarpoq. Erngup nukinganik atuineq siammassaaq, seqerngup nukinga, anorip nukinga, erngup nukinga allallu nutaaliornikkut nassaarineqarsinnaasut inoqarfinni amerlanerni minnernilu suliffisanik inuussutissarsiutinillu nutaannik pilersitsinissamut atorneqarsinnaanngorlugit.

Takornariaqarneq aaqqissuussamik pilersaarusiorluakkamillu siuarsassaaq, nunap immikkoortukkaartumik tigussaasunik pilersaarusiornikkut ukiorlu tamaat takornarissanut misigisassanik neqerooruteqarnikkut.

Takornarissat inoqarfinni ataasiakkaani innuttaasut siuarsaarusussusaat tunngavigalugu misigisassaannik piorsaasoqassaaq, takornariaqarnerup inoqarfinnut amerlanerusunut siammarnissaa pillugu.

Inuit Ataqatigiit pisuussutinik atuinermi piujuaannartitsineq tunngavigaarput. Pingaartumik inoqarfinni minnerni puisit amiinut aalisakkanullu tunitsiveqarneq inoqarfimmut qanoq pingaaruteqartiginersoq naqissuserparput. Ilaqutariit inuillu toqqissisimallutik inuussutissaqarlutillu inuunissaannut inuussutissarsiornernik piujuarsinnaasunik siuarsaanikkut aqqutissiuusseqataassaagut.

 

Urani atugarissaarnermut aqqutissaanngilaq

Inuit Ataqatigiit uppernarseqqippaat inuiaqatigiinni urani pillugu ilisimasat annikippallaarujussuartut. Tamanna uppernarsarneqarpoq urani pillugu ilisimasallit nakorsat ilisimatusarnikkullu ukiorpassuarni ilisimasassarsiorsimasut Narsami saqqummiussineranni.

Ilisimalikkatta ilagaat uranisiornermit tailingsit, piiaanermit sinnikut, tassaasut ulorianartunik qinngorneqarnikkut mingutsitsinerpaat kinguaariippassuarnit nakkutigineqartussat aningaasartuutigineqartussallu.

Inuit Ataqatigiit uranisiormut akerliunerput naqissuseqqipparput. Uppernarsivarput uranisiortoqassappat kinguaassatsinnut mingutsitsinermik nammakkiissasugut inuussutissarsiutinullu pioreersunut, savaateqarnermut, nunalerinermut, aalisarnermut, piniarnermut, takornariaqarnermut allanullu ineriartortinneqarsinnaasunut, akornusiissoqassasoq.

Uranisiornermit isertitassat annaasassatsinnik matussusiisinnaannginnerat uppernarsivarput.

 

Tamat oqartussaaqataanerannik naalakkersuinikkut pingaartitsineq

Inuiaqatigiit nukittuut innuttaasunit peqataaffigineqartut tamat oqartussaaqataanerannik naalakkersiunikkut pingaartitsiffiusut Inuit Ataqatigiit pilersikkumavagut.

Urani pillugu innuttaasunik taasititsinissaq naalakkersuinikkut patajaatsumik ingerlatsinissamut aqqutissaasutut tikkuarparput. Innuttaasut isumartik qanorluunniit ippata tusartissallugu pisinnaatitaaffeqarput. Inuit Ataqatigiit innuttaasut naaggaarnissamut pisinnaatitaaffeqarnerat tamat oqartussaaqataaneranut ilaasutut erseqqissarumavarput.

Siunissaq siorasaarutaassanngilaq, siunissaq periarfissiisuussaaaq.

Taamaammat uranisiornermit Kuannersuit mingutsitsijuaannartunngortillugit aatsitassarsiorfigalugit kinguuassatsinnut kingornutassanngortissanngilagut. Qaqqaq Kujataanilu nunattalu sinnerani avatangiisit pisuussutillu pigisavut eriagalugit ukiuni tuusintilikkaani pisuussutigijuassallutigit qajannaartigit.

 

Sara Olsvig

Siulittaasoq

Inuit Ataqatigiit