Nunarsuarmioqataaniarpugut imaluunniit immitsinnut mattunniarpugut? Qinersineq nunatta siunissaanut aalajangiisuussaaq, avammut alakkaamasaqarnikkut akornatsinnilu kiinnertarnikkut. Inuiaqatigiinni naleqartitat suut ilisarnaatigissanerivut qineqqusaarnermi qitiussaaq.

Inuit Ataqatigiit inuiaat iluminni allanullu ammasuunermik takutitsisut pilersikkumavagut.  Avammut alakkaamasaqarneq assigiinngisitaarnerlu kissaatigaavut.  Inuit Ataqatigiit isumarput erseqqippoq – partiiuvugut tamanik inissaqartitsisoq. Isumaqarpugullu nunarput tamanut inissaqartitsisuusoq.

Siunissaq neriuuteqarfiulluartoq

Nunatta siunissaanut piffissamut aalajangiisuusussamut appakaappugut. Inuit taakkuinnaavugut ataatsimoorlutalu inuiaqatigiinnik nukittuunik imminullu napatittunik sanarfinissamut anguniagaqaqatigiippugut. Aporaanneq ajornartorsiutinik sunilluunniit aaqqiineq ajorpoq ataatsimuulersitsinerlu ajorluni. Immikkoortitsinermit ajattuinermiillu nuannersunik pilersitsisinnaanngilagut.

Akerlianik tatigeqatigiinnermit upperinninnermillu ajunngitsunik pilersitsisinnaavugut. Siunissaq neriuuteqarfiulluartoq isigaarput, tamatta peqataaffigisarput tamanillu inissaqartitsisoq.

Nunarput tamat oqartussaaqataanerat tunngavigalugu nukittuunik nutaaliaasumillu ingerlavoq, inuiaat kalaallit inuiaat nukittuujuvugut anersaakkut kultuurikkullu nukissaqarluartut. Avataanit sunnerneqarnerlunnissatsinnut ernumanartorsiunngilagut. Akerlianik kinaassutsitsinnik attassinissamut pikkorissuseqarpugut avataaniillu sunniutaasut atorsinnaasavut naleqqussarlugit allanngortillugit nammineq atorsinnaanngorlugit pigilernissaannut pikkorissuseqarpugut.

Tamatta atorfissaqarpugut

Inuiaqatigiinni oqaatsit aammalumi sumiuussuseq tunngavigalugu aporaannerit suli nukippassuarnik atuiffigisarivut takusinnaavarput. Ukiuni makkunanerpiaq naligiissitsinissamik siuarsaanissaq pingaartipparput. Kikkut tamarmik ilaanissaat qulakkeertariaqarparput, kikkut tamarmik inissaqassapput. Taamaammat tunngaviusumik inatsisiliorluni sulinermi naligiissitsinerup qitiutinneqarnissaa qulakkiissavarput.

Inuiaqatigiit nammineq naleqassutsimik misigisimanerput upperivara. Upperivara maani nunami nukittuumik ataatsimoorusussusermik peqartugut, oqaatsit, inuiaassuseq sumiuussuserlu akimorlugit.

Allatut oqaatigalugu Inuit Ataqatigiit isumaqarput, siuariartortoqassappat  tunngaviusunik naleqartitat qaqinneqartariaqartut, tunngaviusumik naleqartitat tassaammata qanoq inissisimanitsinnut takussutissiisut.

Tamatta atorfissaqartinneqarlutalu naligiippugut. Inuit assigiinngisitaartut suleqatigiissinnaanerat piffissanngorpoq, aamma oqaluttuarisaanitsinni annernarsinnaasunik pisoqarsimagaluartoq. Ingerlaqqittariaqarpugut, ataatsimoorluta.

Sara Olsvig, Siulittaasoq, Inuit Ataqatigiit