Nakorsassaaleqineq iliuuseqarfigineqarli

Aasianni nakorsassaaleqinerup Qeqertalimmi innuttaasut tamaviisa eqqornerlussavai, tamannalu piaarluinnartumik pimoorullugulu Naalakkersuisunit aaqqiivigineqartariaqarpoq.

Aasianni nakorsassaaleqinerup ernisussat 100-t tungaanoortut annertuumik eqqornerlusagai maanna paasisimalerparput.

Aarlerinarluinnartutullu aamma isigisara manna paasisaqarfigilluarusuppara, tassa Qeqertalik 6000-it sinnerlugit innuttaqartoq eqqarsaatigalugu tassanngaannaq suliarineqartussanik Aasiaat napparsimavianut unittoqartillugu suliarinnissinnaasunik piareersomasoqarunnaassammat. Tamanna Naalakkersuisunit eqqarsaatigilluagaanerpa?

Tassanngaannaq ajutoortoqartillugu ajunaarnersuaqartilluguluunniit nakorsat sumiiffinniittut ikuingasuarsinnaasut pisariaqartinneqartuaannarput, nakorsallu taamaattut maanna Qeqertalimmi amingaatigilersussanngorpagut. Tamannali aarlerinarluinnartutut piaartumillu sumiiffimmut aaqqissummik nassataqartumik suliniuteqartoqapallannissaa pisariaqarluinnarpoq.

Ukioq kaajallallugu Qeqertarsuup tunuani silaannaq allanngorartuartarpoq, soorlumi massakkut kaperlak nalliummat taamaalerneranilu sila unerisimajunnaartarpoq. Malitsigisaanillu silaannakkut immakkullu angallanneq assorujussuaq ajornartorsiortitsilersarpoq, timmisartuararlu sapernungajuttoq kisimi inunnik angallassisutaaleraagat, umiatsiallu kisimik immakkut isumalluutaaleraangata qinikkatut akisussaaqataalluni assut iliuusissaaleqinarsisarpoq.

Ulloq mannami tikillugu Aasiaat napparsimaviannut nakorsanik amingaataalersussanik pissarsiniarnissaq pilersaarutaanersoq suli naalakkersuisuniik tusangaqarfiginngilarput, Ilulissanilu aaqqiinissaq kisimi naalakkersuisunit matumani ujartorneqartoq paasivarput.

Neriuppunga Peqqinnissamut Naalakkersuisup piaartumik ajornartorsiuterujussuup qaangerniarnissaanut salliulluni suliaqartussaanini tunngavingalugu manna piaartumik aaqqiissuteqarfiginiassagaa.

 

Inuit Ataqatigiit sinnerlugit Kommuni Qeqertalimmi ilaasortaq

Hans Aronsen

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 323 702
Fax: (+299) 321 321
Website: https://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 323702
Fax: (+299) 323232
Aningaaq: https://www.ia.gl
Email: ia@ia.gl