All.: Aqqaluaq B. Egede, politikkikkut oqaaseqartartuat, Inuit Ataqatigiit

Naalakkersuisut Siulittaasuat unioqqutitsereerpoq

Naalakkersuisut Siulittaasuata aalajangersaaqataanermini nipisaat suanniarnermi angallatini inuussutissarsiutitut attartorneqarnissamik akuersissuteqanngitsoq aningaasarsiutigisimagaa paasereerparput. Inatsisit unioqqutinneqartut namminermi erseqqipput, tassa nunanitsinni pisassiissutit pisarineqassappata aalisarnermut inatsit naapertorlugu angallatit eqqortumik nunatsinneersuunissaat eqqortumillu nalunaarsorsimanissaat piumasaqaataammata. Minnerunngitsumillu inatsisit angallatit angissusaa naapertorlugu imarsiornermut inatsit ataani piumasaqaataasut naammassineqartariaqartut pineqarput.

Aamma paasereerparput Naalakkersuisut Siulittaasuata pisumut aalajangersakkaminut attuumassuteqarpallaarluni aalajangersaaqataasimasoq, taamaalilluni aalisartorpassuit nipisaat suaannit aningaasarsiorsinnaanerat innarlerlugu imminut sullissimasoq. Inatsisiliortuuvugut inatsisiliavullu tamaavitta minitaqarata malittussaavagut. Allatut oqaatigalugu: inatsisaatsuliornerit kinguneqartinneqartariaqalerput. Naalakkersuisut Siulittaasuata inatsisaatsuliornera toqqorterunnaarlugu oqartussaaqatigiilluta ingerlatsinissamik aalajangersakkavut inatsisaasut pinngitsoorata malittussaavagut.

Taamaattumik oqaqqissaagut: Inuit Ataqatigiinniit kissaatigaarput Kukkunersiuinermut ataatsimiititaliap sulisimanerminik nalunaaruteqassasoq.

Share and Enjoy !

0Shares
0 0 0