Naalakkersuisut marluk akornanni kina eqqortumik oqaluppa?

Siulittaasup tullia politikkikkut oqaaseqartartoq: Aqqaluaq B. Egede

Inatsisartut inatsisiliortutut aalajangiuppaat Qasigiannguani aamma Nuummi erngup nukissiorfissat pilersaarusiorneqassasut sanaartorneqassasullu. Inuussutissarsiornermut Nukissiuteqarnermut Ilisimatusarnermut Suliffeqarnermullu Naalakkersuisoq Jess Svane saqqummiussaqarnikuuvoq erngup nukissiorfiliassat pillugit aningaasalersueriaasissaq ukiamut saqqummiunneqassasoq.

Arajutsisimaneqanngilaq Aningaasaqarnermut Aatsitassanullu Naalakkersuisoq Vittus Qujaukitsoq ataasiaannarani naqissusertarpaa Qasigiannguani aamma Nuummi erngup nukissiorfiliassat massakkut aningaasaqarnitsigut tunngaveqartumik eqqornerlunneqassasut. Naalakkersuisut ataatsimoorlutik aalajangiussartik erseqqissarlissuk. Naalakkersuisuni marluusuni kina eqqortumik oqaluppa? Nassuiaasoqartariaqarpoq inuiaqatigiinni paatsuunganartumik ilisimatitsisoqarmat.

Naalakkersuisoq kinaluunniit Inatsisartut aalajangigaannik allanngortiterinissaminut pisinnaatitaaffeqalersorisoq akisussaaffimminik paatsuuisimassaaq. Maanna Aningaasaqarnermut Naalakkersuisup erngup nukissiorfissai sanaartorneqartussat pillugit oqaaseqarnera aallaavigineqassappat Inatsisartut akisussaaffiannik ”arsaarinnilluni” Naalakkersuisut pisinnaatitaaffiginngisaminnik sulillutik aallartissimassapput.

Naalakkersuisut erseqqilluinnartumik nalunaaruteqartariaqarput Qasigiannguit aamma Nuup erngup nukissiorfissaasa unitsiinnarneqarsimanerat ilumut naalakkersuisut aalajangersaavigisimaneraat. Inatsisartut avaqqullugit ingerlatsisoqarsinnaanngilaq. Naalakkersuisuni pineqartuni kina eqqortumik oqaluppa?