Nuummi Qinngutsinni Namminersorlutik Oqartussat maannakkorpiaq sanaartortitsinerat iluarisimaarsinnaavarput – tamanna ukiut arlallit matuma siornali pilersaarusiorneqarlunilu aningaasaliiffigineqarsimavoq – tupannaqisorli tassaavoq maanna Namminersorlutik Oqartussat sanaartornikkut unikaallatsitsipiloorniarnerat.

Nuummi utaqqisorpassuit
Naalakkersuisut Aningaasanut Inatsisissatut siunnersuutaanni 2015 – 2018-ip tupaallaatigalugu atuarsinnaavarput, Namminersorlutik Oqartussat nutaanik inissialiorneq 26%-inik annikillisinniaraat. Ukiumut 224 mio-iniit 308 mio kr.-inut piffissami 2011 – 2014-imut, naatsorsuutigineqarluni 180 mio-niit 210 mio kr.-inut piffissami 2015 – 2018-imut. Aamma ilisimagutsigu Naalakkersuisut sinerissami sanaartorniarlutik pilersaartut, sumiiffippassuarni utaqqisoqarfiunngitsuni, pilliuteqartussarlu tassaalluni Nuuk, utaqqisorpassuarnik ajornartorsiuteqarfiusoq, tamaattoqarnera quianaannarpoq.

Qaqortumi mittarfittaasaq
Aningaasanut Inatsisissatut siunnersuummi ilaatigut takuneqarsinnaavoq, inissianik sanaartornermut aningaasaliissutissat ukiut sisamat ingerlanerini 400 million kr.-inik annikillisinniarneqartut, taakkununngalu amerlanerpaat Qaqortumi mittarfissamut nutaamut atorniarneqartut. Tassa imaappoq Naalakkersuisut Qaqortumi mittarfik, ukiorpassuarni inissaminnik utaqqisut ikilisarnissaannit pingaartinneruaat!

Illoqarfinnut nutserartoqarpoq
Kisianni Ilisimatusarfimmi misissuinerit takutippaat, inuit Kalaallit Nunaata kujataaniit nutserartut, nutsertullu Nuummut nuuttartut. Naalakkersuisut tamatta aningaasaatitsinnik pingaarnersiuinerat, siunissami nunatsinni najugaqarfiit inissisimanerannut tulluanngilaq. Misissuinerummi aamma takutippaa, annertuumik illoqarfinnut nutserartoqartoq, tamannalu atugaaleraluttuinnartoq. Tamanna aamma pissutaalluni Tasiilaq inuttusigaluttuinnarpoq.

371 mill. mittarfissamut
Tupaallannarpoq Naalakkersuisut Aningaasanut Inatsisissatut siunnersuutaanni atuarlugu, 371 million kr.-it kujataani inukilliartuinnartumi mittarfissamut atorneqartussatut aalajangiunneqarsi-manerat. Tassami nuna tamakkerlugu inissaqarniarnikkut inissisimaneq ilungersunartoq qiviassagaanni – ernumanarpoq, Qaqortumi mittarfiliorneq inuiaqatigiinni aningaasaliinertut pitsaasutut isigineqarsimappat. Ilisimaneqartutummi Paamiuni mittarfiliorneq illoqarfiup ineriartorneranut annermik iluaqutaasimanngilaq, naak innuttaasunut angallanneq pitsanngoriarsimagaluartoq.

Inissaqarnermi ajornartorsiorneq alliartorpoq
Taammaammat annertuumik kukkunerussaaq isumaqaraanni Qaqortumi mittarfittaarnikkut siunissaq ungasissoq isigalugu kujataani ineriartortoqalerumaarnissaa. Qaqortumi mittarfiliornikkut Naalakkersuisut inuiaqatigiinni aningaasarsiorneq eqqarsaatigalugu, nunap immikkoortuani kujataani piffissami sivikitsumi suliffissaqarnikkut iluaqutaasussamik pingaarnersiuipput. Kisianni mittarfiup sananeqarnera taamaalluni naammassippat, nunami tamarmi inissaqarnikkut ajornartorsiorneq mikinngitsumik annertusisimassaaq.

Pingaarnersiuinerit kukkulluinnartut
Aningaasarpassuit Naalakkersuisut inissianik nutaanik sanaartornerniit peerlugit, Qaqortumi mittarfissamut atugassatut aalajangeqqullugit siunnersuutaat, pingaarnersiuinertut kukkulluinnartutut taasariaqarpoq, taamaaliornikkummi nuna tamakkerlugu inissaqarniarneq ajorseriartittussaavaa, tamannalu ukiuni qulikkaani arlalinni aatsaat iluarsiivigineqarsinnaassaaq.

Immitsinnut pisariaqartippugut
Inissaqarniarnikkut ajornartorsiutip aaqqiiviginiarnera nunatsinni tamatta suleqataaffigisussaavarput. Tamatumani Naalakkersuisut kommunillu suleqatigiittariaqarput. Piffissanngorpoq paasissallugu immitsinnut pisariaqartinnerput. Immitsinnut illuatungeriinnata.

Inuulluaqqusillunga

Allan Pertti Frandsen, Inuit Ataqatigiit

Kommunalbestyrelse-mut ilaasortaq,
Sanarfinermut avatangiisinullu ataatsimiititaq, Kommuneqarfik Sermersooq
Timerlia 46, 3905 Nuussuaq, Greenland
Mobil +299 598755,
apfr@sermersooq.gl
www.facebook.com/ia.pertti