Naalakkersuisut Avanersuarmi immikkut iliuuseqarnissamut peqataaqqunaqaat

Naalakkersuisut Avanersuarmi immikkut iliuuseqarnissamut peqataaqqunaqaat

Meeqqat pisinnaatitaaffii pillugit isumaqatigiissutip eqquutsinneqarnissaa pillugu Qaanaami Avanersuarmilu immikkut iliuuseqarnissaq pisariaqavippoq. Inuit Ataqatigiinnit Naalakkersuisut Avannaatalu Kommuniata tamanna qulakkeerumallugu suleqatigiinnissaat pinngitsoorneqarsinnaanngitsoq isumaqarpugut, iliuuseqarnerli isumaginninnermut taamaallaat tunnganani suliassaqarfinnut tamanut tunngasariaqarpoq.

MIO-p Qaanaamiissimanerminit nalunaarutaa Inuit Ataqatigiit atuareerlutigu immikkut ittumik iliuuseqartoqartariaqarnera pisariaqarmat naqissuserumavarput. Nuannaarutigaarput MIO angalasimanerminit nalunaarusiornermini Qaanaami innuttaasut minnerunngitsumillu meeqqat oqariartuutaannik tamatsinnut apuussimmat qujavugullu MIO kingumut sulilluarnermigut aaqqiivigineqartariaqartunik qaqitsimmat.

Oqariartuutit erseqqipput. Iliuuseqartariaqarpugut ataatsimoorlutalu kivitsisariaqarpugut.

Iliuuseqarneq siammasinnersusoq, aamma angajoqqaanut

Taamaammat Kommuneqarfik Sermersuumik Tasiilaq pillugu suleqatigiissimanermut assigusumik Avanersuarmi iliuuseqarnissamut Naalakkersuisut tapersersuiniarnerminnik erseqqissumik suaaruteqartariaqartut isumaqarpugut. Suliassaqarfiit tamakkerlugit tamatumani peqataatinneqartariaqarput ataatsimoorlutalu najukkami suliniutit sorlanitsinnissaat qulakkeerniartariaqarparput. Tassunga atatillugu MIO-p Qaanaamiissimanermini najukkami inunnik nukissaqarluartunik naapitsisimanerminik aamma nalunaarmat nuannaarutigaarput. Inuit taakkua nukissallit tassaapput najukkami suliniutinik aallartinneqartunik attassinissamut tunngavissiisussat.

Maanna aamma angajoqqaat tapersersorneqarnissaminnut pisariaqartitsisut tapersersorneqarnissaat qulakkeertariaqarparput. Naleqquttunik inissaqarnissaq, assigiinngisitaartunik suliffissaqarnissaq minnerunngitsumillu siunnersorneqarnissamik pisariaqartitsisoqartillugu saaffissaqarnissaq, aamma ilaqutariittut aarlerinartorsiulinnginnermi, pisariaqarpoq.

Nunat inoqqaavisa pisinnaatitaaffii atuutilissapput

MIO-p angalanerminit nalunaarusiaani Naalagaaffiit Peqatigiit Meeqqat pisinnaatitaafii pillugit isumaqatigiissutaa kisiat innersuussutiginagu aamma Nunat inoqqaavisa pisinnaatitaaffii pillugit nalunaarut innersuussutigimmassuk immikkut maluginiarparput. Inuit Ataqatigiinnit nuannaarutigaarput kiisami Nunat inoqqaavisa pisinnaatitaaffii pillugit nalunaarut maani nunami tigussaasumik atorneqartoq takugatsigu. Nalunaarut taamatorluinnaq atugassiaavoq namminerlu nunatsinni aamma atuutilersissallugu akisussaaffigaarput, pisinnaatitaaffiit Naalagaaffiit Peqatigiit paarlersuaanni inersuaannilu nammineq ilungersuussimasavut nammineq aamma atuutilersittariaqarpavut.

Unammillernartumik inissisimanerput ilungersuullugu aaqqiivigisariaqarparput

Suliniutitta najukkani ataasiakkaani sunniuteqarluarlutik iluatsittarnissaat pillugu suliassarujussuaq siunitsinniippoq. Avanersuup, aammami Tunup, immikkut ittuuneri nassuerutigisariaqarparput, immikkut oqaaseqarnikkut kultuureqarnikkullu Kitaaniit allaanerummata. Tamanna unammillernartuuvoq ilungersuullugu iluatsittumik suliniuteqarfigineqartariaqartoq. Meeqqat angerlarsimaffiup avataanut inissinneqartillugit kultuurertik oqaatsitillu peroriartorfigisimasatik qimallugit allamut inissittuarsinnaanngilagut. Suleriaaseq ataaseq tamanut atuussinnaasutut isigiinnavissinnaanngilarput. Kultuurikkut oqaatsitigullu atukkanut naleqqussakkanik suleriaaseqalertariaqarpugut, ilitsoqqussaralugu oqaatsit atorlugit ikiorserneqarsinnaanerup pingaassusaa ilanngullugu.

Inatsisiliorneq naammanngilaq

Meeqqat pillugit inatsisitigut nukittorsaaqqammerpugut, nassuerutigisariaqarparpulli inatsisiliorneq immini naammanngimmat. Ataqatigiissakkamik aaqqissuussaanikkullu suliassaqarfinnik akimuisumik inatsisitigut kusanartumik anguniagaqarnitta najukkani piviusunngortinnissaat qulakkeertariaqarparput.

Naalakkersuisut kaammaattorpagut Avanersuarmi meeqqat ilaqutariillu pisortaqarfinniit ataqatigiissaagaanerusumik suliniuteqarnissamik suliniuteqaqqullugit tapersersorneqarnissamik ikiorneqarnissamillu pisariaqartitsisut sullineqarluarnissaat isumannaarumallugu.

Taamatuttaaq qilanaaraarput sapaatip akunnerani tulliuttumi nuna tamakkerlugu meeqqat inuusuttullu pillugit iliuusissatut pilersaarusiortoqarnissaanik siunnersuusiatta oqallisigineqalernerani partiit allat qanoq oqaasissaqarumaarnerat tusassallugu. Iliuusissatummi pilersaarusiortoqarnissaanik siunnersuusiap qiterilluinnarmagu pisortat meeqqat pisinnaatitaaffiinut tunngatillugu pisussaaffimminnik naammassinniarnissaminnut eqquutsitsinersut ersarissaavigissallugu.

MIO-p angalanerminit nalunaarusiamini erseqqissuliorneranut qujaffigaarput suleqataajumasullu tamaasa ataatsimoorluta kivitseqatigiinnissatsinnut suleqatiseraavut.

 

Sara Olsvig
Siulittaasoq, Inuit Ataqatigiit
Inatsisartut Ilaqutariinnut peqqissutsimullu ataatsimiititaliaanut ilaasortaq

 

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 323 702
Fax: (+299) 321 321
Website: https://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 323702
Fax: (+299) 323232
Aningaaq: https://www.ia.gl
Email: ia@ia.gl