Inuit Ataqatigiinnit Naalakkersuisut erseqqissumik aalisarneq pillugu politikkut nalunaaruteqarnissaannut kaammattorpavut.
Ulluni kingullerni naalakkersuisooqatigiinnit nalunaarutaasut assigiinngiiaarput. Aalisarnerup nunatsinnut pingaaruteqarluinnarnera tamatta ilisimaarigatsigu erseqqissumik, paasinartumik toqqissisimanartumillu politikkikkut ingerlanneqarnissaa inassutigaarput. Naalakkersuisooqatigiit pissaaneqarniunnerat naalakkersuinikkut ingerlatsinerlunnermik kinguneqarpoq. Eqqissiviilliorneq pilersippaat, tamannalu akuersaanngilarput.
Aalisarneq pillugu naapissinnaasariaqarpugut
Aalisarneq pillugu inatsimmik naammassinninnissamik Inatsisartuni suliaqarnissaagaluaq, Naalakkersuisunit nalunaarutigineqarnikuugaluartoq, upernaaq manna pinngitsoorpoq. paaserusupparput ukiamut Naalakkersuisut aalisarneq pillugu inatsimmik naammassinninnissamik saqqummiussaqassanersut.
Aalisarneq pillugu politikkikkut siammasissumik naapissinnaaanissaq Inuit Ataqatigiinnit pingaartipparput. Assigiinngisitaartunilli Naalakkersuisooqatigiinnit saqqummiussisaqattaartoqarnera pissutigalugu takusinnaanngilarput sumut sammiveqarlutik Naalakkersuisut siunniussaqarnersut, tamannalu inuiaqatigiinnut aalisartunullu toqqissisimananngilaq.
Aalisakkat allat sammineqarneri naak?
Apererusuppugut Naalakkersuisut qaleralinniarnermut isiginermut allanut tappingersimanersut.
Kangaatsiamut nunaqarfiinullu angalanitsinni takusinnaavarput aalisarneq pillugu erseqqissumik paasisaqarnissaq qanoq pisariaqartiginersoq. Kangaatsiap eqqaani qaleralinniarneq pingaarnertut inissisimanngilaq aalisakkalli allat aallunneqarlutik. Inuit Ataqatigiinnit naqissuserusupparput qaleralinniarneq naak pingaaruteqaraluartoq aalisakkat allat aamma sammineqarnissaat qanoq pingaaruteqartiginersoq.
Qaleralinniarnermi pissaaneqarniunneq unittariaqarpoq nunatsinnilu aalisarneq ataatsimut isigalugu ineriartortinneqartariaqarluni.
Avammut tunisaqarsinnaaneq ulorianartorsiortinneqarpoq
Piujuaannartitsineq tunngavigalugu aalisarnermik ingerlatsineq, ullumikkut siunissamilu avammut tunisaqarsinnaanissamik qulakkeerinnittussaq tamatsinnit pingaartinneqarpoq maannali tamanna aamma naalakkersuisooqatigiit akornanni pissaaneqarniunnermit ulorianartorsiortinneqarpoq.
Inuit Ataqatigiinnit piareersimavugut suleqataanissamut akissussaaqataanissamullu. Takusinnaanngilarpulli Naalakkersuisut sumut sammiveqarlutik aalisarnermut politikkeqarnersut. Naalakkersuisooqatigit ataatsimoorsinnaannginnerat toqqissisimananngilaq pissaaneqarninnerlu atorlugu aalisarnermik ingerlatsineq akuersaanngilarput.
Nutaaliornissamut isumatusaarnissamullu piffissanngorpoq.
Inuit Ataqatigiit siulittaasuat
Sara Olsvig