Inuusuttut Ataqatigiit nuannaarutigaat partiit assigiinngitsut pingasut taasisitsinissamut tunngasunik Inatsisartuni siunnersuuteqartoqarnera. Tamanna ersarilluinnartumik takussutissaavoq nunatsinni uranisiortoqarsinnaaneranut apeqqut qanoq politikkikkut pingaaruteqarluinnartigineranik. Taamatullu partiit pingasut siunnersuuteqarneratigut erserpoq qanoq aatsitassanik qinngornernit ulorianartunik akulinnut tunngasunik eqqartuisoqarnissaa suli pisariaqartoq.

Inuusuttut Ataqatigiinni naalakkersuisooqatigiit isumaqatigiissutaat qimerluuataarsimavarput, naalakkersuisooqatigiinnermullu isumaqatigiissutiminni uraneqassusermut tunngasumik killiliussinissamik suliaqarnissaminnik isumaqatigiissuteqarsimapput. Tamanna isumaqarpoq naalakkersuiusooqatigiit naammaginngikkaat nunarput qinngornernut ulorianartunut politikkeqannginnerat. Taamaattumik apererusunnarpoq naalakkersuisooqatigiit qaqugu qinngornernut ulorianartunut killiliussisumik siunnersuuteqarniarniarnersut? Qaqugulu tamatumani apeqqummi naalakkersuiusut innuttaasunik peqataatitsissava? Naalakkersuisooqatigiit 2014-mi decemberip sisamaaniilli atuussimapput ulloq mannali tikillugu naalakkersuisooqatigiinni killiliussinissamut isumaqatigiissutik suli piviusunngortissimanngilaat taamaakkaluartorli naalagaaffimmut pakasarluta qinngornerit ulorianartut annissuunnissaannut isumaqatiginninniareersimapput. Taamaattumik inissaminiippoq naalakkersuisut aperissallugit sooruna innuttaasut taasitinneqarnissaat taama ajornakusoortigisoq? Imaannerpa Naalakkersuisut Kuannersuarnut aningaasaliisussat aningaasaliiumajunnaarnissaanut ersissuteqaramik? Tamanna tunngavilersuutigissagunikku taava isumaqarpoq aningaasaliisussat innuttaasut peqataatinneqarnissaanniit salliutikkaat.

Inuusuttut Ataqatigiit naammaginngilarput nunatta qinngornernut ulorianartunut politikkeqannginnera, taamaattumik kissaatigaarput aatsitassanut inatsimmi immikkoortumik qinngornernut uloriaqartunut tunngasumik inatsiseqartariaqartoq. Inuusuttut Ataqatigiit inuit taasitinneqarnissaat kissaatigaarput taamaattumillu Naalakkersuiusut kajumissaarpavut taasititsinissaq akuereqqullugu namminermi aamma killiliinissaq kissaatigimmassuk.

Inuusuttut Ataqatigiit sinnerlugit

Jane P. Lantz Inuusuttut Ataqatgiiit siulittaasuata Tullia