Naalakkersuinikkut aqutsineq siorasaarneqarmermit aqunneqanngitsoq

Qinesinerup kingulliup kingorna Naalakkersuisut amerlanerussuteqarnissamut suliniartarnerat ajornartorsiorfiusoq takuarput. Naalakkersooqatigiit tapersorsortaanniillu piumasaq pinngikkaanni tapersersuiunnaarniarluni siorasaarutit akuttunngitsumik nalaattarpagut. Qaavatigullu innuttaasut kaasarfiiniit aallertaqattaarnerit pissutsit taakku qaavisigut toqqissisimajunnaartitsipput.

Naalakkersuisunikkut suleqataaniarnerup ulluinnarni atugassarititarilersimasai tassa tamakkuupput. Nunatsinnilu aqutsisuusut aalajangiiniarnermil isummanik nikisitseqattaartarnerat nalinginnaavoq. Tamanna sammisani aalajangersimasuni takusaqattaarparput, assersuutissaqqissoq kingulleq tassaalluni Tunngaviusumik Inatsisissamut Isumalioqatigiissitamut tunngasumut isummanik allanngortitsinerit.

Tassani Naalakkersuisooqatigiit Demokraatillu qinikkat akissarsiamik qaavisigut akissarsiaqartitsinissaanik isumaqatigiissutertik akerlerineqalertoq takullugu issariarneq kingulleq atorlugu utertimmasuk.

Politikkikkut suliaqarnermi suleriuseq taanna akuerineqarluni atuutiinnartussaasutut Inuit Ataqatigiit isiginngilaat. Isumaqarpugut suleriuseq atorneqartoq siunissamut ungasinnerusumut takorluugaqannginnermik tikkuussisisinnaassuseqannginnermillu ersersitsisoq. 

Qulakkeerusupparput ukiuni aggersuni tamakkiisumik aaqqiinani tuaviortumik aaqqeeriartarneq unitsillugu, pissutsit tamakkiisumik isigalugit aaqqiissuussaanikkut aaqqissuusseqqinnissaq pisariaqavippoq. Nunatta aaqqissuussaaneranut inuillu ulluinnarni atugaasa pitsanngorsaaviginissaat aatsaat taamaaliornikkut ilorraap tungaanut saatsinneqarsinnaammata.

Ukiaq manna pissutsit ersarissut takutippaat, nunatta naalakkersuinikkut aqunneqarnermigut ajornartorsiuissornera. Aallaat siorasaarinerit aqqutigalugit amerlanerussuteqarnissaq aatsaat qulakkeerneqartarluni. Killiliisoqartariaqalerpoq, nunarput siorasaarineq, matoqqaneq naalakkersuinerlunnerlu tunngavigalugit aqunneqarpat annaasaqartussat tassaapput inuiaqatigiit.

Siorasaaraluni pissaanermiinniinnarneq taarserneqartariaqalerpoq, inuiaat kalaallit ullumi siunissamilu neriuummik peqalersinnerannik.

Taamatut ingerlaaseqarneq ulluinnarsiutinngortinneqassanngilaq, tamanna inuiaqatigiit qinersinerminni kissaatiginngilaat. Kissaatigivarput nunarput toqqissisimanartoq inuuffigiuminartorlu.

Múte Bourup Egede

Siulittaasoq, Inuit Ataqatigiit