Mute Bourup Egede kaammattorpara Inuit Ataqatigiit siulittaasuattut sassaqqullugu

 Mute Bourup Egede kaammattorpara Inuit Ataqatigiit siulittaasuattut sassaqqullugu

Piffissap ingerlanerani inuppassuit kaammattortarsimavaannga Inuit Ataqatigiinni siulittaasutut sassaqqullunga. Inuit tatiginninnerat qujassutigaara.

Taamatullu inissinnissannut piffissaanngimmat nalunaarutigaara.

Partiimi ingerlatsinermi siulittaasup nukittuumik sanileqarnissaa pingaarutilerujussuuvoq. Inuit Ataqatigiinnilu aamma tamanna pingaaruteqarpoq, aamma ulluinnarni aqutsinermi. Siulittaasunngortussaq kinaagaluarpalluunniit politikkikkut aamma Inatsisiliornikkut Inuit Ataqatigiit naalakkersuinikkut ingerlanera Siulittaasup tulliatut atuunnera massakkumut iluarisimaarpara.

Inuit Ataqatigiinni siulittaasup tulliatut inissisimaninni partiitta naalakkersuinikkut ingerlanerata patajaatsumik pitsaassuseqarluartumillu ingerlanneqarnissaa akisussaaffigaara. Akisussaaffik ulloq manna tikillugu iluarisimaakkannik ingerlasutut nalilerusuppara attakkusullugulu.

Taamatut aalajangerninnut aamma patsisaaqataavoq massakkut meeqqakka kisimeeqatigigakkit. Meeqqakkalu politikkimi suliaqarnerma saniatigut piffissaqarfiginissaat uannut pingaaruteqarpoq. Allatut oqaatigalugu Inuit Ataqatigiit siulittaasuattut sassarnissara uannut piffissaanngilaq.

Inuit Ataqatigiinni siulittaasunngoqqullunga tatiginnittut, kaammattuisut, akisussaaffimmillu tiguseqqusisut saaffiginnittartut tusaavakka, qujavungalu tatiginninnermik angisuumik ersersitsinerannut. Oqaatigiinnarsinnaavara Inuit Ataqatigiinni sulinera qasukkartinnagu ingerlaqqinnissara siunertaammat.

Oqareernittuut Inuit Ataqatigiit Siulittaasussaattut sassaqqullugu kaammattorpara Múte Bourup Egede. Pisariaqarmat Inuit Ataqatigiinni siulittaasup naalakkersuinikkut sunniuteqarluarsinnaasumik, akisinnaasumik, aqutsinikkullu siunnerfinnik nutaanik nassaarniallaqqissuseqarnermik pigisaqarnissaa. Siulittaasuuneq sungiusarfittut atornagu misilittakkatigut inerisimassuseqarnissamik piumasaqaateqarpoq.

Isumaqarpungalu Mute Bourup Egede-ip tamanna isumannaarsinnaagaa.

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 323 702
Fax: (+299) 321 321
Website: https://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 323702
Fax: (+299) 323232
Aningaaq: https://www.ia.gl
Email: ia@ia.gl