Mùte B. Egede siullittaasunngornermini oqalugiaataa

Ikinngutit

Siullermik tamassinnut qujarusuppunga, partiip siuttussaattut – akisussaaffimmut annertuumut tatigalunga tunuliaqutserassinnga.

Inuiaqatigiit naalakkersuinikkut ingerlanneqarneranni, partiitta akisussaaqataasutut anguniagaqartutullu ingerlaqqinnissaanut nukittunerulernissaanullu siuttuunissannut piareersimanera maanna suaarutigaara.

Parteerput Inuit Ataqatigiit ukiut foorut matuma siorna kattuffittut pilersinneqarpoq.

Inuit – inuusuttut – nunaminnut oqartussaaqataarusuttut nunarsuarmioqataasutullu akisussaaqataarusuttut partiitsinnik pilersitsipput.

Ullumi taakku aamma peqatigaavut.

Qujanaq – ulloq manna tikillugu ingiaqatigigatsigut, minnerunngitsumillu pisariaqartitsinitsinni saaffissaajuarassi.

Manna iluatsillugu inuit partiitta pilersinneqarnerani ingerlanneqarneranilu suleqataasimasut tamaasa qutsavigerusuppakka, ilissi partiitta nunatta aqunneqarnerani avaqqunneqarsinnaanngitsutut inissisimaneranut tunngaviliisuuvusi. Tamassinnut qujanaq.

Eqqarsaatit pigisakka politikitsinnut nunatsinnullu tunngasut oqaatigilaarusuppakka.

Inuiaqatigiittut ingerlariarnissatsinni toraagassatsinnik anguniagassatsinnillu qulinik tikkuusserusuppunga:

  1. Siunertaajuassaaq kalaallit namminiilivinnissarput – Tamannalu peqataatitsiffiusumik, isumatusaarluta akisussaassuseqartumillu sulinikkut angussavarput.
  2. Inuiaqatigiittut inuunerluutit atukkagut inunnut kingunerluttaqisut: kinguaassiutitigut atornerluisarnerit, sumiginnaanerit, imigassamik atornerluineq – Tassa, killilertariaqarpagut.
  3. Qulakkiissavarput meerartatta inuusuttattalu pitsaasunik toqqissisimanartumillu avatangiiseqarlutik inuuneqarnissaat. Tamarmik angusaqarluarlutik atuarnissaat ilinniarnissaallu tassuuna toqqammavississagatsigu. Periarfissittariaqarpagullu pingaarnertut kalaallisut qallunaatulluunniit oqaaseqartut ilinniarsinnaanissaat.  Nunattami siunissaanut aalajangiisuulluinnarpoq, kinaluunniit nunami maani periarfissaqartinneqassasoq. Nunatsinni kialluunniit inissaqartinneqanngitsutut misiginngisaannarnissaa timitalissavarput – Tamatta nunatsinni naleqartinneqartutut kivitseqataasutullu misigissaagut.
  4. Inuiaqatigiit pilersissavagut, inuusuttatta nunatta avataani ilinniariarsimasut angerlarfigalugu kivitseqataaffigiumasaat. Inuiaqatigiit neriunnermik, periarfissaqarnerminnik siunissaqarnerminnillu misigisut. Aamma utoqqartatta utoqqaliffigissallugu nunagiumasaannik.
  5. Nunami isorartuumi inuttoorsuunngitsumi nunaqarpugut. Avissaartuugata ataatsimoortariaqarpugut – ataatsimooraangattami sunaluunniit angusinnaasarparput. Nunatta kangianeerutta, kujataaneerutta, kitaaneerutta avannaaninngaanneeruttalu tamatta nunaqqatigiippugut – Tamatta atorfissaqartinneqarpugut.
  6. Inuussutissarsiortortatta atugaat peqatigalugit pitsanngorsassavagut. Aningaasarsiornerput nukittunerulersillugulu inuiattut atugarissaarnerput annerusoq taamaaliornikkut pilerisassagatsig. Tassani aalisarneq, piniarneq, takornariaqarneq inuussutissarsiutillullumi allat tamarmik pineqarput.
  7. Kulturilerisortatta pinngorartitsisortattalu atugaat suli pitsaanerulersissavagut. Tassaniimmat assigiinngisitaaraluarluta ataatsimoornitsinnik misigisarnerput. Pinngorartitsisortagut timersortartugullu nunatsinni nunattalumi avataani tunniussassaqaqaat – Piginnaasaat atorluarniartigit.
  8. Alakkaamasuusariaqarlutalu iliuuseqarumasuusariaqarpugut – Nunatsinniinnaanngitsoq nunarsuullu sinneranut aamma. Nunarsuarmioqataavugummi.
  9. Sapiissuseqartariaqarpugut aaliangiisinnaassuseqartariaqarlutalu. Ineriartornermi nammineq sunniuteqarfigilluassagutsigu – avatitsiniillu pisut kisimik aqunneqalissanngippata – uaguuvoq iliuuseqartussat timitaliisussallu. Nunatut siuariartornitsinnut, inuussutissarsiutit inerisarnissaat qitiuvoq politikkittalu tassani ersarinnerulernissaa pisariaqarpoq. Sulisartummi suliffissaat ataavartut aamma tassaniimmata.
  10. Tamat oqartussaaqataanerat nukittunerulersissavarput. Tamavitta aaliangeeqataasinnaanerput, peqataarusussuseqarluta sunniuteqarsinnaanerput annerulertariaqarpoq. Oqalliseriaaserpullu torernerulertariaqarluni. Ilavut, inoqativut uagut qanoq pineqarusunnitsitulli kiinnerfigisassavagut.

Taamatut tunngaveqartunik inuiaqatigiit ataatsimoorluta pilersissagigut isumaqarpunga.

Ullumikkummi politikkikkut aqutseriaaseq ingerlatseriaaserlu allanngortariaqarpoq. Innuttaasut tikillugit peqataatillugillu ingerlatsisoqartariaqalermat.

Nunatsinni amerlasoorsuunngilagut – Ataatsimoortariaqarpugut. Nammaqatigiittariaqarpugut. Naligiittut immitsinnut pisariaqarpugut. Ataqqeqatigiittariaqarpugut.

Avaqqussinnaangilarpullu suleqatigiittariaqarnerput.

Nukigut kivitseqatigiilluta, inuiattut ilorraap tungaanut ineriartornissatsinnut atorniartigit, tamanut iluaqutissanngorlugit

Naqissuserlugu nunarput tamaat oqariartorfigerusuppara: Nuna tamarmiusoq, innuttaasullu sumiluunniit najugaqarunik siuariartorneq misigissagaat Inuit Ataqatigiit anguniartuassammassuk.

Naqissuserumavaraattaaq uannut pingaarluinnartoq: Isorliunerusuniikkutta, inoqarfinni minnerusuneerutta illoqarfissuarmiuuguttaluunniit tamatta immitsinnut pisariaqartikkatta. Illua-tungeriinngilagut, siuariartornerput tamatta pisariaqartipparput. Ataatsimoorutta atugarissaarnerulernissarput qaninnerujuassaaq.

Tamattami kinguaatta uagullumi siunissaat qamaasuussasoq ajunnginnerpaassasorlu kissaatigaarput. Uagutuaavorlu ataatsimoorluta taassuminga pilersitsisinnaasut.

Nunarput ataasiuvoq. Piffiit arlaanni ineriartorneq unikaallappat piffinnut allanut sunniinerluttussaavoq. Illua-tungaanili piffiit ilaanni iluatsittoqarpat piffinnut allanut sunniuteqarluartussaalluni. Tamatsinnut iluaqutaasumik.

Ataatsimoorpugut, ikinngutigiippugut, ilaqutariippugut, suleqatigiippugut – Nukissaqaqaagut sapinngilagut.

Inuit Ataqatigiit qulaani taasakka siuttuuffigissagigut isumaqarpunga – Iliuuseqarnitsigut takutitsigu ataatsimoornerup suleqatigiinnerullu qanoq inerititaqarluartarnera.

Kissaateqarfigaassilu tulliani Nunaqarfinni aqutsisunut, Kommunimut, Folketingimut Inatsisartunullu qinersinermi takuteqqissagipput partiitut ataatsimoornerput.

Takorluugaqarnerput, piviusorsiortuunerput, isumatusaartuunerput, sapiissuuseqarnerput – Suleqateqarsinnaanerput, nunatta suli ineriartoqqinnissaanut toqqammavissiisussanik.

Inuiaqatigiinni politikki inerititaqarfiusumik timitaliiffiusinnaasoq upperineqalersissallugu pisussaaffeqarpugut.

Nunarpummi ullumerniit inuuffigiuminarnerusoq innuttaqqortunerusorlu angutserlugu ullut tamarluinnaasa sulisariaqarpugut. Ullumi, aqagu siunissamilu atugarissaarnitsinnik qulakkeerinnittussamik.

Suleqatigiilluta peqatigiillutalu tamanna angussavarput. Tamat oqartussaanerat ineriartortillugu, sulianut piginneqataasutut innuttaasut misigitillugit akisussaaqatigiilluta sulissaagut.

Qinikkat kisimik tamanna suliarissanngilaat. Anguniakkagummi angutserlugit sulinitsinni tamarluinnatta kivitseqatigiittariaqarpugut.

Tassa politikkip tunngavippiaasa ilaat – Inuiaqatigiit ineriartorluartut pilersissallugit.

Kissaatigeqaaralu Inuit Ataqatigiit ataatsimoorluarnitsigut, qanimut angusaqarusussuseqarluta suleqatigiinnerput nangissagipput.

Partiitsinni tamavitta pisariaqartinneqarpugut. Nukerujussuarmik peqarpugut, ilisimasanik ulikkaarpugut, misilittagarujussuaq ataatsimut pigaarput.

Borgmesteriutitavut, qinigaativut, suleqataasusi tunuliaqutaasusilu tamassi. Tulluusimaarutigeqaara parteeqatigigassi suleqatigalusilu.

Inuiaqatigiinni allanngueqataarusussuseqarlusi kivitseqataajumallusilu ullut tamarluinnaasa kiffartuussilluarnersinnut qujaffigiumavassi. Assigiinngisitaarnerput nukigiuartigu – Siunissatta ilusilersornerani.

Suleqatigiilluarnitsigut – Partiitsinni piginnaasagut, ilisimasagut, piumassuserput, sapiissuserput – Anguniakkagut, neriuuteqarlutalu nunatta siunissaanut upperinninnerput – Tassaapput timitalimmik inuiaqatigiinni sunniuteqarluartumik sulinissatta toqqammavissaat.

Inuit Ataqatigiit piareersimavugut aamma uanga piareersimavunga nunatsinni akisussaaffimmik annertuumik tigusinissannut.

Asaqisannik paneerannguaqarpunga.

Angajoqqaat allat assigalugit meeqqannut tamanik ajunnginnerpaamik kissaateqarpunga.

Kissaatigaara toqqissisimalluni peroriartussasoq.

Inerikkiartussasoq pitsaasumik, inuunerminilu nalaataqarnerlunnermiit nalaataqarluarnerunissaa qamanngavik kissaatigalugu.

Angajoqqaatut panitta siunissaanut neriuuteqarpugut isumakuluuteqarlutali aamma.

Neriunnerli annerungaarpoq!

Nalunngilarali aamma pitsaanerpaamik inuuneqarnissaanut piumassuseqarneq neriuuteqarnerlu kisimik naammanngitsut.

Iliuuseqartariaqarpugummi.

Taamaammallu ullumikkut maaniippunga – Inuit Ataqatigiit siulittaasuattut qinigaarlaallunga.

Neriuuteqarama nalunaguli aamma iliuuseqarnikkut sulinikkullu timitaliisariaqartugut.

Paninnguamami siunissaa neriunnerinnarmik kisimi toqqammaveqarsinnaanngimmat. Ataatatummi angajoqqaatullu siunissagissaarnissaanut, inuiaqatigiit pitsaanerpaajunissaannut kivitseqataallunga sunniuteqarnissara pisariaqarmat.

Tamannalumi peqatigalusi timitalissavara.

Panimma nunatsinnilu meeqqat tamarmik siunissaat pillugu.

Inuit Ataqatigiit pisussaaffeqarpugut, annertoorujussuarmik akisussaaffeqarpugut – Nunarput inuilu siuariartissallugit.

Aallartinnittuulli tamassi qutsavigeqqikkusuppassi. Maniguuppunga sulinissannullu piareersimangaarpunga, siuttuuffigissallusi.

Qilanaaraara ullut tamarluinnaasa – Inuit Ataqatigiit siulersussallugit, nunarput inuilu kiffartuutissallugit – Siuttuuffigissagipput siunissaq nunatsinnut qaamanerusoq.

Aap, inuusuuppunga tamannali aporfittut isiginagu nukittut isigaara. Piffiimmi nutaat inuusuit sapiissusaannik iliuuseqarusussusaannillu aamma pisariaqartitsimmata. Soorlu ukiut 40-t matuma siorna partiitta pilersinneqarnerani taamaassimasoq. Ullorlu manna tikillugu partiitsinnit pingaartinneqarsimasoq.

Kialuunniit kisimiilluni inuiaqatigiit kivissinnaanngilai ataatsimooruttali angusassaqaqaagut.

Piginnaasakka ilisimasakkalu tamaasa atorlugit anguniassavara nunatsinni Inuit Ataqatigiinnilu ataatsimoorneq.

Siuttuulernermalu aallaqqaataaniit takuneqarlunilu malugineqassaaq sineriammi innuttaasut tikillugit tusaallugillu ingerlatsinitsinni peqataatinneqalernerat.

Inuiaammi nuna pigissavaat isummanillu sanarfisassaraat.

 

 

 

 

 

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 323 702
Fax: (+299) 321 321
Website: https://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 323702
Fax: (+299) 323232
Aningaaq: https://www.ia.gl
Email: ia@ia.gl