Mittarfissanik pilersaarut Naalakkersuisut nakkutigisimanngilaat

Nunarsuarmi sumiluunniit mittarfimmik sanaartortut sanaartornissamillu ilisimasallit tamarmik anguniartarpaat mittarfissat immikkut sillimaniarnikkut akuersissuteqarfigineqannginnissaat. Tamanna nunatsinni mittarfissani akisoqisuni isiginiarneqarsimagunanngilaq. Nummi mittarfissaq aningaasarpassuarnik nalilik siunissami angallattut sillimaniarnikkut piumasaqaatiniit appasinnerusumik atugassaqartitaanissaat pilersaarummi ilaasimanera assut tupaallaatigaara.

Siusinnerusukkut Naalakkersuisut aamma Kalaallit Airport A/S-ip saqqummiuttagaat naapertorlugit mittarfissat sillimaniarnikkut pitsaasuunissaat neriorsuutigineqartarpoq. Tassa imaappoq sillimaniarneq salliutikkumallugu immikkut akuersissutit pinngitsoortinneqarnissaat oqaasiinaasimapput? Massakkummi tusagassiutitigut ullaaq tusarparput Nuummi mittarfissaq sanimut annertussutsimigut immikkut akuersissuteqarnissaa naatsorsuutigalugu pilersaarusiorneqarsimasoq. Tassa imaappoq sillimaniarnikkut piumasaqaatit nunani tamalaani atorneqartut naapertorlugit mittarfissaq suliarineqarsimanngilaq.

Mittarfissaq akisooq pitsaasuusariaqarpoq aamma inuit siunissami angallattut sillimaniarnikkut nunani tamalaani atorneqartunit piumasaqaatit naapertorlugit angallanneqartariaqarput. Mittarfissat nutaat nunatsinni mittarfiliortarnerni kukkussutaasimasut uteqqinnagit suliaasariaqarput. Naalakkersuisut suliap pitsaasumik sillimaniarnikkullu piumasaqaatit malillugit ingerlatsisoqarnissaa qulakkeersimanngilaat.  Suliaq isertuusaaqisoq ullormiit ullormut tupaallannartunik aqqusaagaqarfiusimaqisoq suli tupaallannartunik nutaarsiassarsiffigisarparput. Pilersaarummik taamak annertutigisumik Naalakkersuinikkut peqqissaarussisoqannginnera assut aggornarpoq.

Aningaasaatigut atorneqarpata pitsaassutsimik qaffasissumik qulakkeerinniffiullik

Inuiaqatigiittut aningaasarpassuarnik akiliitinneqarpugut, aningaasarpassuit atorlugit inuit angallattulluunniit sillimaniarnikkut illersorneqarnerat akissaqarfigisimanngikkutsigu taava qanoq ililluta nunatsinni ineriartorneq pitsaasoq pilersissagatsigu? Tassami mittarfissat immikkut akuersissutillit pingaartumik mittarfissaq Nuummi sanimut takissusissaa naammanngippak tikikkuminassuseq akilersinnaassuserlu pitsaanerpaaffissaminiinngillat. Suliat kukkusaq akisussaaffigineqartariaqarpoq aamma Naalakkersuisuniit. Oqaatsit kusanartut sulianik tukattunik malitseqartuarnerat akuerineqarsinnaanngilaq.

Sooq qangali paasineqanngila Nuummi mittarfissaq amippallaartoq? Sooq qangali pilersaarut isertuunnagu saqqummiunneqarsimanngilaq? Naalakkersuisut minnerpaamillu Naalakkersuisut Siulittaasuat erseqqilluinnartumik nassuiaasariaqarput. Ulloq manna tikillugu pilersaarut akisooq massakkullu paasivarput pilersaarut pitsaasuunngitsoq pillugu minnerpaamilluunniit Aningaasaqarnermut Akileraartarnermullu ataatsimiititaliaq ilisimatinneqarnikuunngilaq. Naalakkersuisooqatigiit suleqataasalu ileqqortik malillugu mittarfissat pillugit suliaq suli isertuussillutik ingerlappaat. Tamanna akuerineqarsinnaanngilaq. Uangami nammineq Aningaasaqarnermut ataatsimiititaliami ilaasortaavunga ilisimatinneqarnikuunngisaannarpugut immikkut akuersissuteqarnissamut tunngasumik.

Kalaallit Airport A/S kisimi pilersaarummut akisuumut kukkusamut akisussaatinneqarsinnaanngilaq. Naalakkersuisut Siulittaasuat politikkikkut akisussaaffimmik tigusilluni kinguneqartitsisariaqarpoq. Politikkerit atorfilittanik pisuutitsiinnarsinnaanngillat. Tamanna Naalakkersuisut Siulittaasuata kinguneqartittariaqarpaa, pilersaarut annertooq politikkikkut najummineqartussaavoq. Taamak akisussaassuseqanngitsigisumik aqutsisoqarsimanera akuerineqarsinnaanngilluinnarpoq.

Inuit Ataqatigiit

Politikkikkut oqaaseqartartuat

Aqqaluaq B. Egede