Suliffeqarfeqarneq naligiissitaanermut aamma tunngavoq, taamaammat suliffeqarfeqarnerup iluani erninermi meerartaarnermilu sulinngiffeqarnissamut pisinnaatitaaffiit naligiinnginnerat aaqqissavarput.

Ilaqutariit amerlavallaartut meerartaarnerminni aningaasaqarnikkut unamminartorsiulersarput, kikkut tamarmik meerartaarnermi sulinngiffeqarnerup nalaani akissarsiaqarnissaminnut pisinnaatitaaffeqannginnerat peqqutaalluni.

Ilaqutariuttut inuunissaq tamanut periarfissaassaaq. Anaanaq ataatarluunniit suliffeqarnermi ulapittuugaluarunik ilaqutariiussutsimut piffissaqartinneqassapput.

Taamaammat kikkut tamarmik meerartaarnermi sulinngiffeqarnerup nalaani akissarsiaqarnissaminnut pisinnaatitaaffeqarnissaat siulliullugu qulakkiissavarput. Arnat ukioqqortussutsimikkut meerartaarnissamut qanittut suliffeqarfinnit itigartitaasinnaasarput.

Tamanna Nunatsinni atugaassanngilaq. Suliffeqarfeqarnerup aaqqissugaanerani sulinerup sivisussusaa atukkallu tungaatigut ilaqutariiussutsimut tulluussarneratigut kajumissuseqarnerulersitsissaagut, assersuutigalugu piffissap ilaannaa nikerartumilluunniit piffissalersugaasumik sulinissamut periarfissat annertusinerisigut. Kingullertut meerartaarnermi sulinngiffeqarnerup sivikippallaarnera aaqqiissuteqarfigiumavarput.

Sivisunerusumik meerartaarnermi sulinngiffeqarsinnaaneq toqqissisimanartumik inuunerup aallartinnissaanut aqqutissiussissaaq.

Anguniakkat uku sisamaasut ataatsimoorunnissaannut qaaqqusivugut:

  • Erninermi meerartaarnermilu sulinngiffeqarnissamut aningaasaateqarfimmik pilersitsineq – kikkut tamarmik suliffillit sulinngiffeqarnerup nalaani akissarsiaqaannarnissaannut qulakkeerinnikkumalluta
  • Ataatat meerartaarnermi immikkut sulinngiffeqartarnissaat – angerlarsimaffimmi suliffeqarfimmilu naligiissitaaneq pillugu
  • Suliffeqarfeqarnermi ilaqutariinnut politikkeqarnissaq – sulisartut sulisitsisullu kattuffii suleqatigalugit
  • Erninermi meerartaarnermilu sulinngiffeqartarnerup sapaatip akunnerinik qulinik sivitsornissaa

Ataataasunik meerartaarnermi sulinngiffeqarnerulersitsineq inuiaqatigiinnut ileqqaarinertut pitsaasutut Inuit Ataqatigiinnit isigineqarpoq. Meeqqamut peqqinnassaaq, tassami anaanap ataatallu asanninnerat, isumassuinerat, toqqissisimanerat attaveqarfigilluarnerallu pisinnaappat inuuneq aallartilluassaaq.

Aappariinnermut aamma peqqinnartuussasoq isumaqarpugut. Sungiussiniarneq, attaveqatigiinneruneq ikioqatigiinnerunerlu ilaqutariinngorlaatut sulinngiffeqarneruneq aallartilluarnerulersitsissasoq qularinngilarput.

Múte Bourup Egede, Inuit Ataqatigiit