Inuit Ataqatigiit erseqqissumik oqariartuutissaqarpugut: Ukiut tamaasa meeqqat ukiorissavaat. Ukioq manna Meeqqat Ulluanni taama erseqqitsigisumik oqaaseqassaagut. Meeqqavummi ullut tamaasa, ukioq naallugu piffissarlu tamaat isumassussavagut inersimasuusugullu akisussaaffigissavagut. Meeqqavut pitsaasumik pigutsigit Nunatut siunissarput aamma qaamasuussaaq.

Naligiinnginneq akiorneqassaaq

Nunatsinni meeqqavut assigiinngisitaartuupput. Atukkat assigiinngitsuupput naligiinnginnerlu annertulluni. Inuit Ataqatigiit isumaqarpugut nunatsinni inuttut atukkatigut naligiinnginneq tassaasoq inuiaqatigiittut akiugassatta annersaat ilaat. Angajoqqaat akissaatitigut inuuniarnermikkullu atukkatigut naligiinnerulernissaannik sulissuteqarneq ataatsimooruttariaqarparput.

Nalunngilarput ullumikkut illoqarfissuarmiuppat nunaqarfiit ilaanniuppalluunniit inoqateqartugut akissaatitigut ima artornartigisumik inissisimasoqartoq allaat meeqqaminnik isumaginnissinnaanerat killeqarluni. Inuiaqatigiinni atukkatigullu isumassoqatigiinneq annertunerulertariaqarpoq artornartunillu atugaqartunik illersuineq kivitseqatigiinnerlu annertusartariaqarluni.

Assigiinngisitaarneq kultuuritsinnut ilaavoq

Naligiinnerulernissamik suliaqarneq assigiissusermik ujarlernertut paarlaanneqassanngilaq. Meeqqammi inersimasutuulli assigiinngitsigaat. Meeqqat ilai nipaatsuupput, ilai assassullaqqissuullutik allallu atuagarsornermut nukittunerullutik. Meeqqat illoqarfinni minnerni nunaqarfinnilu peroriartortut meeqqatut illoqarfissuarni peroriartortutut naleqartigipput, naak atukkat ulluinnarnilu sammisat assigiinngitsuugaluartut.

Meeqqavut inuttut assigiinngitsuugaluarluta naligiinnitsinnik ilinniartsitsigit.

Ataqqeqatigiinneq meeraanermit tunngavilerneqartarpoq

Taamatuttaaq meeqqat inersimasutuulli oqaatsitigut kultuurikkullu tunuliaqutarisaat assigiinngitsuupput. Meeqqat kalaallisut ilitsoqqussaralugu oqaasillit meeqqallu allanik ilitsoqqussaralugu oqaasillit naligiipput. Ulluinnarni suliassarput tassaavoq meeqqatsinnik maligassiuinissaq, kalaallisut ilinniarnissamut periarfissiilluarnissaq, meeqqanilli allanik oqaasilinnik ajattuinata.

Inersimasut akornatsinni kinaassutsimik eqqartueriaaserput meeqqatsinnit kingornunneqartarpoq atorneqalertarlunilu. Assigiinngisitaarnermik inissaqartitsineq, naligiimmik inuttut naleqartitsineq, kinaassutsikkullu nukittuumik inissisimanissamut aqqutissiuussinissaq tamatta akisussaaffigaarput.

Meeqqat ataqqeqatigiinnermik tunngaveqarunik aamma nukittunerussapput.

Pilluaritsi

Inuit Ataqatigiit meeqqat Meeqqat Ulluanni pilluaqqungaarpavut. Neriuppugut ulloq nuannisarfigalugu atorluassagissi.

Ukiut tamaasa meeqqat ukiorissavaat, suliassarpummi naassaanngitsuuvoq unitsinneqanngisaannartussaq.

 

Sara Olsvig

Siulittaasoq, Inuit Ataqatigiit