Allattoq: Aqqa Sumuelsen, Isumaginninnermut meeqqallu pillugit oqaaseqartartoq.

Meeqqat Ulluat 1. juni 2019: Tamatta katersuutta.

Siullermik meerannguit tamaavissi Meeqqat Ulluanni pilluaritsi. Tamatta Meeqqat Ulluanni nuannaaqatigissavatsigit.

Meeqqat Ulluat nunarsuarmioqataasunut tamatsinnut, inuiannilu tamani meeqqanut atugassarititaasut inuiaqatigiinnilu illersugaanerat pillugit ullut tamaasa pitsanngorsaanissamut inuiaqatigiittut ikioqatigiittariaqarpugut.

Ulluni makkunani inuiaqatigiit akornanni aammalu pingaartumik tusagassiutitigut meeqqat sammineqangaatsiarput. Meeqqanik kinguaassiutitigut atornerluisarnerup annertunerujussua taamalu inuppassuarnik imaannanngeqisumik kalluaanera kalluaasarneralu eqqarsaatigalugu, pisariaqalersippaa immitsinnut aperinissatsinnut inuiaqatigiittut ajornartoornertut inissisimalersimasugut nassuerutigisariaqaleripput. Meeqqat inuunerminni artukkerneqarujussuartarnerat pissutigalugu inuiaqatigiittut oqartariaqalerpugut “meeqqanik sumiginnaasarnerit kinguaassiutitigullu atornerluisarnerit tassa tassunga killittariaqalerput”.

Meeqqat asanninnermik toqqissisimasumillu inuiaqatigiinni misigisimallutik inooqataanissaat pingaaruteqarpoq. Meeqqanut atugassarititaasut pineqartillugit arlalitsigut angajoqqaat inersimasullu eqqarsaatigineqarpallaarneq ajorput. Taamaattoqarnera pissutsit pitsaasup tungaanut sakkiartunnginnerannut pissutaaqataasinnaasut ilagisinnaavaat. Taamaattumik meeqqat sumiginnagaasarnerat kinguaassiutitigullu atornerlunneqartarnerat aaqqiiviginiarneqassappat angajoqqaat inersimasullu peqatigalugit siunissamut siunnerfilimmik iliuusissatut pilersaarusiortariaqalerpugut.

Meeraq illersorniarlugu ilaqutariit katersuuffigisinnaasaannik iliuusissanik eqqarsaqatigiittariaqalerpugut. Meeqqat ilaqutariit akornanni ataatsimoortillugit sullinneqarnissaat, meeqqanut atugassarititaasut asanninnermik toqqissisimanermillu toqqammaveqartup pilersinneqarnissaanut tamatta suleqatigiittariaqarpugut. Aqqut tamanna eqqortuuvoq. Aamma Qallunaat Nunaat ikiuunnissamut pisussaaffeqarpoq. Taamaattumik Qallunaat Nunaata ikiuunnissaa tikilluaqquarput.

Nunatsinni borgmesterit tallimaasut Nuummi ulloq tallimanngorneq 31. maj 2019 ataatsimeereerlutik meeqqat kinguaassiutitigut kannguttaatsuliorfigineqarsimasut ikilisinnissaannut ataatsimoorussamik suliniuteqarnialerlutik nalunaaruteqarput. Tamanna nuannaarutigisariaqarpoq, tassami kommunit tamarmik maannakkut meeqqanut atugassarititaasut pitsanngorsassallugit isumaqatigiimmata.

Inuiaqatigiittut ataatsimoorluta akisussaaffigaarput meeqqat kinguaassiutitigut atornerlunneqannginnissaat, taavalu meeqqanut atugassarititaasut peqqinnartuunissaat toqqissisimanartuunissaallu ataatsimoorluta pilersissallutigit.

Ullut tamaasa ukioq kaajallallugu meeqqat pisinnaatitaaffii pillugit ilungersuuteqartuartut Meeqqat Illersuisuisuat MIO, Peqatigiiffik Kalaallit Meerartaat, Meeqqat Ikiortigit – Red Barnet, Meeqqat Inuunerissut, NAKUUSA allarpassuillu pisortat ingerlataat aamma nammineq kajumissutsiminnik suliniartut nukipparujussuit atorlugit maannamut sulianik arlalissuarnik ingerlatsereersut kivitseqataasullu qutsavigissallugit pinngitsoorusunngilagut. Tamassi suliniuteqartuarnissigut meerarpassuit atugaat qaamanerulersippasi. Siunissami sulilluarnissassinnik tamanik ajunnginnerpaamik kissaappatsigit.

Naggataatigut meerannguit tamaavissi, ulloq pilluarnartumik nuannaarnermillu immerlugu ilaquttasi qanigisasilu peqatigalugit Meeqqat Ulluat atorluarisiuk, nuannaaqatigissavitsit.