Meeqqat qimagutsinneqaratik kannguttaatsuliortuusut Tasiilamiit qimagutinneqassapput

Tasiilami pissutsit pillugit DR-ip TV-kkut piviusulersaarutaa ”Byen hvor børn forsvinder” aallaavigalugu sooq Kalaallit Nunaanni inuit atugaasigut iliuuseqartoqannginnerunersoq pillugu oqallinneq aallarteqqippoq. Unammilligassat ukiorpassuarni piusimapput ilisimalluarpagullu. Folketingimi ilaasortaq Aaja Chemnitz Larsen qanittukkut tamannarpiaq pillugu suaaruteqarsimavoq, kinguneqanngitsumilli.

Ima oqarpoq: ” Taamak annertutigisumik anniaateqarneq isigalugu ajoqaaq, iliuuseqarfigerusunnaqaarlu. Uanga taamatut misigisimavunga. Kommunip Naalakkersuisut peqatigalugit suliniutissarpassui pisariaqartinneqarput, uangalu Folketingimiit ikiuukkusuppunga. Søren Espersenip (DF) iliuuseqartoqartariaqarneranik oqariartuutaa isumaqatigaara, kisiannili meeqqat pinngitsaalisamik qimagutinneqarnissaannik oqariartornera isumaqatiginngilluinnarpara. Akerlianilli kannguttaatsuliortuusut najugaqarfinnit minnerniit, soorlu Tasiilamiit qimagutitinneqartariaqarput”.

Ukiormanna februaarimi folketingimi ilaasortaq Tasiilameereerluni kinguaassiutitigut kannguttaatsuliornerit amerlalluinnarnerannik paasisaqarluni tupaallassimaqaaq. Aaja Tasiilami ilaqutaqarpoq, ukiullu kingulliit qulit ingerlaneranni Tasiilamiittarsimavoq meeqqanullu atugarliortunut pitsanngorsaatit takusinnaasarsimallugit, taamaattorli arriippallaamik pipput kommunelu kivitsinissaminut kisimiippallaaqaaq. Ineriartornerup ilorraap tungaanut saatinnissaanut nukiit amerlanerusut pisariaqartinneqarput.

”Immikkut iliuuseqartoqarnissaa Tasiilami pisariaqartinneqarpoq, akisussaaffimmillu tiguseqataarusuppunga. Tasiilami kajumissutsimik aallaaveqartumik tunniussassaqartoqarlunilu pikkorissunik sulisoqarpoq, taakkualu peqatigalutigit ataatsimut iliuuseqarnissarput pisariaqartoq isumaqarpunga. Eqqorneqartut inatsisitigut inissisimaffiisa nukittorsarneqarnissaannut, taamatullu kannguttaatsuliortut nigortinneqarnissaannut inatsisip periarfissiinissaanut tunngasutigut misissuerusuppunga. Ajornartorsiut Tasiilamiinnaq piunngilaq, ataatsimulli isigalugu sumiiffinni inukitsuni kannguttaatsuliortup aqqusinerni naaperiataarsinnaanera kannguttaatsuliorfigitissimasumut eqquisuusarluni.” Aaja Chemnitz Larsen meeqqanut kinguaassiutitigut kannguttaatsuliortunut sivisunernik sakkortunernilli pineqaatissiisalernissamik siornatigut inassuteqarsimasoq naggasiivoq.

Aaja meeqqanut inuusuttunullu inuuniarnermikkut ajornartorsiortunut atugassatut 10 mio. koruuninik Folketingimi qulakkeerinnissimavoq taamatullu Tasiilami Politiini Pinerlunnaveersaartitsisussamik sulisumik ataatsimik atorfinitsitsisoqarnissaanik qulakkeerinnissimalluni.

Aaja martsip 13.-iani oqallisissiamik saqqummiivoq, tassanilu Tasiilap inuit atugaasigut ikiortariaqavissutut inissinnissaanik inassuteqarsimavoq, aaqqiissutissatullu tigussaasutut arfinilinnik siunnersuuteqarluni, ilaatigut inatsisinik atuutsitsinerup iluani Tasiilatut sakkortuunik pisoqarfiusartunut immikkut aningaasaliisoqarnissaanik siunnersuuteqarluni. Tamanna pillugu inatsisinik atuutsitsinermut ministeri oqaloqatigisimavaa, taannalu ikiuukkusussuseqarpoq. Taamanikkulli qisuariartoqanngilaq, tamannalu eqqarsarnartoqartippaa.

Folketingimut ilaasortaq, Aaja Chemnitz Larsen