Meeqqat pillugit nuna tamakkerlugu iliuusissanik pilersaarusiornissaq tapersersorneqarmat nuannaarutigaarput

Oqaasiinnakkut samminninnata iliuuseqarnissamut alloriaqqittariaqarpugut. Taamaammat Inuit Ataqatigiit meeqqat inuusuttullu sumiginnagaanerannik annikillisaanissamut nuna  tamakkerlugu iliuusissanik pilersaarusiornissamut siunnersuutitatta Naalakkersuisunit taperserneqarmat nuannaarutigaarput.

Ukiaq manna Inatsisartuni ataatsimiinnermi Inuit Ataqatigiit isumaginninnikkut aarlerinartorsiortut meeqqallu sumiginnakkat pillugit pinaveersaartitsinermi iluatsitsinissatsinni nuna tamakkerlugu iliuusissatut pilersaarut, Naalakkersuisut tamarmik suleqatigiillutik naalakkersuisoqarfiillu tamaviisa suleqatigalugit ataqatigiissaarillutillutillu suliaqarnissaat siunnersuutigaarput.

MIO-p iliuusissatut pilersaarusiornissaq ujartortarsimavaa

Ingammik MIO-p nuna tamakkerlugu meeqqanut inuusuttunullu iliuusissanik pilersaarusiornissamut politikkikkut alloriaqqittoqarnissaa ujartorsimavaat. MIO-mmi angalanerminit nalunaarusiaasa meeqqat aarlerinartorsiortut amerlasuut pisinnaatitaaffigigaluarlugu ikiorserneqarnissaannut tapersersorneqarnissaannullu iliuutsivut amigartoq takutippaat.

Taamaammat Naalakkersuisunit siunnersuummut allakkatigut akissuteqaateqarnerminni siunnersuut tapersermassuk nuannaarutigaarput. Tapersiineq Inatsisartut ataatsimiittarfianni oktobarip 31-ni siullermeerinninnermi piviusunngortinneqassappat suliassaqarfiit akimorlugit meeqqat inuusuttullu pillugit suleqatigiinnerulernissaq aaqqissuussaanikkullu ataqatigiissaarinerunissaq alloriaqqiffigissavarput.

Kommunit attuumassuteqartullu allat suliamut ilanngunneqarnissaat ilanngullugu erseqqissumik kaammattuutigerusupparput. Kommunit attuumassuteqartullu allat susassaqarfiit akimorlugit  suleqatigiinnissamut piumassuseqartorujuussunerat misilittakkatta takutippaa.  Tamassuma sianiatigut kommunit tassaapput innuttaasunik sullissinermik ingerlatsisuusut ukiunilu kingullerni kommuninik suleqateqarnermik nukittorsaasimaneq nangittariaqarpoq.

Isumaginninnikkut politikimi iluatsilluartumik ingerlatsinermi Inuit Ataqatigiit siusinaarluni iliuuseqarneq , pinaveersaartitsineq, susassaqartullu akimorlutik suleqatigiinnerat pingaartipparput. Ilaqutariit iluitsuusutut sullisissavavut, meeqqanillu sumiginnaasarneq pimoorussamik ilungersortumik iliuuseqarfigissavarput.

Tamakkiinerusumik

Maluginiarparput Naalakkersuisut akissuteqaatiminni naalakkersuisoqarfiit pingasuinnaat eqqartormassuk, taassalu peqqinnissaqarfik, isumaginnittoqarfik ilinniartitaanerlu. Eqqumaffigeqqujumavarput tamakkiinerusariaqarneranik isumaqaratta. Ilaqutariit tamakkiisumik suliniuteqarfigissagutsigit suliffeqarfeqarneq inuussutissarsiornerlu suliassaqarfiillu allat aamma ilaasariaqarput tamannalu siunersuutitsinni qitiulluinnarpoq. Nuna tamakkerlugu iliuusissanik pilersaarusiornerup politikkikkut tamakkiisumik kivitseqatigiikkumassuseqarnitsinnik takussutissaasariaqarpoq.

Amerlaqaagut meeqqat nunatsinni isumalluutini pingaarnerpaajunerat pillugu isumaqatigiittugut. Susassaqartut akimorlutik suleqatigiinnerat  iluatsinngikkutsigu meeqqallu inuusuttullu sumiginnarneqartut pillugit nuna tamakkerlugu iliuusissatut pilersaarummik isumaqatigiissuteqarnata, tamanna iliuuseqarani oqaluinnarnerussaaq.

Partiit allat siullermeerinninnermi oqaaseqaatissaat tusassallutigit assut pissanngatigaarput.

Bilag 1

Bilag 2

Sara Olsvig
Siulittaasoq, Inuit Ataqatigiit