Meeqqat inuusuttullu inuunerminni naapertuilluarnermik misigisaqartinneqassapput

Nunarsuaq tamakkerlugu inuiaqatigiinnut naapertuilluarnermut ullorititaasoq taassaavoq 20. februar.

Inuiaqatigiinnut naapertuilluarnermut ullorititaasoq nunarsuarmioqataasunut tamatsinnut, inuiannilu tamani inuit atugarisaasa assigiinngissinnaaneri pillugit eqqaasitsiniutaavoq.

Sorpassuit inuiaqatigiit ingerlaasianni napertuilluarnermut tunngasut qaqilerneqarlutik eqqartorneqarsinnaagaluartut, meeqqat inuusuttullu atugarisaat pingaarnerutillugit saqqummiussissallunga aaliangiussimavara. Arlalitsigut meeqqat inuusuttullu pillugit qaqilerinissatsinnut eqqartuinissatsinnullu pissutissaqarluarpugut.

Ulluni makkunani inuiaqatigiit akornanni aammalu tusagassiutitigut meeqqat inuusuttullu sammineqangaatsiarput. Nunatsinni meeqqanik inuusuttunillu sumiginnaasarnerit kinguaassiutitigullu atornerluisarnerit annertoorujussuupput. Meeqqat inuusuttullu sumiginnagaanermik kinguaassiutitigullu atornerlugaanermik eqqugaasimasut inuunerup sinnerani innarlerneqaatigisaminnik qaangeruminaatsilluinnakkaminnillu nalaataqarnermikkut inuttut alloriaqqinnissartik ajornartorsiutigilersarpaat, kingunerisinnaallugulu imigassamut aanngajaarniutinullu atuilernerit allarpassuillu inuunerluutaalersinnaasut. Meeqqat inuusuttullu inuunerminni artukkerneqarujussuartarnerat pissutigalugu inuiaqatigiittut oqartariaqalerpugut “meeqqanik inuusutttunillu sumiginnaasarnerit kinguaassiutitigullu atornerluisarnerit tassa tassunga killittariaqalerput”.

Meeqqanik inuusuttunillu sumiginnaasarnerit kinguaassiutitigullu atornerluisarnerit kingunerisaannik ilaqutariit avissaartuutsinneqartarnerat atugaagaluttuinnartut ilagivaat. Ilaqutariinnik avissaartuutsitsineq ilaqutariippassuarnut artukkiivoq, aaqqiissutissanillu naapertuilluarnerusunik anguniagassittariaqalerluta.

Meeqqat inuusuttullu naapertuilluarnermik isumassorneqarnissaat pingaaruteqarpoq. Meeqqat inuusuttullu atugarisaat pineqartillugit arlalitsigut angajoqqaat inersimasullu eqqarsaatigineqarpallaarneq ajorput. Taamaattoqarnera pissutsit pitsaasup tungaanut sakkiartunnginnerannut pissutaaqataasinnaasut ilagisinnaavaat. Angajoqqaat inersimasullu aamma misigissuseqarput, misigissutsitigut tigusisarput sunniisarlutillu, amerlasuullu isumassugassaasarlutik. Taamaattumik meeqqat inuusuttullu sumiginnagaasarnerat kinguaassiutitigullu atornerlunneqartarnerat aaqqiiviginiarneqassappat angajoqqaat inersimasullu peqatigalugit siunissamut siunnerfilimmik iliuusissatut pilersaarusiortariaqalerpugut.

Meeraq illersorniarlugu nakuusernermut, kinguaassiutitigut atornerlunneqarnissamut allatigullu innarlinnginnissaa siunertaralugu angajoqqaat ilaat avittariaqarsimasut paasilluarneqarsinnaapput.

Ilaqutariit katersuuffigisinnaasaannik iliuusissanik eqqarsaqatigiittariaqalerpugut. Ilaqutariit ataatsimoortillugit sullinneqarnissaat, ilaqutariinnut politikki naapertuilluarnermik toqqammaveqartup pilersinneqarnissaanut suleqatigiittariaqarpugut.

Ilaqutariit avissaartuutsinneqannginnissaat anguniarlugu ilaqutariinnut sullissivimmik Nuna tamakkerlugu sullissilertussamik pisariaqartitsisoqarpoq, sineriatsinnilu Ilaqutariit illuisa ineriartortinneqarneri ataqatigiissaarluagaanerusumik ingerlanneqarnissaa pingaaruteqarluni. Ilaqutariit siunnersorneqarnerat nukittorsarniarlugu ilaqutariinnut siunnersortinik angalasartussanik peqarnissarput pinngitsoorneqarsinnaanngitsoq isumaqarpunga. Taamaalillutik ilaqutariit qanimut tikinneqarlutik alloriaqqinnissamut siunnersorneqarsinnaalissagaluarput.

Angajoqqaatut inersimasutullu meeraq inuppalaassusermik qanilaarnermillu misigitittuartigu, meeraq qanorluunniit ikkaluarpat oqaasinngueqatigisarlugu. Meeqqap oqaasii angajoqqaatut paasissallugit pingaaruteqartorujussuuvoq. Aamma meeqqap angajoqqaaminit paasineqarnissani tusaaneqarnissanilu pinngitsoorsinnaanngilaa. Meeraq qanorluunniit atugaqaraluaruni angajoqqaaminit inersimasunillu isumassorneqarnissani pisariaqartippaa.

Inuiaqatigiittut ataatsimoorluta akisussaaffigaarput meeqqat inuusuttullu kinguaassiutitigut atornerlunneqannginnissaat, taavalu meeqqanut inuusuttunullu atugassarititaasut peqqinnartuunissaat patajaatsuunissaallu ataatsimoorluta pilersissallutigit.

Meeqqat inuusuttullu atugarisaat pineqartillugit angajoqqaat inersimasullu qanimut peqataanissaat ataqatigiissaakkamik inatsisit aqqutigalugit eqqanaarniartariaqarput. Tamannaavorlu ullutsinni siunissamilu meeqqat inuusuttullu atugarisaat pineqartillugit inuiaqatigiittut pikkorinneruffigisassarput.

Aqqa Samuelsen, mobil 52 37 03

Inuit Ataqatigiit

Isumaginninnermut meeqqallu pillugit oqaaseqartartoq