All./ Sofia Geisler, Inuit Ataqatigiit, Inatsisartut

Meeqqat illersugassarivagut

Kinguaassiutitigut meeqqanik atornerluisoqarsimatillugu sakkortunerusumik pineqaatissiisoqartalernissaa Inatsisartut tamarmiusut tunuliaqutserpaat. Qularutiginngilara tamanna qanoq naleqartitaqarnermik innuttaasunut oqariartuutaammat angisooq pingaarutilerujussuarlu. Tassalu meeqqanik innarliisarneq Inatsisartut akuerinngilluinnaraat aamma oqariartuuteqartut inatsisit unioqqutikkaanni tamanna malunnaatilimmik malitseqartinneqartassasoq.

Ullumimi ataatsimoorussaralutigu oqariartuutigisarput oqartussanut attuumassuteqartunut aamma nalunaarneruvoq ersarilluinnartoq. Tassalu eqqartuussinermik inatsimmik pinerluttulerinermillu inatsimmik atuutsitsinermut akisussaasunut oqariartuuteqarpoq ukkatarineqassasoq pinerluttulerinermut inatsisip atuuttup iluani pineqaatissiinerit assigiiaartuusariaqarnerannik sakkortunerusariaqarnerannillu meeqqanik kinguaassiutitigut atornerluinerit pineqartillugit.

Tamanit ilisimaneqarpoq meeqqat illersuisuanit MIO-mit ukiorpaalunngortuni ajornartorsiut imaannaanngitsoq oqariartuutigineqartarmat, tassalu kinguaassiutitigut atornerluisoqarsimatillugu unnerluussisussaatitaasunut saaffiginninnerit tamatigut kinguneqarneq ajornerat, ilaatigut innersuussutigineqartarluni taamak pisoqarsimaneranut uppernarsaatissaqannginnera. Pisut qaqinneqarneq ajortut ikittuunngillat, tassami politiinut saaffiginnissutigineqartut tamatuma malersoriarnissaanut saaffiginnittut periarfissagissaarneq ajorput, imaluunniit saaffiginninneq pisimasinnaavoq kingusippallaakkut taamalilluni uppernarsaatit tammareersimasinnaallutik nunguterneqareersimasinnaallutilluunniit.

Taamaattumik ernumassutigisinnaavara politiinut tatiginninneq innarlerneqarsimappat, pingaartumik isuma pigineqartoq una naliginnaalersimappat, kinguaassiutitigut kannguttaatsuliorfigineqarneq pillugu saaffiginninneq ilumoorunneqarnavianngitsoq malitseqartinneqarnavianngitsorlu. Meeqqat inuusuttullu pivagut, taakkulu meeraanerminni kinguaassiutitigut kanngutsaatsuliorfigineqarsimaneq pillugu saaffiginninnerat tamatigut ilumoorullutigu pisanngikkutsigu, taava meeraq kiap illersussavaa?

Meeqqanik pinerliisimannginnermik uppernarsaatit atulernerat qujanaqaaq. Taamatulli uppernarsaateqarneq imaanngilaq tassannga peqartoq ilumut meeqqanik kinguaassiutitigut innarliisimanngitsoq atornerluisimanngitsorluunniit, tassani innersuussutigissallutigut MIO-mit arlaleriarluni oqariartuutigineqartartoq, tassalu kanngutsaatsiliornerit atornerluinerillu nalunaarutigineqanngitsoq malersorneqanngitsulluunniit ikigisassaanngitsut.

Pisut avaanngunartut ingerlaarnerat kipisariaqarparput. Taamaattumik paasititsiniaaneq kipisuitsoq ingerlasariaqarpoq, pisinnaatitaaffinnik ersarissaasoq, aammalu inuiaqatigiinni uagutsinni akuerinngilluinnaripput kinguaassiutitigut meeqqanik atornerluinarit innarliinerillu.