Ullumi 22.10.2018 Meeqqat atuarfianni pisortatut atorfeqartut pisortatut ilinniarsimanissaannik piumasaqaateqalernissap pitsaaqutai pitsaanngequtaalu pillugit qulaajaasumik Naalakkersuisut nassuiaammik saqqummiussinissamik peqquneqarnissaannik Inatsisartut aalajangiiffigisassaattut Inuit Ataqatigiit sinnerlugit Sofia Geisler siunnersuuteqarpoq.

Inuit Ataqatigiit tunngaviusumik isumaqarput atuartitaaneq ilinniartitaanerlu inuttut inuiaqatigiittullu atugarissaarnermut aqqutaasut. Taamaattumillu tamanna angutserlugu meeqqat atuarfiani pisortaasut ilinniartitsisinnaanerup saniatigut pisortatut ilinniagarsimanissaasa piumasaqaatinngortinneqassappat pitsaaqutit pingaanngequtaalu qulaajaaqqusivugut. Meeqqat atuarfiat ilikkagaqarfiulluassappat meeqqat atuarfianni aqutsineq aamma qiviartariaqarparput, tamannarpiaavorlu siunnersuutitsinni siunertaasoq.

Naliliinerit politikkikkut iliuuseqarusulertitsipput

Ukioq 2015-imi meeqqat atuarfiat naliliiffigineqarmat ilinniartitsisut misissuinermut peqataasut pingajorarterutaasa pisortarisamik attaveqariaasiat, siunnerfileeriaasiat isumassarsiorfiusinnaanerallu isornartorsiorpaat. Qinikkatut tamanna tusaanngitsuusaarneqarsinnaanngitsutut Inuit Ataqatigiit nalilerpaat, aamma meeqqat atuarfiata ingerlanneqarnera Kommuneni inissisimagaluarpalluunniit. Meeqqat atuarfiat pillugu akisussaaffik inuiaqatigiittut sumi inissisimaffeqarneq sunillu akisussaaffeqarneq kisiat aallaaviginagu iliuuseqarsinnaaffitsigut akisussaaffimmik kivitsisinnaanissarput angorusupparput. Maannakkut pisortatut ilinniagaqarsinnaanerup neqeroorutitut inissisimanera naammangiinnarsinnaanngilarput, susassaqarfiit suleqatigiinnerisigut naalakkersuisut qinikkallu piumassuseqarnerisigut meeqqat atuarfiini ilinniartitsisuunerup saniatigut pisortatut ilinniagaqartut atorfeqartullu aaqqissuussaasumik politikikikkut iliuuseqarfiginerisigut meeqqat atuarfianut naleqartitsinerusumik takutitsiviusinnaasoq isumaqarfigaarput.

Sofia Geisler
Inatsisartunut ilaasortaq, Inuit Ataqatigiit