Kulturip inuk iluittunngortittarpaa

Ullumi Inuit Ataqatigiit sinnerlugit Peter Olsen Eqqumiitsuliornermut Aningaasaateqarfimmik pilersitsinikkut eqqumiitsuliornermut aningaasaliissutinik tamanik agguaassinermi pisortat attuumassuteqannginnissaat siunertaralugu Inatsisartuni siunnersuuteqarpoq.

Kulturimik isiginnittaaseq isumaliortaaserlu nikisinneqarli

Inuit Ataqatigiit tunngaviusumik isumaqarput inuiaat anersaakkut sanngisuut nukittuullu kulturi aqqutigalugu pilersinneqarsinnaasut. Taamaattumillu inuit piumassusermik tamanit atorneqarsinnaasumik siammaasinnaasut ineriartortittuarnissaat pingaaruteqarluinnarpoq. Inuiattut inuttullu ataasiakkaatut, immitsinnut paasinissatta annertusartuarnissaa pingaaruteqarpoq, tamannami inuiaqatigiit namminersortut pisariaqartilluinnarpaat. Tamannalu piorsarsimassutitsinnik suliaqartut nukittuffigaat. Assortorneqarsinnaanngitsumik kulturi timnersornerlu inuiaat ataatsimoorfigaat, isumaqarpugullu taanna oqaasiinnaanani politikkikkut iliuuseqarnikkut eriagineqartariaqartoq. Taamaammat Inuit Ataqatigiit kulturimut isiginnittaaserput tassavoq; kulturi inummik iluittunngortitsisoq, taamaattumillu aningaasaleeriaatsimi isiginnittaaseq tapiinertut isigineqartarnera nikisinneqartariaqarpoq, ersarissumik oqarta kulturimut aningaasaliinerusoq, ilisimasaq tassaammat kulturi inuiannut anersaakkut pisuunerulersitsisuusoq.

Sooq pisortat eqqumiitsuliornermut naliliisartuussappat?
Eqqumiitsuliornermut anigaasaateqarfimmik pilersitsinissamik siunnersuuteqarneq Naalakkersuisut 2017-mi nassuiaateqarsimaneranit aallaaveqarpoq. Tassani nassuiarneqarmat eqqumiitsuliornermi tapiissutinik aqutsineq allanngortinneqassappat inatsitigut sinaakkutit allanngortinneqartariaqartut. Siunnersuutigaara eqqumiitsuliornermut aningaasaateqarfimmik pilersitsinikkut pisortat aalajangiisuujunnaassasut, partiitsinnilu attuumasssuteqanngitsumik tapiisarnissaq aqqutissiuuttariaqartutut isigigatsigu. Ajuusaarnarporlu Naalakkersuisut aningaasaliissutaareersut inatsisitigullu periarfissaareersut kisiisa aallaavigalugit siunnersuummut itigartitsinerat tunngaveqarmat, tamanna eqqumiitsuliornermut anguniagaqarusussuseqarpallaannginnertut paasineqarsinnaammat ajuusaarnarpoq.

Peter Olsen, Inatsisartuni ilaasortaq

Graphic by: Ivínguak´ Stork Høegh

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 323 702
Fax: (+299) 321 321
Website: https://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 323702
Fax: (+299) 323232
Aningaaq: https://www.ia.gl
Email: ia@ia.gl