Naalakkersuisut sukkunut akitsuut pillugu kukkussutaat tusarlugu nukillalaarnerup pianik isummakkut aalaterneqaannartariaqarpoq. Suaaruteqarput suliffeqarfinnut kingumoortumik akitsuuteqalersitsinemikkut nunatta karsianut naatsorsuutigisimasaraluatik utertinneqassasut, qinersisartorlu eqqarsalerpoq; ”taavami aamma pisiniarninni akitsuutit akilersimakka uannut utertinneqassapput?”

Ukiaq tamaviaangaarlutik nunatta karsia immerneqarnissaa anguniarlugu sukkunut akitsuut qaffappaat paasinarsivorlu tamatumunnga naatsorsuuteqarpallaalaarsimasut. Naalakkersuisut eqqarsaatiminni suliffeqarfiit kingumoortumik sukkunut akitsuummik akiliissasut eqqarsarlutillu ajornavianngitsoq,  puigorsimasaalli tassaavoq qanoq tamanna piviusunngortissallugu. Immaqa nunatta karsia immerumanermik tuaviinnaq akitsuutip atuutilernissaanut ulapippallaarsimanngikkaluarunik allannguinerup kingussai ilisimanerusinnaagaluarpaat. Taamatut pisoqarnerata takutippaa pisumut Naalakkersuisut naammanginartumik inatsisimmik atuuttitsisinnaannginnerat. Nammineerlunga akuerisinnaanngilluinnarpara naalakkersuinikkut kukkussutertik innuttaasunut akilertimmassuk allaffissornikkullu suliaqartut kukkusimanerat utoqqatsissusiullugu. Tamassumunnga naalakkersuisooqataasut partiillumi illuatungiliuttut qanoq isumaqarpat? Naammagiinnarneqassava innuttaasut kukkussut akilermassuk? Una pisoq nipangersimaannarfigissallugu pissutissaqanngilaq, kukkunermi annertungaarmat Naalakkersuisut suliap piviusunngortinnissaanut misilitsikkaluarunik angusisutut oqaatigineqarsinnaanngimmata.

Naalakkersuisut kissaatigigunikku innuttaasut qinikkanut tatiginnissasut aamma nammineerlutik maligassiuisinnaasariaqarput asuli kukkussutiminnut innuttaasut akiliisinnagit. Taamaattumik Inuusuttut Ataqatigiinniit inassutigaarput pisumut taama ittumut nalaarseqqinnginnissaq anguniarlugu Naalakkersuisut siunnersuusiortillutik suliarilluakkanik siunnersuuteqartaqqullugit.

Aningaasaqarnitta oqaluttuuppaatigut kukkutaarnissamulluunniit piffissaqanngitsugut politikkerinillu akisussaassusilinnik innuttaasunillu ataqqineqartunik pisariaqartitsisugut.

Allattoq

Jane P. Lantz, Inuusuttut Ataqatigiinni siulittaasup Tullia