Allattoq: Aqqaluaq B. Egede, politikkikkut oqaaseqartartoq

Kukkunersiuinermut Ataatsimiititaliami amerlanerussuteqartut paamaarussipput!

Inatsisartut Kukkunersiuinermut Ataatsimiititaliaat misissukkaminik paasissutissanik pingaarutilinnik sukumiisunik paasisaqarsinnaanngitsoq naammassinnissinnaanngitsorluunniit ersarissigaluttuinnarpoq.

Assersuutigalugu kingullertigut Naalakkersuisut siulittaasuata angallataa inuussutissarsiutigalugu aalisarnermi atorneqartussatut akuerisaanngitsoq tusagassiorfitsigut paasineqarpoq.

Sooq Kukkunersiuinermut ataatsimiitsitaliap assinganik paasissutissanik ujartuisinnaanngila? Inatsisartut tassaapput Naalakkersuisunut nakkutilliisut. Sooq suliassartik taava suliarinngilaat? Ajortoqarpoq.

Ataatsimiitsitaliami suleriuseq matumanilu kukkunersiuineq partiip qalipaataa apeqqutaatillugu ingerlanneqalersimassappat taava kikkut tamat oqartussaaqataaneranut mitalliineruvoq.

Kukkunersiuinermik suliallit apererusunnarsipput – kikkunuku sullikkisi? Immissinnut imaluunniit inuiaqatigiit? Inatsisit kikkunnut tamanut atuuttussaatitaapput. Aamma Naalakkersuisut siulittaasuannut.

Piffissanngorpoq Inatsisartoqarfik Inatsisatut illersugaanerat suliamilu imaannaanngeqisumi namminiussuseqarlutik kukkunersiuini illersussallugu. Akuersaarneqarsinnaanngillat qalipaatersorluni kukkunersiuilluni sulinerit.  

Paasissutissat nalunngisavut; inuussutissarsiutigalugu angallammik akuerineqanngitsumik attartortitsineq.  Inatsisilerituumik misissuisitsisinermi paasissutissat tamakku “eqqumiiginarluinnartumik” mininneqarsimapput. Inatsisilerituup misissuinera paasissutissanik tunngaviusussanik sukumiisunik tutsuiginartunillu soqanngivissoq atuareerparput.

Paasissutissat qaangiataarniaannarlugit puujuinnarneqarnissaallu kissaatigigunarlugu Siumut  Kukkunersiuinermi ataatsimiititaliami siuttutut ilaasortaatitani naalakkersuisooqatinilu paamaarussitippai.  Kukkunerit ersarereerput. Taamak misissugassartaqartiginngillat.

Ataatsimiitialiami amerlanerussuteqarneq sakkugalugu illersortituaralugulu unioqqutitsineq isertuunneqarpoq. Pissaanermik ungaginninneq salliutinneqarpoq, inatsisartut atuuffiat salliutinneqarani. Tamanna akuersaarneqarsinnaanngilluinnarpoq.

Inuit Ataqatigiinniit erseqqilluinnartumik piumasaraarput naalakkesuisup siulittaasuata soqutigisarsiorsimanera pillugusuliaq sukkasuumik suliarineqassasoq.

Qaqagu Ataatsimiitiliaq inatsisartunut suliaq pillugu ilisimatitsissava?

Immissinnut sullinnersi naammaleqaaq!

Share and Enjoy !

0Shares
0 0 0