Narsami Urani pinnagu kujataani raajartassiinissaq inuussutissarsiutinillu siuarsaanissaq suleqatigiissutigisigu. Aalisarneq uneqqittussaanngitsoq aallartitsigu. Siunissaq minguitsoq inunnut orniginartoq.

Ulluni makkunani suut tamarmik unittoorfianni siunissami aaqqitassanik takorluuinissaq peqqinnartuuvoq. Eqqarsaqatigiinnissarput maanna piffissaqarfigilluarparput, aamma politikkerit neriorsuutaasa ilumoorunneqarnissaat pillugit. Inuit Ataqatigiit qulanngeqaagut illoqarfik Narsaq nunattalu kujataa inuussutissarsiornikkut ineriartornissamut periarfissarpassuaqartoq uppernarsassallutigu. Massakkut Naalakkersuisut tunuliaqutaasalu Narsaq aningaasaliiffiginaveersaarlugu, inuit aningaasarsiorfissanik suliffissanillu amigaateqartillugit uranimik piiaanissamut neriulersinnissaat anguniagarimmassuk akerleraarput. Ullut nalaatavut akerleriissutissatsinnik ujartuiffiginagit ataatsimoorfissanik pilersitsinissamut pisussaaffeqaratta suleqatigiinniarta.

Narsap illoqarfittut inuerusarneqarnera inuit ilaqutariippassuillu ulluinnarni inuuniarnerannik oqilisaataanngeqaaq. Illoqarfik inuussutissarsiorfiit angerlarsimaffiattut ilisarisimasarput, suliffissaaleqisut angerlarsimaffissaattut inissinniarneqarpoq. Naalakkersuisut aningaasanut inatsisaat uppernarsaataavoq ukiuni makkunani kujataani aamma Narsami sanaartugassanut aningaasaliinerit unitsillugit inissianik isaterinissamut aningaasaliinerit Naalakkersuisuniit piumaneqarnerummata. Tupinnaqaaq Naalakkersuisut nunatsinni inuit inuuniarnermikkut iluaqutissaat siuarsarnagit, nuna allamiut aningaasarsiornikkut iluaqutissaat kisiisa ilungersuummatikkik. Tamatumani nunatta inui salliutinneqanngillat aamma Narsami innuttaasut salliutinneqanngillat.

Illoqarfik Narsaq innuttaasalu urani annassutigissagaat isumaqalersitsiniartoqarpoq. Naak uran inuussutissarsiutinik minguitsunik, aalisarnermik, nunalerinermik takornariaqarnermillu tunngaveqartunik nungusaasussaasoq. Raajarniarluni aalisarneq tapertaalertariaqarpoq. Raajarniarluni aalisarneq aningaasarsiorfiulluartoq aallarteqqinneqartariaqarpoq. Raajartassiineq aalisagartassiinerlu inuussutissarsiutinik allanik innarliinani, inuussutissarsiutinik allanik ingerlatsinissamut akissaqalersitsisussaavoq. Illoqarfinni aningaasat ingerlaartut qaffassammata sunut tamanut nutaaliornissamut akissaqalersitsisussamik.

Inuiaqatigiit pisuussutaat raajat aalisagartassallu allat pisassiissutitut siammasinnerusumik atorneqarlik, illoqarfiillu periarfissallit ilungersunartumik inissisimasut nutaaliorfigineqarlik. Narsaq periarfissalinnut ilaavoq. Aporfissanik ujaasilluni naalakkersueriaaseq unitsinneqarli. Naalakkersuinikkut ajornartorsiutinik qaangiisinnaasunik pisariaqartitsivugut, Aamma pisariaqartitsivugut illoqarfiup Narsap uranimik piiaaffiunngikkaluarluni aningaasarsiornikkut nunatsinni nammaqataalluartoq pilersissallugu aalajangiisinnaasunik. Illoqarfik Narsaq nakkaakkiartuinnassanngippat partii kommunimi siuttuusoq, aamma naalakkersuinikkut siuttuusoq, tassa Siumut, takutitsisariaqarpoq utoqqatsissutissarsiuinnarani.

Inuit Ataqatigiit timitalimmik siunnersuuteqarnikkut kujataani nunattalu sinnerani aalisarnikkut siammasinnersumik siuarsaanissaq suliarisimavarput. Inatsisartuni partiit tamarmik tunuliaqutsigaannik 2018-imili Naalakkersuisunut suliakkiutigineqartumik. Paasisinnaanngisatsinnilli Naalakkersuisunit suli  suliarineqanngilaq aamma Kommune Kujalleq annerusumik tapersiniinikuunani.

Nualluussuup tuniluunnerata qaangiunnissaanut, ullut naliginnaasut aallarteqqinnissaannut kaammattuut maanna Naalakkersuisut Siulittaasuannut aamma Kommune Kujallermi Bogmesterimut suleqatiserinninnerput Inuit Ataqatigiit sinnerlugit aamma allakkatigut apuuppara. Isiginnaaginnartoqarsinnaanngilaq. Nipangiinnarluni ataatsimoorfissarsiortoqarsinnaanngilaq. Suleqatigiittoqarli aamma oqaloqatigiittoqarli. Illoqarfiup Narsap kujataatalu siunissaa tujorminartuunani, siunissaq orniginartoq ataatsimut pilersinniartigu.

Inuit Ataqatigiit

Politikkikkut oqaaseqartartuat

Aqqaluaq B. Egede

Share and Enjoy !

0Shares
0 0 0