Inatsisartut ukiaanerani ataatsimiillutik aallarteqqipput. Ataatsimiinnissaq una Inuit Ataqatigiinnut allattoqarfikkut aamma Inatsisartut marluk taarserallarnerisigut nutaartaqaqarpoq. Kiisalu Inatsisartut gruppianni siulittaasoq nutaaq toqqarneqarluni.

”Itiaaqaanga, immaqa pissangallungalu qilanaarnermik” ilaatigut Kelly Berthelsen, Kullak, Inatsisartuni inissaminut aggeqquneqalernermini oqarpoq. Tassaallunilu Hans Aronsenip sulinngiffeqarniarluni qinnuteqarnermini sinniisussaa. Kelly Ammassivimmiuuvoq Qaqortormi najugalik, atuakkiortuuvoq immikkullu politikkikkut soqutigisaqarfigalugit aatsitassarsiorneq aamma imigassamut tunngasut. Sunngiffimminilu guitarerluni erinarsoqattaarluni aliikkusersuiuarnera inuit ilisimalluarpaat.

Naaja H. Nathanielsenip tunuarnerani aamma Inatsisartutut inissippoq siornatigut qinigaareersimasoq Debora Kleist, Tippu. Debora Nanortalimmiuuvoq massakkut Qaqortumi najugalik kujataanilu malunnaatilimmik suliaanut atatillugu sulilluartartutut ilisimaneqarluarluni. Immikkullu politikkikkut soqutigisarivai isumaginninneq, ilinniartitaanerlu.

Kelly Berthelsen Debora Kleistilu tikilluaqquagut, qilanaarlutalu suleqatigiinnissamut ilisimasaallu assorsuaq gruppimut iluaqutaalluarnissaat qularutiginngilarput.

Minnerunngitsumillu eqqaassavarput Inuit Ataqatigiit Inatsisartut gruppianni siulittaasutut Peter P. Olsen qinigaaffiup affaa atuutereerluni pilersaarut malillugu suliaq allamut ingerlarteqqimmagu. Peter qujaffigaarput siulersuilluarsimaneranut. Massakkullu nuannaarutigalugu nalunaarutigisinnaalerparput Mimi Karlsen gruppimi siulittaasutut inissimmat. Ilisimasarpassui, misilittagartunera inuttullu eqqissisimasuunera gruppimut nukittorsaajumaarput.

Ukioq ataatsimiiffik nutaaq, kiinnat nukiillu nutaat, siulersuinerlu nutaaq. Piumassuserli siunertarlu nikiuitsoq ukiaq manna atorumaarparput.

 

Inuit Ataqatigiit