KIGUTINIK NARLORSAASARNEQ ATULEQQILLI

Naalakkersuisunngorlaaq Anna Wangenheim isumalluarfigalutit sulilluarnissannik kissaappatsigit.

Suliassarpassuaqartussaagaluartutit, minnerunngitsumillu aningaasat atugassarititaasussat killeqartuarmata tulleriiaarinissat pisariaqartussaasoq nalunngikkaluarlugu, aammalu ataatimiititaliami sulineq Naalakkersuisunilu sulineq illuatungeriissinnaasartut nalunatigu taamaattoq pingaaruteqarluinnartumik suliassaqarnerit ugguuna apuukkusupparput.

Sivitsortumi meeqqat kigutimikkut narlorsagassaqartut pillugit sullissineq unitsinneqarnikuuvoq. Tamannalu eqqarsaatigilluagaanngitsutut nalilertariaqarparput.  Paasinarpormi  Peqqinnissaqarfimmi Aqutsisut aaliangigaat Naalakkersuisut maliinnarsimarpasikkaat, apeqqusiinertaqanngitsumik.

Aningaasat meeqqat kigutaasa narlorsarnissaanut atorneqartussat taggiunneqartut kisitsisit arlaqarput. Qularnanngitsumik 20- mio. kr. akornanni naleqartussaapput.

Aningaasat taakku sipaarutigineqarnerat meeqqanut pineqartunut annertoorujussuarmik kingunerlutsitsisussaapput.  Meeqqat akissarsiagissaartunik angajoqqaallit ilaat kisimik namminersortunut narlorsartikkiartortalissapput, tassalu nunatta avataanut.

Aperisariaqarpugut: Ilumut 20 mio. kr. sipaarniarlugit nunaqqativut nunamut allamut nuuttariaqalernissaannik aqqutissiuutissavagut?

Neriuppugut Naalakkersuisutut sapiissuseqarfigalugu suliaq piaartumik aaqqiivigissagit.

Inuit Ataqatiigiit piareersimapput aaqqissutissanik suliniaqataassallutik.

Ukiut pingasut narlorsaannginneq kingusinnerusukkut inuiaqatigiinnut annertunerujussuanngorluni aningaasartuutinngortussaassaaq, allatut iliortoqanngippat.

Eqqarsaatigineqanngitsuttaaq tassaapput aamma meeqqat inunnguutsiminni sipparlullit, qanermikkut annertuumik suliaritittariaqartut taakku qanoq pineqassappat ?

Stine Egede, Inuit Ataqatigiit, peqqinnissamut oqaaseqartartoq Tlf. 493214

Share and Enjoy !

0Shares
0 0 0