Tamatta isumaqatigisinnaagunarparput nunatsinni politikkikkut pissutsit tukattorujussuummata. Naalakkersusooqatigiit akunnerminni akersuuttuarsinnartut nunatta siunissaanut aalajangiilluinnartuusussat marluk anorimi sammiveqaratillusooq erfapput: Mittarfiit aalisarnermullu inatsit.

Sisamanngornermi ualikkut Inatsisartut Aningaasaqarnermut Akileraartarnermullu Ataatsimiititaliaanut Naalakkersuisut siulittaasuat danskit naalakkersuisuinut mittarfinnut aningaasaleeqataasinnaanerannut oqaloqatiginnittarsimanini suli angusaqarfiusimanngitsoq oqariartuutigivaa, aqaguanili tallimanngornermi ullaap tungaa danskit ministeriunerata tusagassiorfitsigut tamannarpiaq pillugu ataasinngornermi tikissamaarluni tusagassiortunillu Kielsen ilagalugu qaaqqusissamaarnini nalunaarutigimmagu tupaallaatigaarput. Ajoraluartumik suliaq isertuusserpalaaginnarani suleriuserineqartoq aamma tukalluinnarmat tupaallaatigivallaanngilarput.

Kielsen nassuiaaqqissaartariaqaleqqavoq. Ilisimasaminik Inatsisartunut ingerlatitseqqinnaveersaarsimanerpa imaluunniit piffissaq kingullerpaaq tikillugu isumaqatigiinninniarnerni pisut ilumut taama ilisimasaqarfigitigisimannginnerpai? Taamalu pineq danskit suliamik aqutsilluinnarsimanerannik ersiutaanerpa? Nalunanngitsoq unaavoq, ministeriuneq isumaqatigiissumik atsiugassaqarnissi isumannaareersimatinnagu nunatsinnut angalanavianngilaq.

Inuit Ataqatigiit Naalakkersuisut siulittaasuata pisut nassuiaateqarfigissagai soorunami piumasarissavarput.

Danskit peqataassappata piumasaqaatit erseqqissuussapput

Oqaatigiumavarpulli danskit naalakkersuisuisa oqariartuutigisaat soqutiginartikkatsigu. Naalagaaffeqatigiimmi ataatsimiinnerisa kinguninngua suliaq aallartinneqartoq nalunaarutigineqarmalli qanoq inerneqassanersoq tusassallugu utaqqisimavarput.

Tusagassiorfitsigulli aatsaat paasivarput naalagaaffik Kalaallit Airports A/S-mi piginneqataalernissaa anguniarneqalersimasoq. Maannangaaq isumaqatigiissut qanoq ittoq atsioqatigiissutigineqarnialernersoq Naalakkersuisut siulittaasuannit paaserupparput.

Ilanngullugulu piumasaqaatinik erseqqissunik tunngaviusariaqartunillu saqqummiussaqarumavugut:

  • Kalaallit Nunaat naalagaaffimmut aatsaat isumaqatigiissusiussaaq isumaqatigiissuteqarnermi piumasaqaatit isumaqatigiissusiorusuttunit allanit pitsaanerusinnaassappata.
  • Danskit naalagaaffiat peqataatinneqassappat, toqqaannartumik aningaasaliineruppat attartortitsineruppalluunniit, Inatsisartut tassaassapput piumasaqaatinik atugassarititaasunillu akuersisussat..
  • Danskit naalagaaffiat Kalaallit Airports A/S-mi aktianik piginnilissappat, Namminersorlutik Oqartussat annerusumik piginnittuussaapput, allallu aktianik piginnittuusut, naalagaaffik ilanngullugu, itigartitsisinnaatitaassanngillat. Airgreenlandimi piginneqatigiit akornanni isumaqatigiissutaasimasumi kukkussutaasimasut takoqqikkusunngilagut, tassanimi naalagaaffik SAS-lu itigartitsisinnaatitaapput ataatsimullu aktianik annerpaamik piginnittuullutik, Namminersorlutik Oqartussat iliuuseqarsinnaanerannik killiliingaatsiartumik.

Inatsisartut aalajangiisuussapput

  • Ilanngullugu piumasaraarput, naalagaaffimmut isumaqatigiissusiorneq mittarfinnut suliassap sanaartornissamulluunniit inatsisissap qanorpiaq ilusilerlugu Inatsisartunit naammassinissaannut qoqassiisoqassanngilluinnassammat. Inatsisartuni suliaq suli ataatsimiititaliakkoorlugu ingerlanneqarpoq Inatsisartullu eqqissillutik suleriaasertillu malillugu isumaliutissiissutissaminnik suliarinninnissaminnut eqqissisimatinneqassapput.

Taamaammat Inuit Ataqatigiinnit qisuariaat erseqqippoq: Tusarliussat soqutiginarput itinerusumillu aningaasat qanoq annertutigisut piumasaqaatillu suut tunngavigalugit naalagaaffik peqataajumanersoq tusassallugu utaqqivugut. Aalajangiisussalli tassaapput Inatsisartut – Kim Kielsen Naalakkersuisullu kisermaassissanngillat.

Sara Olsvig
Siulittaasoq, Inuit Ataqatigiit