Allattoq: Stine Egede, Inatsisinut atuutitsinermut oqaaseqartartoq

Katsorsartinneq pillaanerinnaanngitsoq

Kinguaassiuutitigut atornerluineq akuerinngilarput, akiortuarnissaanullu periarfissarsiortuassaagut. Ilaatigut pinaveersaartitsinermik sulinermik annertusaajuarnikkut.

Pinerliivigineqartut ikiorserneqartarnissaat, minnerunngitsumik piaartumik tamassuma pisarnissaa anguniartuartariaqarparput. Kingunerluuteqartitsinnginnissaq pingaaqimmat, minnerunngitsumillu nammineerluni kingusinnerusukkut atornerluisunngorsinnaaneq pinngitsoortinniarlugu.

Pinerlussimasunik pillaasarnerup sakkortusinissaanik oqariartuuteqarnerput isumaqarpoq katsorsaanermik annertunerujussuarmik piumasaqaateqartalernissaq anguniarusukkipput. Tamannalu eqqartuussisarnermik pinerluttulerinermilu inatsisitigut aamma ersarissartariaqarparput. Imaanngitsoq ukiut amerlanerit parnaarussivimmittussanngortitsineq, kisiannili katsorsaanermik imalimmik, tassalu pinerlussimasup pinerluutaa aallaavigalugu katsorsaanermik imalimmik pineqaatissiisinnaanngornissaq, tamannalu pisassasoq apeqqutaatinnagu tarnikkut nappaateqarneq, nappaateqannginnerluunniit.

Pinerlussimasunut isertitsivimmiit aallaavilimmik tamanna pisinnaavoq, soorunami apeqqutaalluni pinerluut qanoq sakkortutiginersoq; oqaasiinartigut, attuualaarinninnikkut, (atisat qaavisigut, iluisigut) timikkut, kinguaassiutitigut il.il., pinngitsaaleeriarnikkut, pinngitsaaliinnikkut allatigulluunniit. Taamattaaq pingaartuussaaq nalilersussallugu inuk nammineq piumassuseqarnersoq katsorsartinnissamut.

Kinguaassiuutitigut atornerluinerit ikiliartunngitsut nalunngilagut, naak suliniuterpassuit qujanaqisut amerlagaluaqisut – soorunami ilarpassui iluaqutaalluarput. Aamma ingerlaannassapput, kisianni pineqaatissiinermi inuit kinguaassiuutitigut pinerlussimasut “mattutiinnartarutsigit” katsorsarnissaanillu kinguneqanngippat, ajoraluartumik ilisimavarput amerlasuut anigaangamik assingusunik pinerloqqittarneri.

Taamaattumik Inuit Ataqatigiinni upperaarput, pillaaniinnarluta pillaassanngitsugut katsorsaanerli pinerluffigineqartumut, pinerlussimasumullu annertunerujussuaq aqqutissaasoq.

Qaammatit pingasut, ukiulluunniit pingasut parnaarussaareerlutit aniguit, isersimanernilu katsorsarneqarnat, tamanna kimut iluaqusiiva ? Kialuunniit peqqissup takorloorsinnaanngilaa meeraq kinguaassiuutaatigut innarlissallugu, innimigilluinnassavaami. Nalunngilaami inuunerata sinneranut innarlersissallugu. Illuanilli inuk inuunermik arlaatigut anniaatilik, innarlersimasorluunniit, takunnikkuminaatitsisinnaavoq kukkunerminik, killissamilluuniit qaangiinerminik, taamaalillunilu atornerluisuusinnaasarluni. Taakuusariaqarpullu pinerlineqartut assigalugit katsorsarneqartariaqartut. Tamannalu piaartumik pisariaqarpoq.