Kalaallit suliffeqartinnissaannut 2 mio. koruunit qulakkeerneqarput

Folketingimi ilaasortaq Aaja Chemnitz Larsen qanittukkut Suliffissaqartitsinermut ministerimit Troels Lund Poulsenimit allagarsivoq, allakkamilu nalunaarutigineqarpoq satspuljenut partiinit, (tassa inuiaqatigiinni ikiuutinik pissarsisartut atugaannut pitsanngorsaatissatut ukiumoortumik aningaasaliisarnernit), Aajap kissaataatut kalaallit Danmarkimiittut amerlanerit suliffeqalernissannut suliniutinut 2 mio. koruunit immikkoortinneqartut. 

Martsip qiteqquttoq Inuit Ataqatigiinniit Folketingimi ilaasortamit Aaja Chemnitz Larsenimit sulissutigineqartumik kalaallinut Danmarkimiittunut suliffissaqartitsinermut tunngasumik Christiansborgip ataatsimiittarfianni tusarniaasitsisoqarpoq. Tusarniaasitsineq partiillu tassunga tunngasumik suliniutiginnittuarnera maanna kinguneqarpoq, tassami kommunenit aallaaveqartussatut kalaallit amerlanerit suliffissaqartinniarnissaannut suliniutinut danskit naalakkersuisuinit 2 mio. koruunit immikkoortinneqarput. Millionillu taakkua atorlugit pisap iluani annertunerusumik suliniarnissaq toqqammavilerneqarpoq: 

”Inuit atugaat pillugit politikkera iluarsartuuteqqissimavara, maannalu kalaallit amerlanerit sulilersinnissaannut ukkassilissaanga. Tassa pineqartut tassaapput inuit ukiorpassuarni sulisimasut, Danmarkimili suliffittaarnissaminnut ajornakusoortitsisut. Inuit taakkua alloriartikkutsigit, taava kalaallit ineqartut, suliffeqartut Danmarkimilu pitsaasumik inuuneqartut amerlisassavagut. Tamanna aqqutissaasoraara, maannalu satspuljenut partiinit tapersersorneqarpoq”, Inuit Ataqatigiit folketingimi ilaasortaatitaat oqarpoq.

Aningaasat 2 millionit oqareernitsitut kommuneniit aallaaveqassapput. Kalaallit amerlanerusut suliffittaartinnissaat anguniarlugu suliffissaqartitsiniarnissamut atorneqarnissaat isumaavoq. Kalaallit Nunaannilu piginnaasat pigilersimasat danskit suliffeqarfiini atorneqarsinnaanngortinnissaat pineqarpoq.

”Kalaalerpassuit Danmarkimi sumi tamani naapissimasama suliffeqarnissaq inuiaqatigiinnullu pilersueqataanissaq pingaartippaat. Suliniutissaq manna nutaaq aqqutigalugu tamanna piviusunngorsinnaanngormat nuannaarutigaara,” Aaja Chemnitz Larsen naggasiivoq.