Kalaallit Nunaata Naalagaaffiit Peqatigiit peqqusserlunnermik akiuinissamut isumaqatigiissutaat peqataaffigilertariaqarpaa

Inatsisartuni Demokraatit Suleqatigiissitsisullu oqaatilliisinnaanermut aaqqissuussamik whistleblowereqarnermik annertusaanissaq peqquserlunnermillu akiuinissamut suliniuteqarnerunissamut siunnersuutaasa ullumikkut oqallisigineqarnerat partiit arlallit peqquserlunnermik akiuinissamut suliniuteqarusunnerminnik oqariartuuteqarput. Tamanna Inuit Ataqatigiit nuannaarutigeqaarput.

2014-mi Naalagaaffiit Peqatigiit peqquserlunnermik akiuinissamut isumaqatigiissutaanut Nunatta peqataalernissaa siunnersuutigaarput (UPA2014-mi Imm. 52). Taamani naalakkersuisuusunit siunnersuuterput akuersaarneqaraluarpoq ikerinnakkulli qinersisoqarneratigut siunnersuut Inatsisartuni naammassineqanngilaq.

Tamatuma kingorna siunnersuutivut Nunatta peqquserlunnermik akiuilluarnerunissaanut siunertallit arlallit allat, soorlu whistleblower pillugu aaqqissuussaqarnissamut siunnersuuterput, akuerineqarnikuupput.

Tamanna nuannaarutigaarput sulili Naalagaaffiit Peqatigiit peqquserlunnermik akiuinissamut isumaqatigiissutaata peqataaffigilernissaanut alloriarnissaq amigaataavoq.

Tamanna nuannaarutigaarput sulili Naalagaaffiit Peqatigiit peqquserlunnermik akiuinissamut isumaqatigiissutaata peqataaffigilernissaanut alloriarnissaq amigaataavoq.

Inuit Ataqatigiit isumaqarpugut peqquserlunnermik akiuinissamut isumaqatigiissutip peqataaffigilernissaanut piffissanngortoq. Taama ilineq Demokraatit peqquserlunnermik akiuinissamut nalunaarusioqqusinerani suliniutissatut ujartugaat tigussaasumik iliuuseqarfigineqarnissaannik qulakkeerinnissaaq.

Nassuiaasiortoqarnissaa taperserparput, alloriaqqillutali aamma peqquserlunnermik akiuinissamut isumaqatigiissummut peqataalernissaq aamma naammassisariaqarsoraarput.

 

Sara Olsvig
Siulittaasoq
Inuit Ataqatigiit