Josef Motzfeldt, Inatsisartut siulittaasorisimasaat: “Piumamik oqalukkusunnerup kinguneri”

Inuup ataatsip mikrofonimut kipilernerinnaata qinikkatut inissisimaneq sorpajunngortissavaa?

Siuttutut inissisimasumut ajornarnerpaavoq siuttutut inissisimaffimminut naleqqutinnginnami nassuerutiginissaa. Taama artorsarnerup nassuerutiginissaanut sapiissuseqartariaqarneq nammineq inuuttoornermut allat pisuutinnissaannit pingaarnerungaarpoq. Taama pissutsit killiffiannut pilersitseqataasimalluni inissisimalersimanermut nammineq akisussaaqataaneq anigorniagassaavoq.

Piffissanngorpoq maannamut Inatsisartut Siulittaasuata aamma Naalakkersuisut Siulittaasuata ammasumik siuttutut naleqqutinnginnamik nassuernissaannut. Siuttutut inuuttoornerat inuiaqatigiinnut sunniusimavoq. Sapiissuseqarluni eqqortumik aalajangernissaq tassaasariaqarpoq inuuttoorneq nassuerutigalugu nammineerluni tunuartariaqarnermik aalajangerneq.

Inatsisartunut Siulittaasuusimasutut taama torinngitsigisumik iliortoqarnera mamiasuutigaara. Atorfiup ataqqisariaqassusaanut taama naleqqutinngitsumik pissusilersorneq qinersisartutut isiginninnitsinnit nikanarnerungaarpoq.

Imaasillartoq Hans Enoksenip paasilersimanerpaa partimini siulittaasuujutigaluni nunap inatsisiliortuini, Inatsisartuni, siulittaasuuneq eqqortuliornerunngitsoq. Taama inissisimasinnaasorineq nakuniarnarluinnartuuvoq, Hans Enoksenillu atuuffiit marluutillugit naammaginartumik ingerlassinnaannginnamigit ajornartorsiutigeqigaa tamanit arajutsisimaneqartariaqanngilaq.

Innuttaasut atugaat – qinikkatut qaffasissumik inissinneq

Pissutsinullu namminerminut tunngasunut aaqqiissutigeriallaraa partimi naalakkersuisoqataanerata taamaatiinnarnera taamalu, keermiaasit, nuna inuilu naalakkersuinikkut torinngitsuliorfigalugit. Taama torinngitsuliornermut, nammineq tamakkiisumik pilersitaanut, sanilliullugu eqqaanngitsuugassaanngilaq sooq qaammatit sisamaannaat matuma siornagut naalakkersuisunngortitsiniaqataanermini piffissaq sivisunerusoq sukumiinerusumik atorsimannginneraa pingaartinneraqisami ilungersuutiginissaannut. Partiminimi ilanilu inissisimaffiit qaffasissut isumannaarniapallaannarsimagaattut isumaqarnarmat isumaqatigiissutip qanoq patajaatsiginera immineerlugu.

Imaasiinnartoq Hans Enoksenip pingaartinneraqisani, utoqqaat, meeqqat peqqinnissaqarfik il il eqqaalersimanerlugit patsisissarseriataarpoq. Tamakku utoqqatsissutitut atoqinagit matukkut tunorlikkut qimaaqinani, soormi naalakkersuisunngortitsiniarnerup nalaani isumaqatigiissutiminnut ilannguteqqullugit ilungersuutigisimanngikkai? Pisut tamakku Hans Enoksenip pingaarnersiuilluni naliliisinnaanerata amigaateqarneranut takussutissaapput. Taama pissutsinut naliliisinnaanerata tammariasaartarneranut ukiut ingerlasimanerini takussutissaqareerpugut. Eqqaamavara 2005 missaani Naalakkersuisunut siulittaasuunermini qinigaaffik qiteqqutiinnartoq partimi naalakkersuisuutitaasa tallimassaat allamik inuttalillarmagu. Patajaassuseq ilisarnaatiginngilaa, tamannalu maanamut Naalakkersuisut siulittaasuata isumaliutigisimasariaqarsimagaluarpaa qaammatit sisamaannaat matuma siornagut ajornannginnersiuilluni Siumup isumaannut anngaaginnartut, isumaqatiginiatsiarnerini piumasaqaatiminnik ilungersuuteqannguanngitsut naalakkersuisoqasiukkamigit.

Inissisimaffiit qaffasinnerpaat ilatsiinnarfiunngillat

Nunap siuttuisut atorfiit marluk ataatsimoornermik ilungersuuteqaratik pisuutitassarsionermik aallutaqarnerusunik inuttaqarput. Tamatuma kinguneranik innuttaasut paatsiveerusimaartinneqarpugut.

Enoksenip puffassimaarutiginerarpaa partimini siulittaasutut Naalakkersuisut siulittaasuannit ataatsimeeqatiserineqarsimannginnami. Tamatumani Kielsen kisimi pisuutinneqarsinnaanngilaq. Enoksen Inatsisartut siulittaasuattut naalakkersuinikkut sulineq malinnaaffigiuassallugu pingaartumik suliassaqarpoq. Soorlu Naalakkersuisut pilersaarutaat Inatsisartut sulinerannut attuumassuteqartut arajutsinaveersaassallugit. Taamaammat pissusissamisuuginnarpoq Inatsisartut siulittaasuata ilisimatitseqatigiinneq atuutsikkumaguniuk Naalakkersuisut siulittaasuannik ataatsimiigiaqqusisassalluni, tamatumuuna pisariaqanngitsumik aporaaffiusinnaasut ingalassimatikkumallugit.

Soorlu Inatsisartunut siulittaasuunerma nalaani, 09-13, Naalakkersuisut siulittaasuat pisariaqarfiisigut ataatsimeeqatigisarpara, pingaartumik Inatsisartut ataatsimiinnissaasa piareersarnerini. Inatsisartut siulittaasuat qaaqquneqarnissaminut allaffimmini utaqqiinnartussaanngilaq, nammineq iliuuseqartussaavoq.

Atukkat unnuaannaq aaqqinneqarsinnaanngillat

Partip Naleqqap siulittaasuata naalakkersuisoqataajunnaarnerminnut tunngavimmissut taagugai unnuaannaq anguneqarsinnaanngillat. Tamakkerlutik aningaasaliinissamik nassataqarput. Imaappoq Aningaasanut Inatsisiliornikkut isumannaarniagassaapput. Qanormita Parti Naleraq sinnerlugu Aningaasaqarnermut Naalakkersuisuusimasup tamakku Naalakkersuisoqatigiinni partimi siulittaasua peqatigalugu ilungersuutigisimavai? Partiat marlorsuarnik naalakkersuniitsitaqarpoq.

Mannali qularnanngilaq, Naalakkersuisuni tunuartut aamma Inatsisartut Siulittaasuattut tunuartussaq tunuarnerminni qaammatit pingasut aningaasarsiatik tamakkiisumik pigiinnartussaagaat Aningaasanut Inatsimmi isummannaarneqareermata juullimut orpiliarsiniarnissaminnut ukiutoqqamilu qummoroortartussaminnut ernumassutissaqanngillat.

Killiffitta taamaanneranut nunap qullersatut siutui torrallaaruloorsimanngillat. Enoksenip naalakkersuisoqataajunnaarnertik nammineq sulinerata inerneraa. Naalakkersuisut siulittaasuata suleqatigiissitsisinnaannginnini siuttutullu piginnaanneqqortoorsuunnginnami ukiut kingulliit tallimat naammattorsuarmik takutittareerpaa. Pisuni kingullerpiani saqummiunneqartut ilaannannguiluunniit ilumoorsimappata allaffimminut toqqorluni piginnaatinneqarsimanermisut uteqattaagaata kisimi allaffimminiikkallarnera akuerineqarsinnaatippaa. Piginnaatinneqarsimaneq siuttuunissamik isumaqarpoq, imaanngitsoq nammineq isummani kisiat eqqortuunerarlugu ingerlatsinissamut piginnaatinneqarneq. Siuttuuneq, pingaartumik naalakkersuinermi, isumaqarpoq ataatsimoortitsisussaanermik avissaartuutsitsiniartutuunngitsoq. Aatsaat isummanik naapititsisinnaanikkut angusat ataavarsinnaasut pilersinneqarsinnaapput. Maannalkut pissutsit nalaattavut taamaanngillat.

Piffissap sivikitsup ingerlanerani aseruinerit annertuut pilersinneqarsinnaapput, neriuppunga siuttuugallartut tunuarniuteqarnermikkut sapiissuseqaramik takutissagaat, taamaaliornermikkut ingerlariaqqittariaqarnerput periarfississavaat.

 

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 323 702
Fax: (+299) 321 321
Website: https://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 323702
Fax: (+299) 323232
Aningaaq: https://www.ia.gl
Email: ia@ia.gl