Allattoq: Aqqaluaq B. Egede, Politikkikkut oqaaseqartartuat

Isumaqatiginninniarneq Aningaasaqarnermut Naalakkersuisup innarlerpaa

Aningaasaqarnermut Naalakkersuisup eqqunngitsumik Inuit Ataqatigiit pillugit suaaruteqarpoq. Tamanna ersiutaaginnarpoq Aningaasaqarnermut Naalakkersuisup ajornartorsioqisup pisuutitassaarunneranik.

Takuarput Aningaasaqarnermut Naalakkersuisup aningaasanut inatsisissaq pillugu siunnersuutaa taamak isikkoqartillugu Siumup aammalu partiit allat atorsinnaanngitsutut nalileraat. Tamanna patsisaagunarpoq Aningaasanut Naalakkersuisup Inuit Ataqatigiit isumarinngisaannik avammut nilliaateqalerneranut.

Aningaasanut inatsisissaq isumaqatiginninniutigaarput, Aningaasaqarnermut Naalakkersuisoq siuttoriniartussaagaluarparput isumaqatigiissitsiniartussatut. Tamanna artorluinnarpaa massakkummi avissaartuutsitsiniartuni siuttutut pissusilersornini ataqqinaatissarinngilaa.

Isumaqatiginninniarnerit ingerlasut Inuit Ataqatigiit isumaqatigiissutiminnik qimatsisimanerarlugit oqaatiginninnermini eqqaanngilaa nammineq tunuliaquttani aamma Aningaasanut Naalakkersuisup suliaannik arlalinnik akerliunerat. Oqinnerusimagunarpoq pisuutitassarsiornissaq, tamanna takussutissaavoq akisussaaffimmik tigummiamini ajornartorsiutinik annikinngitsunik artorsaateqarneranut.

Aningaasaqarnermut Naalakkkersuisup oqaatiginngisaa tassaavoq nammineerlutik kiisalu 2019-imut aningaasanut inatsisissami isumaqatigiissuteqartut akornanni isumaqatigiissutaasut illuatungaanik isummersuuteqartoqarlunilu sulisoqarnikuummat. Assersuutigalugu aalisarnermut inatsisissaq pillugu ataatsimiitsitaliarsuaq pilersinneqalermat, KNI-p illoqarfinni annerusuni unammillersinnaaneranut tunngasumi, sulinermut ilanngaammut tunngasoq aamma assersuutissaqqilluni. 

Inatsisissatut siunnersuutit Naalakkersuisut qaqitaat Inuit Ataqatigiinniit itigartinneqarsimasutut oqariartorneq aamma eqqunngilaq. Sulimi inatsisissat Ilanngaassivimmut utoqqalinersialinnullu tunngasut inaarlugit suliarineqaqqajanngillat. Taamaattorli partiit amerlanerussuteqarluartut assigalugit, inatsissat pineqartut taamak iskkoqartillugit tapersersimanngilagut ataatsimiitsitaliamili partiit naaperiarfissarsioqatigiikkumanerat peqataaffigalutigu. 

Inuit Ataqatigiit qangaaniilli suleriuseq malillugu aningaasanut inatsisissaq pillugu isumaqatiginninniarpugut. Suleriaaseq ileqquusoq allaanerunngilaq, politikkikkut tunaartassat suussanersut isumaqatiginninniutigaagut.

Ajornartorsiutaaginnarpoq Aningaasaqarnermut Naalakkersuisup eqqunngitsumik pasinarsaaralunilu toqqissisimanngissuteqarpalaarluni aqutsiniarsarinera. Kaammattuutigiinnassavarput ulluni sukataarfiusuni nukissaqarpalaartumik katersuutsitsiniarpalaartumillu suliassani ingerlannissaat nukissaqarfigeqqullugu.

Aningaasanut isumaqatigiissut amerlasuutigut siunnerfinnik nutaanik isummernissatsinnut tunngavinnik allannguuteqarpoq. Orsussamut akit qaffapput. Angallannermut akitsuutit qaffapput. Innaallagissamut akit qaffapput, siunissamilu nunatta aningaasaqarnikkut inissisimanera ajorseriangaatsiarluni inissippoq. Naak aningaasanut inatsimmi ukiut missingersuusiorfiusut oqimaaqatigiinnissaat naatsorsuutigineqaraluartoq, ukiut aggersut pillugit aningaasartuutissarpassuarnik Naalakkersuisut ilimasaaripput, taakkualu siunissami inuiaqatigiittut akiliisinnaassusitsinnut soorunami sunniuteqarluassasut Naalakkersuisut nassuerutigaat.

Inuit atukkamikkut aamma akitigut oqilisaanneqarnissaat Naalakkersuisut tunulliuppaat, killormut akinik qaffatsitsinerit imaaginnavipput. Naak partii Nunatta Qitornai neriorsuuteqarlutik oqariartuuteqaraluartut namminneq parteertik pilersinneqarmat akit qaffakkaluttuinnarnerat, inuillu inuuniarnikkut atugaat ajorsiartuinnarnerat aaqqikkumallunikku. Akitsuutillu qaffannginnissaat neriorsuutigalugu. Sooq taava Aningaasaqarnermut Naalakkersuisuulerami akit qaffallugit inuit inuuniarnerat artornarnerulersillugu aalajangersaaqataava? Partii nutaaq, qinigaaffik atuuffik siulleq siunertaminik qimatsisimalereersoq ilungersuutissaqaqaaq.

Inuit Ataqatigiit kaammattuutigiinnassavarput Aningaasaqarnermut Naalakkersuisup isumaqatissarsiornerulluni ingerlatsinissani nukissaqarfigerpasillugu ingerlatsissasoq.

Tamatta timitaliisariaqarpugut naalakkersuinikkut qanoq suleqatigiissinnaaneq pitsaasoq angusinnaanerlutigu. Suleqatigiisitsiniarsinnaasunik Naalakkersuisoqanngikkutta avissaartuunneq annerulersinnaammat mianersuuttariaqarpoq.

Qinikkat imminnut annaanniarlutik qinikkanik allanik ajortisaarinissartik salliutinnagu suliassat suut suleqatigiilluta aaqqissuussinnaanerigut tunaartariniartigu, aamma Aningaasaqarnermut Naalakkersuisup. Ilungersoqataassaagut Inuit Ataqatigiinniit, suleqataassaagullu.

Kisianni inuit inuuniarnikkut artukkerniarneqarpata aamma inuit inuuniarnikkut artukkerneqarnissaat pinaveersaartillugu sukataarnerput annerineqartariaqanngilaq. Inuimmi ulluinnarni atugaasa ajornerulinnignnissaat pillugu sukataaruteqarneq pissusissamisuuginnarmat.