Kim Kielsenip Lars Løkke Rasmussenillu pappiaraq atsiugaat Inuit Ataqatigiit sukumiisumik misissorsimalerparput. Siusinnerusukkut oqaatigisatsitut danskit naalakkersuisui soqutiginaatilinnik oqariartuuteqarput. Kisianni tamat oqartussaaqataanerat akigalugu Kim Kielsen-i isumaqatigiissumik naammassineqanngitsumik atsioqataavoq.

Ersarissassavarpullu atsioqatigiinneq isumaqatigiissutaanani siunnerfeqaqatigiinnermut atsioqatiginnertut nalileratsigu. Isumaqatigiissutaasussat toqqammavigineqartussallu tigussaasumik isumaqatigiissuteqarfigineqarsimanngillat. Isumaqatigiissutaasimasup taamatut aaqqissuunneqarsimanerata kingunerisaanik isumaqatigiissutaasoq ersernerluinnarani naammaassisimarpasinngitsutut isikkoqarpoq.. Suliap inernera takusimareerlugu atsioqatigiinneq ippassaq pisoq piviusutut iliuuseqavinnertut taajuminaappoq.

Naalagaaffik Kalaallit Airports A/S-imut 700 mio. koruuninik aningaasaliissuteqassappat, taava uagut nammineerluta suliffeqarfiup 2/3-ia pigiinnassagutsigu nammineq 1,4 mia. koruuniinik aningaasaliisariaqaleqqavugut. Ulloq manna tikillugu nunatta karsia suliffeqarfimmut 300 mio. koruuningajaat aningaasaliissutigineqareerput, isumaqatigiissutillu nassatarisaanik aningaasaliissutigeqqitassat 1,1 mia. koruunit suli nassaariniartussanngussasut.

Tamannalu soorunami Inatsisartunit sukumiisumik misissorneqartariaqartoq isumaqarpugut, inuiaqatigiinnimi pissutsit allat amerlaqisut pitsanngorsaavigineqarnissamik aamma pisariaqartitsipput.

Naalagaaffiup amerlanerussuteqarluni aktiaateqannginnissaanik piumasarput aalajangiusimavarput. Ilanngullugu aamma piumasaraarput inaarutaasumik isumaqatigiissutaasussap inernerisassaa nunatsinnut pitsaanerpaassammat, matumani ilanngullugit attartugassanut tunngatillugu ernialiinernut, sinneqartoorutissanut piumasaqaatit pillugit kiisalu toqqammavinnut allanut tunngatillugu aamma atuuttariaqarluni. Naalagaaffiup suliffeqarfimmi kisermaassilluni itigartitsisinnaatitaannginnissaa minnerunngitsumillu Inatsisartut inaarutaasumik tunngavissanik aalajangiisussaatitaanissaat piumasaraarputtaaq.

Qungujulaarutissaqanngitsuunngilagulli, siunnerfeqaqatigiissutaasumimi Inuit Ataqatigiit politikkianut naapertuuttumik anguniagaqartoqarnera takusinnaagatsigu. Kina tikilernerarlugu suaartaannarani Danmarki nunatsinni aningaasaliisussanngorumalernera ukiorpassuarni politikkikkut Inuit Ataqatigiit allat ilagalugit oqariartuuteqartuarsimanerup inerneraa. Ersarissumillu anguniagarisimasatta Airgreenland-imik tamakkiisumik Namminersorlutik Oqartussat piginnittuulernissaa piviusunngorsinnaanngorportaaq.

Sulinerli peqqissaarunneqanngiivissimavoq nukingernerujussuullu kingunerisaanik Inatsisartut Aningaasaqarnermut Ataatsimiititaliaaluunniit isumaqatigiissutip imarisaanik ilisimatinneqanngilaq, peqqissaarussimagaannilu atsioqatigiinneq sioqqullugu ilisimatitsisussaagaluarneq pinngimmat pisoq piviusumik iliuuseqavinnginnertut isigaarput Kim Kielsen-illu iliuusissaarutivissimaneranik ersersitsisuulluni.

 

Sara Olsvig
Inuit Ataqatigiit siulittaasuat