Issittumi Arnat Ataatsimeersuarnissaat pillugu oqallinnermi Sara Olsvig oqalugiarpoq

Arctic Circle Assembly kingumut politikererpassuarnik, inuussutissarsiortunik, kattuffinnik atorfilittanillu peqataasoqarluni Reykjavikimi kultuurip illorsuaani kusanaqisumi Harpami ingerlanneqarpoq. Oqallinnerit silap pissusianit inuussutissarsiornermut tunngasuupput ukioq mannali aamma arnat pisinnaatitaaffii naligiissitaanerlu sammineqassapput.

Tamanna pissaaq Laplandimi Ilisimatusarfiup naligiissitaanermut immikoortortaqarfiata oqallinneq “Towards an Arctic Women Summit” – Issittumi Arnat Ataatsimeersuarnerat anguniarlugu aaqqissuussaq – arfininngornermi unnukkut Arctic Circle Assemblymi pippat.

“Arfininngornermi oqallinneq Issittumi Arnat Ataatsimeersuarnissaasa piviusunngornissaanut alloriaqqinnissamut pingaaruteqarluinnartuussaaq. Arnat angutillu akornanni naligiissitaaneq arnallu pisinnaatitaaffii sammisat pingaaruteqarluinnartuupput, aamma Issittumi sammineqarnerusariaqartut. Kisitsisit qiviarutsigit arnat niviarsiaqqallu kinguaassiutitigut kanngutsaatsuliorfigineqartarnerat angerlasimaffinnilu nakuuserfigineqartarnerat annertunerungaatsiarput. Issittumi tamanna akiorniarlugu suleqatigiinnerunissatsinnut periarfissaqarpugut, ingammillu Canadami takusinnaavarput annertuumik sammineqartut. Canadamimi arnat tammartarnerat maanna immikkut misissuivigineqaleruttorput”, Inuit Ataqatigiit siulittaasuat Sara Olsvig oqarpoq.

Arnalli angutillu akornanni naligiissitaannginneq allatigut aamma saqqummertarpoq.

Suliffeqarfeqarnermi aamma naligiinngittoqarpoq, angutimmi arnanit ataatsimut isigigalugu isertitaqarnerupput. Tamanna ‘arnat sulifferikkajuttagaasa’ akissarsiaqartitsinikkut kinngussaaqqanerannik takussutissaasinnaavoq maannakkorpiarlu perorsaasut akissarsiaasa sammineqarneranni ersippoq. Soorunami erseqqissassavara angutit perorsaasuusinnaannginnerannik oqariartornerunngimmat, angutit perorsaasuulluarsinnaapput, suliffeqarfiilli pineqartut suliffeqarfinnut allanut naligiissinneqartariaqarput tamatumanilu feminismep, arnat angutillu naligiissitaanissaannut sammitillugu arnanullu angutinullu pingaarutilittut qullaattariaqarnera taarusuppara, aamma Issittumi”, Sara Olsvig nangippoq.

Issittumi Arnat Ataatsimeersuarnissaannik piviusunngortitsinissamut suliaq sivisuumik ingerlareersimavoq. Suleqatigiit “Gender is not plan B”-mik imminnut taasut oqallinnermik aaqqissuussisuusut Issittumi Ilisimatusarfiup septembarimi ukiumoortumik ataatsimeersuarneranni arnat issittormiut ilisimatusarnikkut, politikkikkut ulluinnarnilu misittagaannut tunngasunik oqallitsitsipput.

“Arnat issittormiut pisinnaatitaaffiisa sammineqarnerat ukiaq manna Helsinkimi aamma pivoq, tassanilu aamma peqataasussaasimagaluarpunga. Napparsimanermali suliaritinnermalu peqataanngitsoortippaanga, taamaammat massakkut peqataasinnaagama assut nuannaarutigaara pissanngatigaaralu peqataasut allat sammisanik sunik qaqitsissanersut tusassallugu”, Sara Olsvig oqarpoq.

Olsvig aamma tallimanngornermi Issittumi Siunnersuisooqatigiit Issittumi Ilisimatusarnikkut Suleqatigiinnissaq pillugu isumaqatigiissutaannik piviusunngortitsinissaq pillugu oqallinnermi aamma peqataasussaagaluarpoq timmisartussaatali taamaatiinnarneqarnera peqqutigalugu peqataanngitsoorpoq.

“Issittumi ilisimatusarneq pillugu suleqatigiinnissamik isumaqatigiissut Issittumi nunat inoqqaavisa innuttaasuisalu ilisimasaannik ilisimatusarnermut akuutitsinissamut sakkussatut pingaarutilerujussuussaaq. Tamanna ICC-p aasaq ataatsimeersuarneranit aallartitatut peqataaffigisanni nalunaarummi immikkut sammineqarpoq. Nunat inoqqaavisa toqqaannartumik kingunilimmillu peqataatinneqarnerat isumaqatigiissutip pitsaasumik atuutilersinneqarnissaanut piviusunngortinnissaanullu aqqutissaavoq”, Sara Olsvig naggasiivoq.

Tamatuma saniatigut Sara Olsvig Inatsisartut Nunanut Allanut Sillimaniarnermullu Ataatsimiititaliaanut ilaasortatut Arctic Circle Assemblymut malinnaassaaq Kalaallit Nunaatalu Islandimi Sinniisoqarfittaavata arfininngornermi ammaanersiorneranut aamma peqataassalluni.