Allattut: Folketingimi ilaasortaq Aaja Chemnitz Larsen aamma Inatsisartuni ilaasortaq Mimi Karlsen (IA)

Isertuaatsumik ingerlatsisoqarpat angusaqarnerussaagut

Naalakkersuisut isertuussiniarpallaarnerat toqqisisimajunnaartitsillunilu pasilleqqajaanermik kinguneqarpoq. Taama erseqqitsigisumik oqaatigineqartariaqarpoq. Amerikarmiut nunatsinnik soqutiginninnerat danskit aviisini atuartariaqartarpagut, uffa toqqaannartumik Folketingimi Inatsisartuniluunniit oqaluttuarineqartariaqaraluartut. Pissutsit taamaannerisa tamat oqartussaaqataanerat innarlepaat.

Paasinarsivoq Naalakkersuisut Udenrigsministeria peqatigalugu qaammatini arlaqarunartuni 83 mio.kr.-nit pillugit isumaqatigiinniarsimasut, Inatsisartut Folketingiluunniit ilisimatinnagit.

Tamanna naliliisinnaanerup amigarneranik takutitsivoq. Akuersaaruminaatsorujussuuvoq. Danmarkip nunanut allanut ministeriata Politiken-imi ”ilisimasaqarluarluni, naapertuuttumik, qanittumillu ataqqeqatigiilluni suleqatigiittoqarneranik” oqarnera tusanngunakujuppoq. Kikkut suleqatigineqarnerat pineqarnerpa? Qinikkammi suleqatigineqanngillat. Allatuulli amerikarmiut aningaasaliiniarnerat tusagassiorfitsigut aatsaat paasivarput. Aningaasat siunertanut sorlernut atorniarneqarnerat pillugu paasissutissat isertuunnerarneqartut pillugit Berlingske Tidende-p allaaserisaani paasivarput.

Naalakkersuisut Danmarkimilu Nunanut Allanut Ministereqarfiup isertuussinissaq aalajangiussimagamikku, eqquumiigisinnaanngilaat oqallittoqalernera. Taamaappoq – taamaattussaavorlu. Ataatsimiititaliat naalakkersuisut sulinerannik qinikkatut nakkutilliisuupput. Matoqqasumillu pissuseqarneq soorunami tatiginnikkunnaarnermik kinguneqarpoq. Isertuussiniarneq pasinarsisitsivoq. Tassami Nunanut Allanut Ministerip nassuerutigaa, isumaqatigiissut ”soorunami” illuatungeriilluni niueqatigiinnertut pissuseqarmat. Taamaammat apeqquterpassuit takkussuupput. Apeqqutit apeqqutigineqartariaqarsimassanngikkaluarput nunatsinni Danmarkimilu naalakkersuisut partiinik ilisimatitsisimagaluarpata.       

Tamatumani Naalakkersuisut immikkut ittumik akisussaaffeqarput. Nunarput amerikarmiut isumaqatigiinniarfigineqarneranni siuuttuusimavoq. Tamanna Namminersorneq pillugu Inatsimmi tunngavilerneqarpoq, apeqqusinngilarpullu. Ajuusaarnaraluartumik Naalakkersuisut aammalu Inatsisartut Nunanut Allannut Sillimaniarnermullu Ataatsimiititaliaata akornanni pissutsit taamaanngillat. Aatsaat ilungersuanikkut Namminersorlutik Oqartussat paasissutissanik pissarsiffiusinnaapput, paasissutissallu amerlanertigut isertuussassatut oqaasertalerneqarsimasarlutik. Taamatut isertuussiniarneq naliginnarineqangaarmat ippinnarsivoq. Innuttaasummi qanoq ilillutik paasiniaasinnaassappat, paasissutissat taamaallaat allakkat puuannut matoqqasumut ikillugit tunniunneqarsinnaappata? Taamatut pissuseqarnerup ataatsimiititaliap suliassaminik aallussisinnaanera ajornakusoortorujussuanngortippaa, ilaasortallu inuiaqatigiinnut tamanut sinniisuusut suliniarneranni akimmisaartitsineruvoq.

Maanna Naalakkersuisoq aamma  Nunanut Allanut Ministeri isumasiorneqarnissamut aggersarneqarsimalerput. Tamatumuuna neriuppugut apeqqutissarpassuagut akissutissarsisinnaallugit – taamaalillutalu aallaqqaataaniit aallartissinnaalerluta. Inuit Ataqatigiinni nunatsinni Danmarkimilu naalakkersuisut ammasumik tatigeqatigiillunilu suleqatigerusuppaat. Angusaqarnerussaagut qinikkat tatigisinnaagutsigit ammanerusumillu pissuseqarnikkut tamat oqartussaaqataanerat ataqqillugu. Qaratsat amerlanerusut ataasiinnarmiit sullarinnerusarput.