Kommune Kujallermi borgmester Jørgen Wæver Johansen: Folketingimi uran pillugu tusarniaasoqarmat partiinut suliniaqatigiiffinnullu aalajangersimasunut tusangiasaarinerit oqallinnermik pitsaanngereersumik ikummarissaaginnarpoq! Inuit ilisimasatik tunngavigalugit aalajangertariaqarput. Partiimut sumut atasuunertik aallaavigisariaqanngilaat.

Aalajangigassaq taama pingaaruteqarluinnartigisoq pillugu inuit sukumiisumik oqallinnermikkut, minnerunngitsumillu aalajangiisussanit tusaaneqarnermikkut aalajangertariaqarpaat! Aalajangigassaq taama pingaaruteqartigisoq siumut isummiuteriikkat tunngavigalugit aalajangertariaqanngilaq. Taamaammat pingaarutilimmik suliassaqarputit.

Hr. Borgmester Jørgen Wæver Johansen: Kujataamiut illuinnaasiunngitsumik, pingaartumik ilisimatuussutsikkut ilisimasat aallaavigalugit oqallinnissaannut qularnaarutaasussaaniaraluarputit. Oqallinnermi tassani – illit Kujataani politikkikkut siuttutut – qularnaarniagassavit pingaarnersaat tassaavoq inuit pingaartumik Kujataamiut, aalajangertinnatik isummanut assiginngitsunut naalaassasut minnerunngitsumilu ilisimasassanik pisariaqartunik saqqummiivigineqassasut. Akerlianik appisaluussineq atorpat soorlu tassa qineqqusaaginnallartutit, immaqami qineqqusaarputit.

Uran, aatsitassarsiornikkullu suliffissuaqarnerit allat assingusut inuussutissarsiornermut pioreersumut, avatangiisinut minnerunngitsumillu Narsap siunissaanut annertoorujussuarmik sunniuteqartussat, qineqqusaarnerni pisarnertut oqarluartaarnikkut oqaluuserineqartariaqanngillat. INUIT PAASISIMASAQARLUARNERMIKKUT NAMMINNEERLUTIK AALAJANGIIFFIGISASSARAAT.

Hr. Borgmester Jørgen Wæver Johansen: Inuit, minnerunngitsumik kujataamiut ataqqiniakkit. Ataqqiniakkit ilisimasanik eqqortunik peqarunik imminnut nunaqqatiminnullu, minnerunngitsumillu avatangiisit eqqarsaatigalugit eqqortumik aalajangiiumaartut.  Taamaammallu isumaginiarniaruk paasissutissiisarneq peqataatitsinerlu pitsaanerpaaq ingerlassasut. Appisaluussineq siuttuuniamut tulluanngeqaaq. Iperarniaruk. oqallinneq pitsaasoq aallarneeqataaffiginiarniaruk siuuttutut ataqqinassuseqarumaguit.

Inuit Ataqatigiit Kommune Kujalleq

Avaaraq Olsen – Debora Kleist – Kista Isaksen – Stine Egede Nørbæk – Kelly Berthelsen – Ole Mølgaard Motzfeldt