Inuit peqqissusaat akigalugu uran-imik piiaaniartut pissaaneq atornerlulerpaat!

Aleqa Hammond Folketing-imi ilaasortaq inuit nunatsinni peqqissusaat innarlitsaaliornagu uranisiornikkut aningaasarsiupallannissaq kissaatigaa. Kikkut tamarmik takkuanni nunarput sinnerlugu aallartitaq taama qisuariaateqarmat uissuummissutigaara. Massakkut paasinarsivoq Siumut siuttoralugu naalakkersuisooqatigiit sooq taamak tuaviuussitigalutik inuiaqatigiillu akuutinnaveersaarlugit uran-imik piiaanissaq tuaviinnaq akueriniarsarigaat.

Inatsisiliornerit aamma aalajangersaanerit kiisalu nunat allat peqatigalugit isumaqatigiissusiornerit naalakkersuinikkut aallartereerput. Suliat inaarsarlugit naalakkersuisut ingerlarsorput, naak Siumut oqartuartaraluartoq “aatsaat inuit peqqissusaannut avatangiisinullu piumasaqaatit qulakkeeqqaarlugit uran-imik piiaanissaq akuerineqassasoq”. Tamanna salluneruvoq, pisuusaarneruvoq, inuiaqatigiillu akerliulernerannut nipangersaataannaavoq timitalerneqanngitsoq, aamma timitaleruminaallereersoq.

Sooq? Pissutaavoq, suli inuit peqqissusaannut avatangiisinullu sunniutissaannut tunngasut qulaajarneqarsimanngitsut aalajangersaanerit aallartereermata. Aalajangiinerit tamaasa uran pillugu naalakkersuinikkut suliat annertusiartorput. Kiisa isumaqatigiissusiornerit inatsisiliornerillu naammassinialerput suli inuit peqqissusaannut tunngasut qulaajarneqarsimanngitsut, avatangiisinut uumassusilinnullu innarliinnginnissaq suli qulaajarneqanngitsoq.

Massakkullu paasivarput Siumut-p siulittaasorisimasaa Aleqa Hammond foketing-imi oqaaseqarnermini inuit peqqissusaannut innarliinnginnissamik mianerinnilluni qulakkeerinnissimanissaq Siumut-p qinigaatitaanit qaffasissumik inissisimasumit pingaarnerutinneqanngitsoq, tamatumani aningaasarsiorluarnikkut nunap namminersortut tunngavissarissaarnerulernissaa pisarnermisut isiginiarnerugaa assut maluginiarnarpoq.

Parti Siumut naalakkersuisullu pisuusaarunnaarniarlik. Nul-tolerence atorunnaarsinneqarmat aamma inuiaat taasitinneqarnissaat neriorsuutigaat. Aamma neriorsuutigaat peqqissuunissamut avatangiisinut uumassusilinnullu allanut qulakkeerinnereerunik aatsaat uran akuerineqarsinnaasoq.

Sooq taava inatsisiliortut aalajangersaavugut? Sooq Uranisiornissaq siunertaralugu suliat annertuut aningaasarpassuarnik nalillit suliarilereerpisigit uran itigartinneqassappat aningaasat inuiaqatigiit aningaasaataat annaaneqartussanngorlugit? Uran itigartinneqassappat taava massakkut amerlanerussuteqaqqarlusi inatsisit akuerisaqattaakkasi atuutilersitasilu sumut atussappat? Uran itigarteratarsinnaagussiuk sooq taava nunat allat suleqatigalugit isumaqatigiissusioreerpisi?

Sooq uranisiorfimmi sulisussat illersorneqarnissaat inatsisiliuutereerpisigit uranisiornissaq itigarteratarsinnaagussiuk? Ila apeqquterpassuit akineqassanatik naalakkersuinikkut nipangiinnarluni erseqqissuliussananilu aqutsineq sumik patsiseqarsimanerpa? Ukua apeqquterpassuit Siumumi qinikkanut nutaarsiassaanngillat, uatsinnulli nutaarsiassaassagaluarpoq apeqqutit akineqartuuppata naalakkersueriaaserli massakkut paasiuminaatsoq nassuiarneqarsinnaappat.

Naggataatigut Inuit Ataqatigiit politikkikkut oqaaseqartartuattut kaammattuutigissavara Naalakkersuisut Siulittaasuat akisussaaffimmik tiguseqqullugu. Nunatsinni inuit amerlavallaat naalakkersueriaatsimut apeqqusersuilernerat toqqissisimannginnerallu pillugu nassuiaateqaqqullugu.

Akuersaaginnarneqarsinnaanngilaq inuiaqatigiit qinigaasa inuit peqqissusaat pingaarnerutinnagu sulinertik ileqquliutissappassuk. Parti naalakkersuinikkut siuttuusup qinigaatitaasa partiimi pingaarutilimmik inissisimasup oqaasii Nunatsinni Naalakkersuisut Siulittaasuata tunuliaqutserpai? Parti Siumut akisariaqarpoq Aleqa Hammond-ip naalagaaffeqatitsinnut pisortatigoortumik oqaaserisai isumaqatiginerlugit. Parti Siumut isummertariaqarmat, akisariaqarmat naalakkersuinikkullu assortuussutaaqisunut aamma Inatsisartunut ilaasortaatitai naalakkersuisuutitarisaallu akisariaqarmata, aamma akuusariaqarmata.

 

Inuit Ataqatigiit

Politikkikkut qaaseqartartuat

Aqqaluaq B. Egede

 

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 323 702
Fax: (+299) 321 321
Website: https://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 323702
Fax: (+299) 323232
Aningaaq: https://www.ia.gl
Email: ia@ia.gl