All.: Aqqa Samuelsen, Isumaginninnermut meeqqallu pillugit oqaaseqartartoq.

Inuit innarluutillit pillugit iliuuseqarnerit annertunerusariaqarput

Ukioq manna inunnut innarluutilinnut sapaatip-akunneqartitsinermi, nunatsinni inuit innarluutillit tamaasa sapaatip-akunneqartitsinermi uummammit pisumik ajunnginnerpaamik kissaappavut.

Naalagaaffiit Peqatigiit inuit innarluutillit pisinnaatitaaffii pillugit Nunatta peqataalerneratigut pisussaaffinnik immikkoortunik arlalinnik naammassiniagassaqarpugut.

Naalagaaffiit Peqatigiit inuit innarluutillit pisinnaatitaaffii Nunatta malitsitsinissaanut qulakkeerinninnissamut Nuna tamakkerlugu suliniutit ersialaarnerutinneqarnissaat kissaatigaarput.

 Ilisimavarput nunatsinni innarluutillit amerlasoorpassuit siusinaarlutik sulisinnaajunnaarnersiuteqartut, ilisimavarpullu nunatsinni innuttaasut tamarmik nunatta ineriartornerani atorfissaqartinneqartut. Taamaattumik siunissami innarluutilittatta inuiaqatigiinni sullisseqataanissaat allatulli pingaartigisoq nassuerutigisariaqarparput iliuuseqarlutalu. 

Inuit innarluutillit pisinnaatitaaffii malissallugit pisussaaffeqarpugut 

Innuttaaqativut inuit innarluutillit inatsisitigut inuttut allatuulli pisinnaatitaaffeqartut Nunatsinni pisortat namminersortullu ingerlataanni, inuit innarluutillit namminerisaminnik angerlarsimaffeqarsinnaatitaanerat eqqarsaatigalugu illorsualiortiternerni illuliortiternernilu inissaqartinneqartutut misigisimalernissaat pinngitsoorneqarsinnaanngilaq, pingaartumik Nunatsinni illoqarfinni nunaqarfinnilu tamani. 

Assersuutitut ulloq unnuarlu nammineq angerlarsimaffigisamut, inuussutissarsiutinik ingerlatsivinni, niuertarfinni allarpassuarnilu innuttaasut katerittarfiini pingaartumillu angallannikkut periarfissat eqqarsaatigalugit inuit innarluutillit aporfissaqaratik ajornaannerusumik pisariitsumillu periarfissaqartitaasariaqarput.

Taamaattumik illorsualiortoqartarnerani inuit innarluutillit, soorlu qamutinik kaamisartakkanik atuisut, arlaatigut aporfissaqaratik angalasinnaanissaanut periarfissaqartitaasannginnerat suli atuummat ilungersunartutut isigivarput. 

Ukiuni kingullerni amerlasuuni isumaginninnerup iluani pitsanngorsaanerit naalakkersuinikkut ingerlanneqarput. Inuit innarluutillit tapersersorneqarnissaannut Inatsisartut inatsisaat 1. januar 2020 atuutilissaaq.

Inuit innarluutillit tapersersorneqarnissaannut Inatsisartut inatsisaat atuuttussanngornerani puigussanngilarput inatsist atuutilersitagut naapertuuttumik atuutsinneqarsinnaanerat aamma suliassaamat.  Taamaattumik inuit innarluutillit tungaasigut iliuuseqarnissaq suli nangittumik pisariaqarpoq taamaattuaannassallunilu.

 Innarluutillit Illersuisuat piffissami sivisuallaanngitsumi atuussimalerpoq, maannalu paasinarsereerpoq inuit innarluutillit sullinneqarnerat pisinnaatitaaffiisalu atuunnerisa nakkutiginerat qulakkeerniarlugu  unammilligassat iliuuseqarfigineqartariaqartut amerlaqisut. Unammilligassallu amerlammata inuit innarluutillit pillugit politikkikkut iliuusissat pillugit siunnerfeqaqatigiinnissarput pisariaqarpoq.

 Nunarput tassaasariaqarpoq inuit kikkulluunniit inooqataaffigisinnaasaat. Aamma innarluutillit ullumikkorniit annertunerungaartumik aqqutissiueqataaffigalugit inooqataanerminni periarfissarissaarnerunissaat tunngavilerniartariaqarparput. Unammilligassat annertuut inuit innarluutillit pillugit siunissamut ukiorpassuarnilu piujuartussamik naalakkersuinikkut aaliangersaasariaqarpugut Aningaasanut Inatsit aqqutigalugu aningaasalersuinernik qulakkeerinnittumik.

 Iliuuseqarnissarpullu ullormiit ullormut aaqqiinivimmik kinguneqartussaanngikkaluartoq ulloriarnertut siullertut aallartittoqarnissaa anguniarneqarpoq. Ilisimagaluarlugu iliuuseqartoqartoq, iliuuseqattarnivulli naammanngillat, takutitsisuuginnarpulli suli annertunerungaartumik suliassaqartugut.