Maajip 24-iani Michael Roing-ip tugagassiuutinut nalunaarutaanut akissut

Inuit Ataqatigiit siulittaasorput suliassaminik naapertuilluarluni aamma qisuariarfissani susassaqarfigisanilu oqaaseqarfigai. Siulittaasutta suliassaminik eqqortumik paasinnissimaneranut takussutissaavoq naalakkersuisooqatigiit isummamikkut assigiinnginnerujussuat tikkuaramigit. Tamanna pillugu Demokraatit sinnerlugit Michael Rosing uparuaavoq isumaqarunarluni naalakkersuisooqatigiit isummersorfigeqqusaanngitsut Inuit Ataqatigiinni siulittaasuugaanni.

Naamik, aatsaat taamak isummersorfigineqartigilissaasi naalakkersuisooqataagussi. Susassaqarfiit, suliniaqatigiiffiit, kattuuffiit ingerlatseqatigiiffiit aammalu soorunami partiit allat tamarmik nakkutilleeqataanissaat isummersortuarnissaat tikilluaqqusariaqarpasi. Tassa unittariaqalerpoq oqartussaaqataaneq mattullugu suliniarsarinersi! Kikkut tamaasa qulangerlugit aqutsiniarneq kiisa isummersoqqusiunnaarnermik piumasaqarfiusalerpoq. Tamanna akuerineqarsinnaanngilaq.

Parti imminut Demokraatinik taasoq oqartarnerattuut demokrati-mik,- tassa oqartussaaqataanermik tunngaveqarnerartoq inuit isummersorsinnaanerannik mattussiniarsaraluni pissaanerup oqquani ilisarnarunnaalersoq ajorinniinnarani siunissaq nalorninarunnaarsillugu tikkuaasinnaanngikkuni soorunami nalornisitsissaaq.

Tamanna Inuit Ataqatigiit siulittaasutta tikkuarmagu tamatta isumaqatigaarput. Naalakkersuisooqatigiit inatsisiliornerminni suliniaqatigiiffiit, kattuffiit aamma sammisanut aalajangersimasunut susassaqartut akerliorrakkaluarpataluunniit aalajangersaaginnalerput. Inuit akerliugaluarpata imaluunniit Inatsisartut ataatsimiittarfianni apeqqutit tikkuaanerillu oqaaseqarfigiumassanagit ingerlarsorput. Soorunami uparuarneqarnissarsi nammineq annertusiartortipparsi imminulluunniit illersorlusi aalajangernissinnut tunngaviit oqaloqatigiissutiginissaat mattuttuarassiuk.

Naalakkersuisooqatigiit isumaqatigiissutaat tassaavoq naalakkersuisooqataanermik tunngavik nalitunerpaaq. Naalakkersuisooqatigiillu akerleriinnerat arlalinnik uppernarsaatissartaqarpoq. Assersuutigalugu naalakkersuisooqatigiit isumaqatigiissutaanni qulequtaannarluunniit imaattoq qanoq timitalissallugu isumaqatigiissutigaasiuk?: ”Ataatsimoorneq –Toqqissisimaneq – Ineriartorneq”. Akerliussutsimik takutitsinerit imaaginnavipput, Nuuk-miinnaanngitsoq aamma sinerissami inoqarfinni arlaqartuni tamanna pisarpoq.

Naalakkersuisooqatigiinnissamik tunngaviit isumaqatigiissutit malitsinneqanngitsut arlaqarput. Inuit Ataqatigiit siulittaasutta uparuaanermini aamma tamakku ilisimallugit uparuaanera eqqortuusoq naalakkersuisooqatigiit ilissi nammissinnik unioqqutitasi uppernarsaataapput Michael Rosing-ip kukkulluni Sara Olsvig-mut tikkuaagaluarneranut.

Tikilluaqquniarsiuk naalakkersuisooqatigiittut oqartussaaqataaneq inuillu isummersorsinnaanerat mattunnagu nunatsinni killiligaanani oqaaseqarsinnaatitaaffiusumi aqutseqataassallusi.

Erseqqissassavara Inuit Ataqatigiit Inatsisartut Naalakkersuisullu siunnersuutaannut isumaqataaffigisavut amerlammata. Naaperiaassutigisavut arlaqarput. Taamaammat oqaannartoqarsinnaanngilaq akerliuinnartuusugut. Isumaqataaffigisavut amerlanerupput akerleriissutaasuninngarnit. Nuannaarutigaarput sunniuteqaqataagatta, naalakkersuisooqatigiillu aamma suleqatigilluartarlutigit.

Pissaanermik tigusineq nunap inuinik tusaasinnaajunnaaqqasutut, inuillu naalakkersuinermut akerliusut akeqqiullugit aqutsineq nunami maani tulluartuunngilaq. Neriuppunga Demokraatit qangatuut inuit isummersinnaanerannik nukittorsaajumasut, aammalu inuit ikinnerussuteqartut tusaaneqarnissaannik noqqaasaqisut pissaanermi oqorsisimaaginnalissanngitsut. Nunatta aqunneqarnera aamma naalakkersuisooqatigiit tamatta susassareqatigiilluta isummersorfissaraarput. Neriuinnassaagut aamma Demokraatit tamanna mattutissanngikkaat.

Aqqaluaq B. Egede, Inuit Ataqatigiit