Inuit Ataqatigiit qinigaatitai Narsamut tikeraleruttorput. Partiip aasaanerani ataatsimiinnera arfininngornermi sapaammilu Narsami Katersortarfimmi ingerlanneqassaaq. Inuit Ataqatigiit qinigaatitaasa akornanni qinikkat 25-t, savaatillit, uranimik sammisallit nunaniillu allaneersut Canadameersut, Australiameersut Nunavummeersullu peqataassapput.

Urani pillugu isumasioqatigiinneq ammasoq

Aaqqissuussaq annertooq nunarput tamakkerlugu peqataaffigineqarpoq, Tiniteqilaamit Kangersuatsiaq tikillugu Inuit Ataqatigiinnit nunaqarfinni aqutsisunut ilaasortat, folketing-mut ilaasortaq, Inatsisartuni Ilaasortat aamma Kommuneni qinikkat peqataassallutik. Inuit Ataqatigiit qinigaatitai katillugit 25 najuukkumaarput.

”Nuannaarutigaarput aasaanerani ataatsimiinnerput Narsami pisinnaammat. Narsami innuttaasut qanimut tikillugit urani pillugu eqqartueqatigissallutigit pingaartilluinnarparput. Qilanaarpugut partiitta politikkianik eqqartuinissamut isummanillu avitseqatigiinnissamut”, Sara Olsvig partiip siulittaasua oqarpoq.

Arfininngornermi urani pillugu isumasioqatigiinnermi Nunatsinnit, Australiamiit, Canadamiit kiisalu Nunavummiit saqqummiisussanik immikkut qinngornernik ulorianartunik ilisimasalinnik, nunaminnilu misilittagalinnik ilaasoqassaaq. Arfininngornermi isumasioqatigiinneq tamanut ammavoq.

Aningaasaqarneq siuariartariaqarpoq

Sapaammi Inuit Ataqatigiit nuna tamakkerlugu peqataatitaqarfigisaani ataatsimiinnermi partiip aningaasaqarnermut politikkia sammineqassaaq. Pingaartumik nunatta aningaasaqarneranut aaqqiissutissanik oqallinneq aamma inuiaqatigiinni naligiinnerulernissamut suliniutit sammineqassapput.

”Aningaasarsiornerput siammartariaqarparput, aatsitassarsiorneq kisimi sammineqassanngilaq. Massakkut suliffissanik pilersitsisariaqarpugut illoqarfiit Narsatut ittut ingerlallualeqqinnissaat anguniarlugu. Politikkikkut naligiinnginneq akiortariaqarparput”, Sara Olsvig naggasiivoq.

Arfininngornermi urani pillugu isumasioqatigiinnermut Inuit Ataqatigiit soqutiginnittunut tamanut qaaqqusipput.

Isumasioqatigiinnermut uranimik piiaanissamik pilersaarutillit GME saqqummiussinissamut qaaqquneqaraluarput peqataajumasimanngillalli.

 

Attavissaq:

Sara Olsvig +299 526858