Piujuartitsinermik tunngaveqarluni aqutsineq Inuit Ataqatigiinnut tassaavoq avatangiisinik eriaginninneq, tamanna qulakkeerinninniassammat qitornatta taakkulu kinguaavisa minguitsumik pinngortitamik avatangiisinillu atugassaqarnissaat kiisalu uumassusillit nunamiittut imaaniittullu inuussutigisinnaaniassammatigit. Taamaattumik Inuit Ataqatigiit uranimik piiaanissaq akerleriuarnikuuvarput, ullormannami tikillugu uppernarsaataasinnaasunik takusassaqanngilagut piujuartitsinermik tunngaveqarluni uranimik piiaasoqarsinnaaneranik takutitsisunik.     

Uranimik piiaanikkut nuna taassumalu eqqaaniittut avatangiisit piiaasoqalinnginneratut isikkoqartillugit uterfigeqqinneqarsinnaanngisaannarput. Inuit Ataqatigiinniit ernummatigisatta ilaat tassaavoq nunalerinermik aalisarnermillu inuussutissarsiuteqarneq Kuannersuarni uranimik piiaalernikkut oqaluttuaannanngussasoq. Akisussaaffik taanna Siumup, Demokraatit aamma Nunatta Qitornaasa qimarratigisinnaajunnaartussaavaat qaqugorsuarmut. Kuannersuit uranisiorfigilerneratigut piujuartitsineq tunngavigalugu ingerlatsineq Nunatta pingaartitsinermigut ilisarnaatigilersimasani annaassavaa.

Inuit Ataqatigiinniit iluunngarluta neriuutigaarput Naalakkersuisoqatigiit eqqarsarluarnissaat, tusarniaanerullu aallartittup unitsikkallarnissaa piffissaagallartillugu aalajangerlugu. Tusarniaanermi atortussat tusarniaassutigineqalerneranni naammasseriigaasarput, tassunga ilaalluni innuttaasut ataatsimeeqatigineqarnerat. Aamma ima isumaqartussaavoq apeqqutit suli nalorninaatillit, soorlu eqqagassat qanoq passunniarneqarnerat inissereerneqartussaalluni, paasissutissallu inisseriigaassaallutik.

Aamma ima isumaqarpoq Nunat eqqaamiugut ilisimatereerneqartussaasut avatangiisit eqqarsaatigalugit killeqarfiit akimorlugit sunniutaasussat pillugit, soorlumi nunat tamalaat akornanni tamanna isumaqatigiissutaasoq. Inuit Ataqatigiit paasinninnerat naapertorlugu tamakku suli pisimanngillat.

Ullormanna tikillugu Narsarmiut tamatumalu eqqaani najugallit tamakkiisumik ilisimatinneqanngillat Kuannersuarni aatsitassarsiortoqalissappat tamatuma peqqissutsimut avatangiisinullu sunniutigisinnaasai pillugit. Inuit Ataqatigiinniit ernumassutigivarput paasissutissat tamakku Naalakkersuisuniit innuttaasunut isertuunneqarsimappata.

Inuit Ataqatigiinniit aamma ernumassutigivarput aatsitassarsiornerup avatangiisinut kingunerisinnaasai pillugit paasisitsiniaanerni peqataatinneqartut ilisimatuut Narsarmiut eqqaanilu najugallit innuttaasut ernumallutik apeqqutaannut amerlasuunut akisinnaasarsimannginnerat.

Inuit Ataqatigiinniit aammaarluta Naalakkersuisoqatigiinnut kaammattuutigissavarput aatsitassarsiorniarnerup avatangiisinut inuiaqatigiinnullu kingunerisinnaasai suli nalorninartoqartillugit tusarniaaneq unitsikkallaqqullugu. Kujataani inerisaaneq avatangiisinik eriaginnittoq ukkatarineqarli. Uranimik piiaanissamik pilersaarutit illikartillugit inuussutissarsiutit pioreersut ineriartortinneqarsinnaasullu amerlaqisut ukkatarineqarlik.

Tamassa akisussaaffigivarput Nunarput qitornatsinnut ernutatsinnullu tunniutassarput tassaassammat peqqissoq, naapertuilluartoq, nammaqatigiiffiusoq ammasuusorlu. Tassaassanngilaq Nunatta Karsiata imakisaarfiunerani akiliiumanerpaamut tuniniagassarput, ullumikkutullu ilillugu utertinneqarsinnaajunnaarsitassarput. Narsarmi, Kujataani Nunatsinnilu tamarmi.

All. Sofia Geisler, Inuussutissarsiornermut Aatsitassanullu Ataatsimiititaliaq, siul.tullia

Share and Enjoy !

0Shares
0 0