Inuit Ataqatigiit: Innimiilliorfigineqartarnerit akuersaarneqarsinnaanngillat

Piffissami kingullermi innimiilliorfigineqartarnernut tunngasut saqqumilaaleqqipput, tamatumuunalu politikkikkut suliallit akornanni pisimasut aallaavigalugit tusagassiutini toqqaannartumik samminnittoqarpoq.

Inuit Ataqatigiinniit iliuutsit killissamik qaangiisut, soorlu tiinganermut attuumassuteqartunik qaninniarnermillu innimiilliorfiginninnerit akuersaanngilagut, isumaqarpugullu innimiilliornerit suulluunniit akuersaanngisaannarnissaat pimoorunneqartuaannartariaqartoq. Tamanna sumi tamani pissaaq, aamma suliffeqarfinni. Innimiilliortoqarsimappat ilisimasaqalerniariarluni iliuuseqartoqartassaaq.

Iliuutsit, soorlu pileriginninnermik takutitsisuusut, unitsinneqanngikkaangamik pissusiliuunneqaannartarput, taamaaliornerit unitsinneqarsinnaapput unitsinneqassallutillu. Meeqqatta siunissaanni pissutsit taamaattut atuutinnginnissaat pillugu unitsitsinissamut politikeritut akisussaaffeqarpugut. Taamaattumillu inuiaqatigiittut killiliinissarput pingaaruteqarpoq.

Inuit Ataqatigiit siulittaasuata Múte Bourup Egedep pisimasutut taakkartorneqartut akuersaarsinnaanngilluinnarpai.

“Pisimasut nassuiarneqartut innimiilliornerupput annertuut, arnallu saqqummertut tapersersuinnarsinnaavakka. Sapiipput, eqqortumillu iliorput.”

Tamannarpiarlu, tassa ammasumik saqqummiisinnaaneq, partiimit pingaartinneqarluinnarpoq. Aaja Chemnitz Larsen oqarpoq:

“Tusarfiginngisaannakkagut amerlavallaaqaat, tassa ersinerit imaluunniit nipangiussinissanut toqqaannartumik toqqaannanngitsumilluunniit sioorasaarneqarnerit pissutigalugit tunniussineq ajortut amerlavallaaqaat. Tusarfiginngisaannakkagut saqqummersittariaqarpagut. Unnerluutiginninnermi politiinik eqqartuussivinnillu innuttaasut tatiginnissinnaasariaqarnerat  eqqarsaatigalugu Inuit Ataqatigiinniit inatsisinik atuutsitsinermut tunngasutigut pitsaasumik atugaqarnissarput sulissutigiuaannarsimavarput. Inuit Ataqatigiinniit innimiilliorfigineqartut tamarmik unnerluutiginnittarnissaannik kajumissaarumavagut, taamaasillutami inuiaqatigiinni innimiilliorfigineqarnerit kanngutsaatsuliorfigineqarnerillu piviusorsiornerusumik kisitsisaatigilissagatsigit.”

Inuit Ataqatigiinniit innimiilliorfigineqartutut misigisimasut tamarmik oqartussanut eqqortunut unnerluutiginninnissaannik, minnerunngitsumillu ikiortissarsiornissaannik kaammattorpagut.

Inuit Ataqatigit sinnerlugit

Múte Bourup Egede, Siulittaasoq.

Aaja Chemnitz Larsen, Folketingimi ilaasortaq.