Inuit Ataqatigiinni siulittaasumik qinersinissaq aaliangiisuulluinnartoq pisussanngorpoq

Sara Olsvigip politikkimit tunuarneratigut Inuit Ataqatigiinni aalajangiisuulluinnartussatut siulittaasumik qinersisoqartussanngorpoq. Partiip siuttussaa sapiitsuussaaq partiillu ingerlaffissaanik tikkuussinissamut piginnaasaqassalluni – aammali nunatsinni inuiaqatigiinni avissartuussimasuni ataatsimoortitsimortitsisinnaassuseqartuussalluni, Inuit Ataqatigiinni inuit ilisarnartut, Ane Hansen, Asii Chemnitz Narup aamma Aaja Chemnitz Larsen isumaqarput:

”Inuit Ataqatigiit kisimik nutaamik siulittaasortaartussaanngillat. Nunarput tamakkerluni siuttunik nutaanik aallartiffissamillu nutaamik pisariaqartitsivoq. Taamaattumillu Inuit Ataqatigiinni partiip siulittaasussaa assorujussuaq pingaaruteqartussaavoq, IA-mi ilaasortat kisiisa eqqarsaatiginagit – nunamulli tamarmut. Nuna innuttanik peqataatitsilluarni sullinneqarnissaanik pisariaqartitsivoq, inuinnaat naalakkersueqataaneranni naalakkersuisut aqutsilluartuusut pisariaqartippagut, susassaqarfiit akisussaaffigilernikuusagut pitsanngorsarneqartariaqarput namminersornermullu inatsisit pisinnaasaat piviusunngortinniarlugit piviusorpaluttumik pilersaarusiortoqartariaqarpoq”, Inuit Ataqatigiit sinnerlugit folketingimi ilaasortaq Aaja Chemnitz Larsen oqarpoq.

Ane Hansenip, Inuit Ataqatigiinneersup Kommuni Qeqertalimmilu borgmesteriusup nangippaa:
”Inuit Ataqatigiinni siuttuuneq aamma nunatsinnut tamarmut siuttunngorsinnaanermik isumaqarpoq. Taamaattumillu siulittaasussatut qineqqusaartussat tamanna piareersimaffigissagaat pingaaruteqarluinnartuuvoq: Akisussaafferujussuaq suliassarujussuarlu naatsorsuutigineqassapput. Siuttutut piginnaaneqartariaqarpoq, tusarnaarsinnaanermik aalajangiisinnaassuseqarnermillu piginnaaneqartariaqarpoq, mikisualuit pingaarutaannik paasinnissinnaassuseqartariaqarpoq peqatigitillugulu qulaaniit tamanik isiginnissinnaassuseqarlunilu suut tamarmik ataqatigiissuunerannik takunnissinnaassuseqartariaqarluni. Tamakkorpiaat pillugit Inuit Ataqatigiit siulittaasussaannut piumasaqaatit annertuujupput”.

”Ukiuni kingulliunerusuni politikkimi arnat pikkorissorsuit annaasimavagut. Inuusuttatta nunarput siunissaqarfissatut upperiunnaarlugu qimattarpaat. Avissaartuunneq misigaarput, inuillu nunatsinni inunngorsimasut peroriartorsimasullu, sulisimasut ilaqutaqalersimasullu Kalaallit Nunaanni angerlarsimasutut misigisimajunnaartut misigisarpagut. Tamanna inuiaqatigiittut akissaqartinngilarput. Inuit Ataqatigiinni siulittaasoq ataatsimoortitsisinnaasoq pisariaqartipparput, imaaginnanngitsoq partiimut siulittaasutut aqqutissamik tikkuussisutut – ukiorpassuanngortunili naalakkersuilluannginnermut pisortatigullu pitsaanngitsumik oqalliseriaaseqarnermut taarsiutissamik tikkuussisinnaasumik pisariaqartitsivugut. Inissaqartitsineq, piviusorsiorneq sulisinnaassuseqarnerlu pisariaqartinneqarput”, Kommuneqarfik Sermersuumi borgmesteri, Asii Chemnitz Narup oqarpoq.

Inuit Ataqatigiinni inuit ilisarnartut ukua pingasut neriuutigisaat tassaavoq, IA-miit qineqqusaartumik nukittuumik sassartoqassasoq. IA-p siuttussaanut suliassaq annertuujuvoq, taamaattumillu politikkikkut annertuumik ineriartortitsinissamut siuttuunissamik piareersimaffiusussaasoq taamatullu naalakkersuinikkut suleriaatsimik nutaamik eqqussiffiusussaasoq isumaqatigiissutigaat.

”Kalaallit Nunaanni inuussutissarsiutitigut politikki malunnaatilik annertuumillu anguniagaqarfiusoq pisariaqartinneqarpoq, tassami tamanna siunissaq neriuuteqarfiulluartoq pilersissagamiuk. IA-mi siulittaasunngortussap Kalaallit Nunaanni ilinniartitaanikkut- inuussutissarsiutitigullu ineriartortitsinermut siuttuunissaa apeqqutaalluinnarpoq. Tassami taakku Kalaallit Nunaaata siunissaa qaamasuunissaanut pingaartuteqarluinnarmata”, Aaja Chemnitz Larsen oqarpoq.

”Taamaallaat innuttaasut amerliartortut ilinniarluarsimasullu aqqutigalugit ineriartornissamut pitsaasumut aningaasaqarnikkut inuttatigullu tunngaviliisinnaavugut. Nunatsinni inuit atugaasigut annertoorujussuarnik ajornartorsiuteqarpugut. Aaqqiivigineqassappata inuttut, aningaasaqarnikkut atortorissaarutitigullu siuarsaanissamut pikkorinnerungaartariaqarpugut”, Asii Chemnitz Narup oqarpoq.

”Ataatsimut isigalugu nunatsinni nuna tamakkerlugu politikkimi siunissamut isigisoqarani kingumut qiviallaasoqarpoq. Inuit Ataqatigiinni siulittaasunngortussap naalakkersuisunut siulittaasunngornissaa anguniarparput. Atuuffimmilu tassani nutaanik eqqarsartoqartariaqarpoq politikkitigullu ineriartortitsisoqartariaqarluni. Taamaattumik Inuit Ataqatigiinni siulittaasussamut qinersinissaq anguniakkamut kivitsisinnaasuusariaqarpoq, partiilu nunarput pillugu suli annertunerusunik angorusutaqarfissatut aallaaviussalluni”, Ane Hansen oqarpoq.

IA-mi ilaasortat pingasut tamarmik IA-mi siulittaasunngortussamut suleqataanissamut piareersimapput.

Taamatut nalunaaruteqarput:

Ane Hansen, borgmesteri
Asii Chemnitz Narup, borgmesteri
Aaja Chemnitz Larsen, Folketingimi ilaasortaq

 

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 323 702
Fax: (+299) 321 321
Website: https://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 323702
Fax: (+299) 323232
Aningaaq: https://www.ia.gl
Email: ia@ia.gl