Inuiattut ajornartoorneq

Meeqqanik inuusuttunillu kinguaassiutitigut atornerluisarnerup annertunerujussua taamalu inuppassuarnik imaannanngeqisumik kalluaanera kalluaasarneralu eqqarsaatigalugu, politiit ukiumut 2018-imut nalunaarutaata pisariaqalersippaa immitsinnut aperinissatsinnut 

ajornartoornertut inissisimalersimasugut inuiaqatigiittut nassuerutigisariaqalinnginneripput.

Meeqqanik kinguaassiutitigut atornerluisarneq pillugu politiit ukiumut 2018-imut nalunaarutaat saqqummiunneqaqqammerpoq. Oqaatigineqartut amiilaarnartumik imaqarput, tassami meeqqanik kinguaassiutitigut atornerluinerit ajoraluartumik ikiliartunngillat.

Meeqqanik inuusuttunillu kinguaassiutitigut atornerluisarnerit akiorniarlugit kommunit tamaviaarput, ulluunerani paaqqinnittarfiit aammalu ulloq unnuarlu meeqqanik inuusuttunillu paaqqinnittarfiit sullissisullu imaannaanngitsunik nammataqarput, kinguaassiutitigut atornerluinerit ilaatigut pissutaallutik ilaqutariippassuit avissaartuutsinneqarput. Meeqqat Illersuisuisuat MIO, meeqqat pisinnaatitaaffii pillugit suliniaqatigiiffiit Foreningen Grønlandske Børn, Meeqqat Ikiortigit – Red Barnet, Meeqqat Inuunerissut, NAKUUSA allarpassuillu pisortat ingerlataat aamma namminneq kajumissutsiminnik suliniartut nukipparujussuit atorlugit maannamut sulianik arlalissuarnik ingerlatsereerput kivitseqataallutillu.

Meeqqat inuusuttullu kinguaassiutitigut atornerlunneqarsimasut ikiorsernissaannut nukinnik peqaratta qujanaqaaq. Suliniarneq millisinnagu akerlianilli annerulersillugu ingerlatiinnarneqartuartariaqarpoq.

Inuttut akisussaaffeqarnerput susassareqatigiinnerpullu ersarissartariaqarparput

Atornerluisoqarsimatillugu ilimatsaassinermi nalunaartussaatitaanermi paqumiginninnerup atorunnaariartornera pitsaasutut oqaatigisariaqarpoq. Taamaalilluni  inatsisit malillugit meeqqat inuusuttullu ikiorserneqarnissamut periarfissaqalertarput, atornerluisullu pilertornerusumik iliuuseqarfigineqarsinnaalerlutik meeqqanik kinguaassiutitigut atornerlueqqinnginnissaat eqqarsaatigalugu.

Ajoraluartumilli  meeqqanik kinguaassiutitigut atornerluisoqarsimatillugu nalunaaruteqartannginnerup atuunnera ernumatigisariaqaripput MIO oqaaseqarpoq. Nipangiussiinnarnerup kalunnerisa kittorarnissaannut sapiissuseqarneq suli annikippallaartoq paasinarpoq. Nipangiussiinnarnerulli kalunneri kittorarneqarpata illuatungaani meeqqanik inuusuttunillu atornerluisut pineqaatissinneqartarnerat ajortuliamut sanilliullugu naapertuuttariaqarpoq. Pineqaatissinneqartut isertitsivimmiitinneqarnerminni katsorsarneqarnissaat pinngitsoorani pisariaqarpoq, tamannami pinngippat isertitsivinniit anigunik ajortuliamik assinganik iliuuseqaqqissinnaanerat qanippallaassasoq ernummatiginngitsuugassaanngimmat.

Meeqqanik inuusuttunillu kinguaassiutitigut atornerluisoqarsimatillugu pineqaatissiinermi inatsisit malittarisassallu ersarinnerulernissaat sukannernerulernissaallu pillugit Inuit Ataqatigiit oqaloqataanissaminnut piareersimapput. Matumanittaaq isumaqarpugut KILLILIISA-mut aningaasaliissutaasut annertuseqqissinnaanerat oqallisigisariaqaripput. Peqatigisaanillu kannguttaatsuliorfigineqartut pilertornerusumik katsorsarneqartalernissaat anguniarlugu iliuuseqartariaqarpugut, pingaaruteqarmat eqqugaasut utaqqisinneqarujussuaqqaaratik qaangiiniarnissamut aqqutissiuunneqarnissaat.

Aqqa Samuelsen, mobil 52 37 03

Isumaginninnermut meeqqallu pillugit oqaaseqartartoq

Sofia Geisler, mobil 58 81 55

Inatsisinut Ataatsimiititaliami ilaasortaq