Inuiaqatigiit ilorlikkut inuunerat puigornagu

Ukiuni makkunani naalakkersuinermi inuiaqatigiit qallikkut inuunerat annertuallaamik sammineqarput, inuiaqatigiillu ilorlikkut inuunerat annertunerusumik ersarissuliorfigineerulluni.

Ukiuni makkunani naalakkersuinermi inuiaqatigiinnut aningaasalersueriaaseq eqqarsaatigalugu qallikkut atugarissaarnissamut sammivallaarnerisigut inuiaqatigiit ilorlikkut inuunerat kingulliunneqariartortoq ersarippoq. Tamannalu inuiaqatigiit ilorlikkut atugarissaarnissaannut, inuillu isumassortariaqavissortut isumaginninnermi suliniutinik ersarissuliorfigineerunnerat siunissaq ungasinnerusoq eqqarsaatigalugu ernumanartoqarpoq.

Ullutsinni naalakkersuinikkut pingaarnersiuinermi inuiaqatigiit qallikkut atugarissaarnissaat salliutinneqarpallaalerpoq.

Pisortat inissiaataanni qitsuuteqassanersugut qitsuuteqassannginnersugulluunniit? Kikkut mittarfissuartaassanersut mittarfissuartaassannginnersulluunniit? Pisortat suliffeqarfiutaanni siulersuisut akissarsiaasa qaffaaviginissaat? Imigassamik “uleersinissaq”? Naalakkersuisut benzinkorteqassanersut benzinkorteqassannginnersulluunniit? Apeqqutit allarpassuit inuiaqatigiit qallikkut inuunerannut tunngasut eqqartorneqarsinnaagaluartut tamakku naalakkersuinermi pingaarnersiukkatut inissikkiartornerat isumaginninnerup iluani suliassarpassuit pitsanngorsagassallu kingulliunneqaleriartornerannik nassataqarpoq.

Inuiaqatigiit ataatsimut isigalugit atugarissaarnerulernissaannut apeqqutinik itinerusunik siammasinnerusunillu eqqartuinissatsinnut alloriartariaqalertugut isumaqarpunga. 

Assersuutigalugu mittarfissualiortiternerit kingunerisaannik innuttaasut amerlasuut nutserlutik aallartissagaluarpata, tamanna isumaginninnerup iluani aningaasartuutit qaffariarujussuarnerannik kinguneqarsinnaanera siunissaq ungasinnerusoq isigalugu piareersimaffigisariaqarparput.

Inuiaqatigiit atugarissaarnerulissappata qallikkut inuuneq kisiat samminagu, inuiaqatigiilli ilorlikkut inuunerat sammineqarnerusariaqalerpoq. Inuiaqatigiit atugarissaarnerulissappata isumaginninnerup iluani pitsanngorsaataasussanik siunissamut isiginerusunik iliuuseqartariaqalerpugut.

Inuiaqatigiit qallikkut atugarissaarnissaat pingaaruteqarpoq, taamaattorli naalakkersuinikkut pingaarutilimmik aaliangiineq pitinnagu alloriartoqalersinnagulu inuiaqatigiit ilorlikkut inuunerat qimannagu ingerlatsisoqarnissaa pinngitsoorneqarsinnaanani. Inuiaqatigiit ilorlikkut inuunerat qulaatiinnarlugu naalakkersuinikkut aaliangiinerit alloriarnerillu ingerlanneqartassappata siunissaq eqqarsaatigalugu inuiaqatigiinnut akisoorujussuanngorsinnaavoq.

Siunissami inunnik katataqannginnissarput pingaartillugu inuiaqatigiit ilorlikkut inuunerat puigornagu siunissamut allorissaaqatigiinnissatsinnut suleqatigiittariaqarpugut, qulakkeerlugulu Nunap inui qimannagit naalakkersuinikkut ingerlatsinissarput.

Aqqa Samuelsen, mobil 52 37 03

Inatsisartunut ilaasortaq.

Isumaginninnermut oqaaseqartartoq.