Allattoq: Inuit Ataqatigiit siulittaasuat, Múte Bourup Egede

Inuiaat assigiinngisitaarnerat nukittoqutaavoq

Inuit Ataqatigiinni siulittaasutut ulluni kingullerni naalakkersuinikkut isummersortut malinnaaffigaakka. Inuiaqatigiittut inunnik tamanik inissaqartitsinissarput inooqateqarsinnaanerpullu nukiusoq isummersortuni amigaatigaara.

Inuiaat nunaminni assigiinngisitaarlutillu suleqatigiinnissamik anersaaqartut pilersittariaqarpagut. Inuiattut toqqammavissaraarput ataatsimoorneq. Nunatsinni inuit qanoq isikkoqarnerat, qanoq suiaassuseqarnerat aamma qanoq oqaaseqarnerat sumilu inunngorsimanerat avissaartuussutaasariaqanngillat.

Inuiattut kulturitta inuiattullu oqaatsivut immikkuullarissut nukittorsartuassavagut, eriagissavagullu. Inuiattut nukittorsarsinnaanngilagut inoqativut peqatiginngikkutsigit. Assigiinngissuseq nukigalugu assigiinngitsunik piginnaaneqarluta angusaqarnissamut nukissavut annertusassavagut. Tamatta immitsinut pisariaqartippugut.

Inuit Ataqatigiit Folketingimut qinersinissamut piareeqqavugut, aamma anersaakkut inooqatigiinnikkullu isiginneriaatsikkut nukissaqarpugut. Kalaallisut, danskisut allatulluunniit oqaaseqarneq inissaqartillugu inuit suleqatigissavagut. Nunatsinni tamatta atorfissaqartinneqarpugut – Nunatsinni inuit ataatsimoortitsigit.