Allattoq: Aqqaluaq B. Egede, Inuit Ataqatigiit politikkikkut oqaaseqartartuat

Inissiat inoqanngitsut kusassarneqarsinnaanngillat, inissiat najugarineqartut nutarternagit

Ineqarnermut Naalakkersuisoq, ila tupinnaraluttuaq. Nunatsinni inissiarpassuit illuutillu amerlasuut oqummik eqqorneqarsimanerat pissutigalugu inissiat inoqanngitsut, igalaavi matuuginnakkat amerliartorput. Tupinnaqaaq Ineqarnermut Naalakkersuisoq inissiat inoqanngitsut igalaarpassuinik kusassaanissamut aningaasartuuteqarniarmat. Pitsaanerussagaluarpoq piumasarsuutit unitsillugit ilaqutariit ineqarfigisaat aserfallassimaqisut aamma oquttut nutarternissaannut aningaasat atorneqartariaqaraluarpata.

Tupaallatsitsinissamut Naalakkersuisoqarfeqanngilaq, Ineqarnermut Naalakkersuisoq inuit pillugit sulisariaqarpoq. Pissutsit inuiaqatigiinni atukkavut Naalakkersuisulluunniit malussarfigisinnaasimanngippagit ingasappallaaqaaq. Qanoq aamma illuutit inissiallu inoqanngitsut, tassa inunnik najorneqanngitsut eqqumiitsulianik kusassarneqarsinnaappat?

Amerlasuut ingutsigassanngortitat aningaasartuuteqarfiginagit inuit angerlarsimaffii nutarterniakkit. Tupinnaqaaq Ineqarnermut Naalakkersuisut inissiat illuutillu igalaavisa matoorsimasut assequtaat eqqumiitsulianik qalipanneqarnissaat sulissutigilermagu, assersuutigalugugooq illu inoqartutut isikkunitsinniarsaralugu.

Naalakkersuisooqatigiit akisussaaffeqarpusi. Suliassaq ilissinniippoq akisussaaqataavusi. Naalakkersuinikkut suliassat pingaarutillit sammineqarnissaat Inuit Ataqatigiit sakkortuumik kaammattuutigaarput. Massakkummi Ineqarnermut Naalakkersuisup nalunaarutaasigut paasivarput suliassat pingaarutillit annertuullu samminagit inissiat illuutillu inoqanngitsut igalaavisa matoorsimasut kusassarnissaannut nukiit aningaasallu atorneqarnissaat Naalakkersuisut innersuukkaat.

Naalakkersuinikkut naliliisinnaassuseq naammassimanngilaq. Akisussaaffik annertooq inuppassuarnut sunniuteqartoq taamak qaappiaannartigisumik Naalakkersuinikkut suliarineqarsinnaanngilaq. Naalakkersuisut Siulittaasuat, Siumut Inatsisartuutitai aamma partiip siulersuisuisa naalakkersueriaaseq nalilersinnaanngippassuk nakkutigisinnaanngippassullu taava kiap tamanna isumagissavaa? Inuit Ataqatigiit isumaqarpugut naalakkersuinikkut akisussaassuseqarneq Naalakkersuisunit aamma taakkua partiianni sanngiilliartortumik nakkutigineqartoq.

Nunarput inuilu taamak sangujoraartigisumik siulersorneqarsinnaanngillat. Naalakkersuilluarnerusariaqarpusi. Kukkorujussuarneq illersoqattaarlugu, partiillu allat uparuartuineraannartarlugit naalakkersuisooqatigeeriaaseqartut akisussaassuseqanngitsullu nunatsinni aqutsineq sukatersiuk. Demokraatit, Siumut aamma Nunatta Qitornai Atassullu Naalakkersuisooqataasutut suleqataasutullu Naalakkersuisunut tunuliaqutaasut toqqorterunnaarlutik akisussaaffitsik tiguniarlissuk.